Wan maun ta sikifi a di wosu sinkii

ANDI ta pasa aki? Dee sëmbë ta hoi wan gaan piizii daka. Di könu u Babilon kai dusudusu heihei sëmbë ko a di piizii. De ta bebe a dee goutu kan ku dee soofu kan ku dee komiki de bi tei puu a di wosu u Jehovah a Jelusalen. Ma te u de kë mëni, dee finga u wan sëmbë maun bigi sikifi a di wosu sinkii. Hii sëmbë fëëë te na soni.

Bëlsasali di bakamii u Nebukatnesali da di könu nöunöu. A bai kai dee könima fëën u de ko. Di könu taa: ’Di sëmbë di o lesi di soni di sikifi aki, nöö di o puu da mi andi a kë taki, o feni hia kado nöö a o dë di u dii möön hei tiima a di könuköndë.’ Ma na wan u dee könima sa lesi di soni di sikifi a di wosu sinkii, nasö konda andi a kë taki.

Di könu mama jei di wolo, nöö a ko a di gaan njanjan wosu. A piki di könu taa: ’Gaantangi, na panta sö. Wan womi dë a di könuköndë fii di sabi dee santa gadu. Di ju avo, Nebukatnesali bi dë könu, hën a mbei a toon hedima u hii dee könima fëën. Hën da Daniëli. Manda kai ën, nöö a o konda da i andi hii dee soni aki kë taki.’

Wantewante dë de go tei Daniëli tja ko. Baka di Daniëli an bi kë tei dee kado, hën a bigi konda faandi mbei Jehovah bi puu Bëlsasali avo, Nebukatnesali, kuma könu. Daniëli taa: ’A bi a’ gaanfasi. Nöö Jehovah bi sitaafu ën.’

Daniëli taki da Bëlsasali taa: ’Ma ju, i sabi hii dee soni dee bi pasa ku ën, ma tökuseei i a’ gaanfasi leti kuma Nebukatnesali. I tja dee kan ku dee komiki dee bi dë a di Wosu u Jehovah, hën i bebe a de. I ta gafa gadu di mbei ku udu ku sitonu, nöö ja ta da di Gaangadu di mbei u gaandi. Fëën mbei Gadu manda di maun dë ko sikifi dee wöutu dë.’

Daniëli taa: ’Di soni aki hën sikifi dë: ’MENE, MENE, TEKEL ku PALSIN.’

’MENE kë taki taa Gadu konda dee daka u di könuköndë fii, nöö di kaba fëën dou kaa. TEKEL kë taki taa de wegi i ku wan wegi, nöö de feni taa i fukë poi. PALSIN kë taki taa de da dee Media sëmbë ku dee Pëlsia sëmbë di könuköndë fii.’

Hii di Daniëli ta fan jeti, dee Media sëmbë ku dee Pëlsia sëmbë bigi ta feti ku dee Babilon sëmbë kaa. De wini di köndë, hën de kii Bëlsasali. Dee soni di di maun bi sikifi a di wosu sinkii pasa tuu di seei ndeti dë! Ma andi pasa ku dee Isaëli sëmbë ? A biti möön woo si, ma boo go luku fosu andi pasa ku Daniëli.