De pai Jesosi a mbeti wosu

I SA’ ambë da di mii aki ö? Jesosi wë e. Djunsudjunsu dë de pai ën a wan mbeti wosu. Malia ta kandi ën buta a wan këdë dendu ka sëmbë ta buta njanjan da buliki ku woto mbeti. Ma faandi mbei Malia ku Josëfu dë ku dee mbeti a di kamian aki? Di kamian aki na kamian u pai miii, na sö nö?

Wë nönö. Ma luku faandi mbei de dë aki: Di Gaan Könu u dee Loomë sëmbë de kai Këisë Aukesi bi ta tii, nöö hën a buta wan wëti taa hii sëmbë musu go a di köndë ka de pai ën go sikifi hën në buta a lanti buku. Nöö hën Josëfu go a Betelehem, biga naandë de bi pai ën. Ma di hën ku Malia ko dou, nöö de an bi feni na wan kamian u tuwë lai. Fëën mbei de ko a di mbeti wosu aki. Nöö a di wan seei daka dë wë Malia ko pai Jesosi! Ma kumafa i ta si, nöö di mii dë bumbuu.

I ta si dee sikapuma dee ta ko luku Jesosi ö? De bi dë a sabana ta luku dee sikapu u de, hën kamian ko limbo gbegedee kuma didia. Di engel u Gadu wë bi du di soni dë! Nöö dee womi ta luku sikafu dë tuu panta seei. De ko fëëë tee kuma de sa dëdë. Ma di engel taki da de taa: ’Nönö dee womi, wan fëëë sö e. Mi tja wan gaan bunu buka ko da unu. Tide de pai di Keesitu a Betelehem. A o heepi sëmbë. Woon si ën dimbolidimboli a koosu pisi. De kandi ën buta a wan këdë dendu ka de ta da mbeti soni u njan.’ Te u de kë mëni, hën wanlö gaan hia basia u Masa Gadu ko hën de bigi ta kanda ta gafa Gadu. Hën wantewante dee womi dee ta luku sikafu dë kule go luku Jesosi, nöö de feni ën awaa.

I sa faandi mbei Jesosi dë apaiti sö u? I sabi ambë dëën tuutuu ö? I sa mëni jeti taa a di fosu woto u di buku aki u bi taki u di fosu Womi Mii u Gadu ö? Di Womi Mii dë bi wooko makandi ku Jehovah u mbei hii soni a liba ala ku goonliba aki. Wë Jesosi da di Womi Mii dë!

Awa, Jehovah tei di libi u di Womi Mii fëën puu nëën a liba ala, hën a butëën go a Malia bëë dendu. Wantewante wan mii bigi göö a Malia bëë dendu kumafa woto mii ta göö a de mama bëë dendu. Ma di mii aki bi dë di Womi Mii u Gadu. Te u kaba fëën de ko pai Jesosi a mbeti wosu a Betelehem. I ko si faandi mbei dee engel bi ta piizii seei u go konda da sëmbë taa de pai Jesosi ö?