Di u ëlufu woto
Biibi ku guwenti di Gadu an lobi
Andi da dee biibi ku guwenti di an bunu. (1)
Dee tuutuu bakama u Jesosi musu biibi taa Gadu dë dii sëmbë a wan nö? (2)
Andi mbei dee tuutuu bakama u Jesosi an ta hoi Bëdaki, Paasen nasö fuujai. (3, 4)
Te wan sëmbë dëdë kaa, a sa du libi sëmbë hogi ö? (5)
Jesoisi bi dëdë a wan kölöisi ö? (6)
A dë fanöudu u du soni di Gadu ta feni bunu ö? (7)
1. Na hii dee biibi ku guwenti dë soni di an bunu. Ma Gadu an ta feni de bunu ee de kumutu u falisi keiki nasö ee de an ta hoi baka da dee soni di i Bëibel ta lei.—Mateosi 15:6.
2. Dii sëmbë a wan Gadu: A dë sö taa Jehovah dë dii sëmbë a wan Gadu ö? Nönö ee! Jehovah, di Tata, da di wan kodo tuutuu Gadu di dë (Johanisi 17:3; Maikusi 12:29). Jesosi da di fosu Womi Mii fëën di a mbei, ma a dë a Gadu basu (1 Kolente 11:3). Di Tata Gaandi möön di Mii (Johanisi 14:28). Di santa jeje an dë wan sëmbë; ma a dë di wooko kaakiti u Gadu.—Genesis 1:2; Tjabukama 2:18.
3. Bëdaki ku Paasen: Dee an bi paii Jesosi a 25 u tuwalufumun liba (december). De bi paii hën a wan pisi ten u tinimun (oktober), wan pisiten u di jaa ka dee sëmbë di ta luku sikapu bi ta buta dee mbeti u de a döösë te ndeti tapa (Lukasi 2:8-12). Jesosi nöiti bi taki da dee bakama fëën taa de bi musu hoi hën fuujai wosu. Ma wan möön bunu soni di a bi taki da de, da taa de bi musu ta mëni di dëdë fëën hiniwan jaa (Lukasi 22:19, 20). Bëdaki ku dee guwenti fëën kumutu u falisi keiki u fesiten. Di seei soni i sa taki u Paasen ku dee guwenti fëën, soni kuma obo ku kököni di de ta abi a di fesa dë. Dee fesiten tuutuu bakama u Jesosi an bi ta hoi Bëdaki nasö Paasen. Dee tuutuu bakama u Jesosi a di ten aki seei, na ta hoi dee fesa dë tu.
4. Fuujai: Dee tu kodo fuujai wosu di i Bëibel ta taki fëën, bi dë u sëmbë di an bi ta dini Jehovah (Genesis 40:20-22; Maikusi 6:21, 22, 24-27). Dee fesiten tuutuu bakama u Jesosi, an bi ta hoi fuujai wosu. Dee guwenti u hoi fuujai wosu, kumutu u falisi keiki u fesiten. Ma dee tuutuu bakama u Jesosi ta da woto sëmbë kado tu. Sö sëëi, de ta abi piizii ten a wan woto ten u di jaa.
5. Fëëë da dëdë sëmbë: Te wan sëmbë dëdë, nöö an sa du wan hojo soni nasö fii wan soni möön. Wa sa heepi de. Sö seei de an sa du u hogi tu (Psalm 146:4; Prediker 9:5, 10). Te wan sëmbë dëdë an abi wan soni di ta libi go dou (Ezechiël 18:4). Ma so juu, nöö dee taku hati engel, di de ta kai taku jeje, ta du kuma de da di sëmbë di dëdë kaa. Hiniwan guwenti u di fëëë di sëmbë ta fëëë, nasö di begi di sëmbë ta begi dëdë sëmbë, di Bëibel ta lei u taa an bunu.—Jesaja 8:19.
6. Kölöisi: Jesosi an bi dëdë a wan kölöisi. A bi dëdë a wan posu nasö wan pau. A wanlö u dee Bëibel di de puu a Giliki töngö buta a wan woto töngö, di Giliki wöutu u kölöisi sikifi taa a dë wan pisi pau. Di maaka u di kölöisi kumutu u falisi keiki u fesiten. Dee tuutuu bakama u Jesosi an bi ta wooko ku di kölöisi te de bi ta dini Gadu. Ee de an bi ta du hën, i ninga taa a bi o dë wan bunu soni taa u bi o wooko ku di kölöisi te u ta dini Gadu ö?—Deuteronomium 7:26; 1 Kolente 10:14.
7. A o dë wan taanga soni u disa so u dee guwenti ku biibi aki. Famii ku mati kandë sa mbei taanga möiti u mbei i ko si, taa jaa fu disa di biibi fii. Ma a möön bunu fuu haika Jehovah ka fu haika libisëmbë.—Spreuken 29:25; Mateosi 10:36, 37.
[Peentje a bladsëidë 22]
Jehovah an dë dii Gadu a wan sëmbë
[Peentje a bladsëidë 23]
Bëdaki ku paasen kumutu u falisi keiki u fesiten
[Peentje a bladsëidë 23]
Na wan hojo soni musu mbei taa u begi dëdë sëmbë nasö fëëë de