Di u tuwalufu woto
Abi lesipeki da libi ku buuu
Unfa u musu si di libi (1) puu bëë. (1)
Fa dee tuutuu bakama u Jesosi ta söi taa de ta hoi de libi ku di u wotowan a pakisei. (2)
A dë wan föutu soni u kii mbeti ö? (3)
Andi da wan lö soni di sëmbë ta du di an ta söi lesipeki da di libi. (4)
Andi da di wëti u Gadu da buuu. (5)
Di wëti dë, dë da di buta di de ta buta buuu da sëmbë tu ö? (6)
1. A Jehovah libi ta kumutu. Hii dee soni di ta libi musu dëën tangi taa de dë a libi (Psalm 36:9). Di libi dë wan soni di santa da Gadu. Seei di libi u wan mii di de an paii jeti, ma di dë nëën mama bëë jeti, dë wan gaan soni da Jehovah. Ee fu esipeesi u bi sa kii di mii dë di ta göö ta ko dë, nöö u bi o du wan gaan zöndu a Gadu fesi.—Exodus 21:22, 23; Psalm 127:3.
2. Tuutuu bakama u Jesosi ta mëni di libi u de ku di u woto sëmbë tu. De ta mbei möiti u di oto di de ta lëi ku di wosu u de, an musu mbei sëmbë kisi mankei nasö dëdë seei (Deuteronomium 22:8). Dee sëmbë di ta dini Gadu, an ta du soni ka de sa lasi di libi u de, sösö u piizii hedi. Hën mbei de an ta pëë wan pëë ka fu esipeesi de sa da woto sëmbë mankei. De an ta piizii an wan fasi ka de sa da wotowan mankei.—Psalm 11:5; Johanisi 13:35.
3. Di libi u wan mbeti seei dë wan santa soni da Gadu. Tuutuu bakama u Jesosi sa kii mbeti u feni gwamba, koosu, u tjubi de seei da siki nasö fu an du hogi ku de (Genesis 3:21; 9:3; Exodus 21:28). Ma an bi o dë wan bunu soni u pena wan mbeti nasö fu kii hën fu di a dë wan piizii soni da i.—Spreuken 12:10.
4. Dee soni kuma sumuku tabaku, hoi tabaku a buka ku tei taku tabaku, an dë soni di tuutuu bakama u Jesosi ta du. Na wan u dee soni aki da wan bunu soni: (1) de ta mbei u ko toon saafu u de; hën da wa o sa tan möön söndö de, (2) de ta poi di sinkii fuu, ku (3) de ta mbei di sinkii fuu ko sundju (Loomë 6:19; 12:1, 2; 2 Kolente 7:1). A sa dë wan taanga feti di u musu feti u sa disa dee guwenti aki. Ma u musu du sö, ee u kë taa Gadu musu feni u bunu.
5. Buuu seei dë wan santa soni, an de wan soni di u musu pëë kuëën, a de u Gadu. Gadu taki taa di libi, dë a di buuu dendu. Hën mbei a dë wan föutu soni u njan buuu. A dë sö seei wan föutu soni u njan wan mbeti ee de an mbei di buuu fëën kule kumutu nëën sinkii tjika. Ee de kisi wan mbeti ku aviti, nasö de kii hën ku taapu, nöö wa musu njan di mbeti dë. Te u suti wan mbeti kii ku wan piiwa nasö goni, nöö gaugau u musu mbei di buu fëën kule kumutu nëën sinkii, ee u sabi taa woo njan di mbeti dë.—Genesis 9:3, 4; Leviticus 17:13, 14; Tjabukama 15:28, 29.
6. A dë wan bunu soni u data buta di buu u wan woto sëmbë da i ö? Mëni taa Jehovah an kë taa u musu tei buuu. Hën mbei taa na wan fasi u sa tei wan woto sëmbë buu buta go a u sinkii dendu. U eigi buuu seei wa o sa tei möön ee de puu hën tjubi a wan kamian kaa (Tjabukama 21:25). Fëën mbei tuutuu bakama u Jesosi an o mbei data buta buuu u wan woto sëmbë dëën. De sa tei woto watawata soni kuma deesi, ma an musu abi buuu nëën dendu. De lobi di libi u de, ma de an o pasa di wëti u Gadu, sösö fu di de kë libi möön longi.—Mateosi 16:25.
[Peentje a bladsëidë 25]
Ee u kë taa Gadu feni u bunu, nöö wa musu tei buuu, wa musu abi taku guwenti, nasö du soni ka u sa lasi di libi fuu