Di u sëbën woto

Begi u ko dë zuntu a Gadu bandja

Faandi mbei a dë wan bunu soni u begi hii juu di i dë. (1)

Ambë da di sëmbë di u musu begi. Unfa u musu begi. (2, 3)

Te wan sëmbë ta begi, andi da dee soni di a sa kai nasö hakisi a di begi fëën. (4)

Na un ten i sa begi. (5, 6)

A dë sö taa Gadu ta haika hii begi ö? (7)

1. Begi da te wan sëmbë ta fan ku Gadu a wan lesipeki fasi. I sa begi Gadu hiniwan juu di i dë. A di fasi dë i sa fii taa i dë zuntu nëën bandja, leti kumafa i bi o fii, te i dë a wan bunu mati fii bandja. Jehovah dë sö bigi ku sö makiti, ma töku a ta haika dee begi fuu! I ta begi Gadu a hiniwan juu di i dë u?​—Psalm 65:2; 1 Tesalonika 5:17.

2. Begi dë wan pisi u di dini di u ta dini Gadu. Hën da, Jehovah Gadu wanwan tö woo begi. Di Jesosi bi dë a goonliba aki, hiniwan juu kaa a bi ta begi hën tata, na wan woto sëmbë. Nöö di wan seei soni u musu du tu (Mateosi 4:10; 6:9). Ma hii dee begi fuu kaa, u musu taki a di në u Jesosi. Te u ta begi sö, nöö u ta söi taa u abi lesipeki da di gaandi u Jesosi. Ma sö u ta söi tu taa u ta biibi a di paima di a paka da u.​—Johanisi 14:6; 1 Johanisi 2:1, 2.

3. Te u ta begi, nöö di fan di u ta fan ku Gadu musu kumutu a u hati. Te u ta begi, dee begi fuu an musu dë soni di u lei a hedi nasö lesi de puu a wan buku (Mateosi 6:7, 8). Te u ta begi an abi toobi ka u dë, ma u musu söi lesipeki. U sa begi hiniwan juu ku hiniwan kamian ka u de. Dee begi di u ta begi a u hati dendu seei Gadu sa jei (1 Samuël 1:12, 13). A dë wan bunu soni u feni wan kamian di dë pii, ka woto sëmbë an dë te u seei kë begi.​—Maikusi 1:35.

4. Andi da dee soni di i sa hakisi nasö taki a dee begi fii. Hii soni di sa sölugu taa di dë di i ku Gadu dë mati ko möön bunu (Filipi 4:6, 7). Di u Tata begi ta lei u taa u musu begi fu di në u Jehovah ku dee soni di a o du. U sa hakisi tu u feni dee soni di u abi fanöudu u sa sölugu u seei. Sö seei u sa hakisi u kisi paadon u dee zöndu fuu, nasö fu a heepi u taanpu gingin te u ta kisi tesi (Mateosi 6:9-13). Ma te u ta begi, nöö wa musu mëni u seei nöö. U sa begi sösö u dee soni di ta kai ku dee soni di Gadu kë.​—1 Johanisi 5:14.

5. I sa begi hiniwan juu di i fii a i hati taa i kë da Gadu tangi nasö taki u dee bunu soni di a du da i (1 Kronieken 29:10-13). I sa begi tu te i abi fuka a i hati ku te i ta kisi tesi u di biibi fii hedi (Psalm 55:22; 120:1). A dë wan bunu soni tu taa bifö i njan nöö i musu begi (Mateosi 14:19). Jehovah seei kë taa u musu begi a „hiniwan juu” di u dë.​—Efeise 6:18.

6. Ko taa, ee u du wan gaan zöndu, nöö a dë taanga fanöudu u begi. A dee lö juu dë u musu begi Jehovah taanga fu abi tjali hati kuu fu a sa da u paadon. Ee u konda dee zöndu dee u du dëën, ku te u mbei taanga möiti fu wa du de möön, nöö Gadu sa dë „kabakaba u da u paadon”.​—Psalm 86:5; Spreuken 28:13.

7. Jehovah ta haika sösö dee begi u sëmbë di ta hoi dee wëti fëën. Ee i kë taa Gadu haika dee begi fii, nöö i musu mbei taanga möiti u libi kumafa dee wëti fëën ta taki taa u musu libi (Spreuken 15:29; 28:9). I musu abi sakafasi te i ta begi (Lukasi 18:9-14). Te i ta begi, nöö i musu mbei möitu u du dee soni di i ta taki nasö ta hakisi a di begi fii. Hën da, i musu söi taa i abi biibi, taa dee soni i taki a di begi fii, kumutu tuutuu a i hati. Sösö a di fasi dë nöö Jehovah sa piki dee begi fii.​—Hebelejën 11:6.