Dee baaa dee ta tei fesi a di ölganisaasi fuu an ta kisi möni u dee wooko de ta du. Ma leti kumafa a bi dë di di fosu kemeente u Keesitu sëmbë bi seti, sö a dë taa de ta buta womi di dou dee maaka u dini kuma „sikapuma u luku di kemeente u Gadu” (Tjabukama 20:28, NW). Dee gaanwomi aki di dë bunu mati u Gadu, ta tei fesi a di kemeente, söseei de dë kuma sikapuma ta tii kemeente, ma de an ’ta du ën a wan duwengi fasi, ma de ta du ën ku piizii, ku wai hati seei. De an ta du ën tu fu di de giii u möni hedi, ma fu di de abi wan gaan hangi a de hati fu heepi sëmbë’ (1 Petuisi 5:1-3). Un wooko de ta du fuu hedi?

De ta booko de hedi ku u nöö de ta tjubi u tu. Dee gaanwomi ta tii di kemeente, söseei de ta tjubi di kemeente faa tan dë zuntu ku Jehovah. U di dee gaanwomi sabi bumbuu taa di wooko di Gadu da de u du da wan gaan wooko, mbei de an ta pëë basi da dee sëmbë u Gadu, ma de ta heepi de u soni waka bunu ku de, söseei u de dë waiwai (2 Kolenti 1:24). Leti kumafa wan sikapuma ta booko hën hedi hii juu ku hiniwan u dee sikapu fëën, sö nöö dee gaanwomi ta mbei möiti u ko sabi hiniwan u dee sëmbë u di kemeente.​—Nöngö 27:23.

De ta lei u fa u sa du andi Gadu kë. Hiniwan wiki dee gaanwomi ta tei fesi a dee kemeente komakandi u taanga u a di biibi (Tjabukama 15:32). Dee womi aki di da deseei u du di wooko, ta tei fesi söseei a di peleikiwooko, de ta wooko ku u, söseei de ta lei u fa u sa peleiki a hii fasi.

De ta da hiniwan fuu degihati. U di dee gaanwomi kë heepi hiniwan fuu apaiti u tan dë mati ku Jehovah, mbei de ta ko luku u a wosu nasö de ta fan ku u a di Könuköndë zali u heepi u, söseei u da u kötöhati ku di Bëibel.​—Jakobosi 5:14, 15.

Boiti di wooko di dee gaanwomi ta du a di kemeente, gaansë u de abi woto wooko di de ta du u sölugu de wosudendu. Söseei de musu buta mëni a dee faantiwöutu di de abi a de wosudendu, nöö di dë ta tei de ten tu. A fiti taa u ta lesipeki dee baaa aki di ta wooko taanga.​—1 Tesalonika 5:12, 13.

• Andi da di wooko u dee gaanwomi u kemeente?

• Na un fasi dee gaanwomi ta lei taa de ta booko de hedi ku hiniwan fuu apaiti?

Di Bëibel ta taki u tu pei kulupu womi di dë Keesitu sëmbë, nöö di ta luku dee wooko u di kemeente. De da „dee gaanwomi ku dee dinai a di diniwooko” (Filipi 1:1, NW). A dë sö taa wan tu gaanwomi ku dinai a di diniwooko ta dë a hiniwan kemeente. Un wooko dee dinai a di diniwooko ta du fuu hedi?

De ta heepi dee gaanwomi u di kemeente. Dinai a di diniwooko dë gaan mati ku Jehovah, de dë u futoou, söseei de ta wooko taanga a di biibi, gaandi wan ku njönku wan tuu. De ta du wooko di dë fanöudu a di kemeente ku di Könuköndë zali. Di dë ta heepi dee gaanwomi u abi möön ten u buta hii de pakisei a di faantiwöutu di de abi u da lei, söseei a di faantiwöutu u da baaa ku sisa degihati.

De ta du wooko di dë fanöudu. De ta buta so dinai u du zaliwakitima wooko u tei sëmbë ku wai te de ta ko a dee komakandi. Wotowan ta seeka poku soni, wotowan ta wooko a bukutafa, so u de ta luku möni soni u di kemeente, nöö so u de abi di wooko u lei dee peleikima u di kemeente na un pisi kamian de musu peleiki. Söseei de ta seeka hii dee soni u di Könuköndë zali u de tan bunu. Dee gaanwomi sa hakisi de so juu u heepi dee möön gaandi wan. Dee dinai dë kabakaba u du hiniwan wooko di de da de u du, nöö u di de dë kabakaba u du dee wooko dë, mbei hii sëmbë u di kemeente ta lesipeki de.​—1 Timoteo 3:13.

De dë womi di wotowan sa waka a de baka. U di so baaa abi bunu fasi di bakama u Keesitu musu abi, mbei de ta buta de kuma dinai a di diniwooko. Te de ta hoi wan paati a dee komakandi, nöö de ta taanga di biibi fuu. U di de ta tei fesi a di peleikiwooko, mbei de ta heepi u u ko möön faja a di wooko. U di de ta wooko makandi ku dee gaanwomi u di kemeente, mbei de ta heepi di kemeente u dë ku piizii, söseei u dë wan (Efeise 4:16). Bakaten de seei sa toon gaanwomi u kemeente tu.

• Un sootu pei womi da dee dinai a di diniwooko?

• Unfa dee dinai ta heepi u soni waka bunu a di kemeente?

Dee Giiki buku u Bëibel ta taki sömëni soni u Banabasi ku apösutu Paulosu. Dee womi aki bi ta dini kuma womi di bi nango luku dee kemeente a dee köndëköndë na awooten. Faandi mbei? U di de bi ta booko de hedi taa soni bi musu waka bunu ku dee baaa ku sisa u de. Paulosu bi taki taa a kë ’toona go baka u go luku dee baaa’ u luku unfa soni nango ku de. A bi dë kabakaba u waka höndöhöndö kilomëti u go da de taanga (Tjabukama 15:36, NW). Di maaka dë dee gaanwomi dee ta waka luku dee kemeente a di ten aki kë dou tu.

De ta ko u da u degihati. Hiniwan keling-gaanwomi nango a söwan 20 kemeente, nöö tu pasi a wan jaa a ta dë wan hii wiki ku hiniwan u dee kemeente dë. U sa feni wini seei u dee soni di dee baaa aki sabi, nöö ee de toou u sa lei soni a dee mujëë u de tu. De ta mbei möiti u ko sabi njönkuwan ku gaandiwan tuu, nöö de ta dë fajafaja u wooko ku u a di peleikiwooko, söseei u go makandi ku u a dee sëmbë di u ta lei soni u Bëibel. Dee gaanwomi aki nango makandi ku dee woto gaanwomi u di kemeente a dee baaa ku sisa u da de taanga, söseei de ta hoi taki di ta da u degihati a dee kemeente komakandi ku dee gaan komakandi.​—Tjabukama 15:35.

De ta booko de hedi ku hiniwan fuu. Dee keling-gaanwomi kë tuutuu taa hii dee baaa ku sisa abi wan taanga biibi. De ta ko makandi ku dee gaanwomi ku dee dinai u luku fa di kemeente nango a fesi, söseei u da de lai u de sa tja dee faantiwöutu u de möön bunu. De ta heepi dee pionili u soni waka bunu a di diniwooko u de, nöö de ta wai u ko sabi njunjun sëmbë di ko nama ku di kemeente, söseei de ta piizii u jei unfa de nango a fesi a di biibi. Hibiwan u dee baaa aki da deseei kuma ’sëmbë di ta wooko makandi u heepi u’ (2 Kolenti 8:23). U musu waka a di biibi u de baka ku di fasi fa de da deseei u du di wooko u Gadu fajafaja.​—Hebelejën 13:7.

• Faandi mbei dee keling-gaanwomi nango luku dee kemeente?

• Un wini i sa feni te de ta ko luku di kemeente ka i dë?

Te wan hogi pasa a wan kamian, nöö wantewante Jehovah Kotoigi ta seeka soni u go heepi dee baaa ku sisa u de di di hogi dë miti. Dee möiti dee u ta mbei u heepi de ta lei taa u lobi u na u tuutuu (Johanisi 13:34, 35; 1 Johanisi 3:17, 18). Na un fasi u ta heepi de?

U ta da möni. Di wan gaan hangi bi dë a Judea, hën dee Keesitu sëmbë u Antiokia bi manda möni da dee baaa ku sisa u de di dë ku de a di wan seei biibi (Tjabukama 11:27-30). Sö nöö a dë taa te u jei taa fuka miti dee baaa ku sisa a so kamian u goonliba, nöö u ta buta möni a di möni këdë u di kemeente u manda da de. Söseei di kemeente ta manda soni da de di de abi taanga fanöudu a di ten dë.​—2 Kolenti 8:13-15.

U ta da de di heepi di de abi fanöudu. Dee gaanwomi dee dë ka di hogi pasa, ta suku ka hiniwan sëmbë u di kemeente dë u dë seiki taa hii de tuu dë ku libi, söseei taa soni an du de. Wan kulupu sëmbë ta seeka soni u da de njanjan, wata u bebe, soni u bisi, wan kamian u tan, söseei u da de data heepi. Sömëni Kotoigi di sa’ u du peipei soni dë kabakaba u go heepi, nöö de ta paka ku de eigi möni tu u go heepi dee baaa ku sisa u de. De ta heepi söseei u mbei wosu ku Könuköndë zali di booko. Di dë di u dë wan a di ölganisaasi fuu ku di sabi di u ko sabi soni u di u ta wooko makandi, ta heepi u u seeka soni hesihesi, söseei u seeka wan kulupu sëmbë u go heepi te wan hogi pasa a wan kamian. Hii fa u ta da wan maun u heepi dee „sëmbë dee dë a di wan seei biibi kuma u”, tökuseei u ta heepi woto sëmbë tu te u sa, aluwasi de dë u wan woto biibi.​—Galasia 6:10.

U ta da de kötöhati di kumutu u di Bëibel. Sëmbë di gaan hogi miti abi kötöhati fanöudu möön gaanfa. A dee ten dë, u ta kisi kaakiti u Jehovah, ’di Gadu ka hii kötöhati ta kumutu’ (2 Kolenti 1:3, 4). A ta da u piizii u konda dee paamusi dee sikifi a Bëibel da dee sëmbë dee aan saanfa-u-du te hogi miti de, nöö u ta mbei de ko sabi taa abiti möön di Könuköndë u Gadu o puu hii dee peipei hogi dee ta tja pen ku fuka ko.​—Akoalimbo 21:4.

• Faandi mbei dee Kotoigi ta seeka soni hesihesi u go heepi te wan gaan hogi pasa a wan kamian?

• Un kötöhati u sa da dee sëmbë dee hogi miti?

Sati bifö Jesosi dëdë, hën ku dee fö bakama fëën, Petuisi, Jakobosi, Johanisi ku Andiasi wanwan bi dë ta fan. Di Jesosi bi taki u di maaka di bi o lei taa a bi o toona ko baka a dee lasiti daka, hën a bi buta wan fanöudu hakisi taa: „Ambë da tuutuu di köni saafu di dë u futoou di hën masa buta u luku dee futuboi fëën faa sa da de njanjan a di soifi ten?” (Mateosi 24:3, 45, NW; Maikusi 13:3, 4). Jesosi bi mbei dee apösutu fëën dë seiki taa hën kuma de „masa” bi o buta sëmbë di bi o da dee bakama fëën njanjan nasö lei de soni u Bëibel nöömö a di pisiten u di kaba. Ambë bi o dë a di saafu aki dendu?

De da wan piki kulupu u tuutuu bakama u Jesosi di salufu ku santa jeje. Di „saafu” da di tii kulupu u Jehovah Kotoigi. De ta da dee woto dinima u Jehovah njanjan a di soifi ten. U abi di saafu aki fanöudu u ta da u „njanjan tjika a di soifi ten” nöömö.​—Lukasi 12:42, NW.

A ta sölugu dee sëmbë u di wosudendu u Gadu (1 Timoteo 3:15). Jesosi da di saafu aki di gaan faantiwöutu u luku di wooko u di pisi u di ölganisaasi u Gadu di dë a goonliba aki. De ta luku hii dee gudu u di ölganisaasi, de ta tii di peleikiwooko, söseei de ta da u lei a dee komakandi. Hën da „di köni saafu di dë u futoou” ta da u njanjan ku dee buku dee u ta du di peleikiwooko fuu, söseei ku dee lei dee u ta kisi a dee kemeente komakandi ku dee gaan komakandi. A sö wan fasi u ta feni andi u abi fanöudu a di soifi ten.

Di saafu aki dë u futoou u di a ta hoi ënseei a dee tuutuu lei u Bëibel ku hii hën hati, söseei a ta du di wooko di a kisi u paaja di bunu buka. Di saafu aki köni tu u di a ta du soni a wan köni fasi u luku dee soni u Keesitu di dë a goonliba (Tjabukama 10:42). Jehovah ta mbei di wooko aki waka bunu u di a ta mbei möön hia sëmbë ta ko dë kotoigi fëën, nöö a ta heepi di saafu faa sa lei sëmbë hia soni u Bëibel.​—Jesaaja 60:22; 65:13.

• Ambë Jesosi bi buta u ta da dee bakama fëën Bëibel lei?

• Faandi mbei u sa taki taa di saafu dë u futoou, nöö na un fasi a köni tu?

A di fosu jaahöndö wan piki kulupu sëmbë, „dee apösutu ku dee gaanwomi a Jelusalen” bi ta dini kuma di tii kulupu, nöö de bi ta buta dee fanöudu soni di hii dee salufu Keesitu sëmbë bi musu du (Tjabukama 15:2, NW). Te de bi ta fiti buka u du wan soni, nöö di soni di de bi o du dë bi ta kai ku Gadu Buku, söseei de bi ta mbei di santa jeje u Gadu tii de tu (Tjabukama 15:25). A di wan seei fasi nöö di Tii Kulupu ta wooko a di ten aki.

Gadu tei ën u du di kë fëën. Dee salufu baaa dee dë a di Tii Kulupu kë sabi andi di Wöutu u Gadu ta taki tuutuu. Nöö de sabi hia soni te a nama ku di fasi fa u musu du di wooko fuu, söseei de ta piki hakisi di nama ku di dini di u ta dini Gadu. De ta ko makandi hiniwan wiki u luku andi da dee soni di baaa ku sisa a hii goonliba abi fanöudu. Leti kumafa a bi dë a di fosu jaahöndö, sö nöö de ta da Bëibel lai u di de ta manda biifi nasö dee gaanwomi dee ta waka luku dee kemeente, söseei ku woto baaa tu. Di soni aki ta heepi u fuu ta pakisei di wan seei soni, söseei fuu ta du soni a di wan seei fasi (Tjabukama 16:4, 5). Di Tii Kulupu ta seeka hii soni u da Bëibel lei, söseei de ta da hii sëmbë degihati u si di peleikiwooko kuma di möön fanöudu wooko, nöö de buta baaa a di kemeente u tei fesi tu.

Di Tii Kulupu ta mbei di jeje u Gadu tii ën. Di Tii Kulupu ta suku di tii u Jehovah, di Kaba Heiwan u mundu ku Jesosi di dë Hedima u di kemeente (1 Kolenti 11:3; Efeise 5:23). De an ta si deseei kuma basi di abi taki a dee sëmbë u Gadu liba. Di Tii Kulupu makandi ku hii dee salufu Keesitu sëmbë, ’ta waka a di Sikapu Mii [Jesosi] baka a hiniwan kamian ka a nango’ (Akoalimbo 14:4). Di Tii Kulupu ta si ën kuma wan gaan soni seei taa u ta begi da de, söseei da di wooko di de ta du.

• Ambë bi dë a di tii kulupu u di fosu jaahöndö?

• Unfa di Tii Kulupu u di ten aki ta suku di tii u Jehovah?

Di Hebelejën wöutu Bëtëli kë taki „Wosu u Gadu” (Kenesesi 28:17, 19). Di në aki fiti dee wosu dee Jehovah kotoigi abi a hii goonliba, u di naandë de dë ta tii di peleikiwooko, söseei de dë kuma wan ahala da di peleikiwooko. Di Tii Kulupu ta wooko a di hedikantoo di dë na Amëëkanköndë a di foto New York, nöö naandë de ta dë ta tii di wooko di ta du a dee bëikantoo a sömëni köndë. Dee sëmbë dee ta wooko kuma wan kulupu a dee kamian dë, da sëmbë di wotowan sabi kuma sëmbë u di Bëtëli famii. De ta libi kuma wan famii a wan kamian, de ta wooko makandi, de ta njan makandi söseei de ta lei soni u Bëibel makandi tu.​—Psalöm 133:1.

Wan apaiti kamian ka sëmbë di ta libi kuma famii dë kabakaba u da deseei u wooko. A hii dee Bëtëli i abi womi ku mujëë di dë bakama u Keesitu, nöö de da deseei u du di kë u Gadu, söseei u du di wooko u di Könuköndë wanwan a de libi (Mateosi 6:33). Na wan u de ta kisi möni u dee wooko di de ta du, ma hii de tuu abi wan kamian u tan, söseei hii de tuu ta feni soni u njan. Ma de ta kisi wan piki möni u bai dee soni de abi fanöudu. Hiniwan sëmbë abi wan wooko u du, ee a kantoo, a boiwosu nasö a njanjanwosu. Wotowan ta wooko ka de ta doloki buku nasö ka de ta mbei buku, wotowan ta seeka kamba, wotowan ta wasi koosu, wotowan ta seeka soni u de an booko nasö de ta du woto soni.

Wan kamian ka sëmbë ta wooko taanga u heepi du di Könuköndë peleikiwooko. Di möön gaan maaka di hii Bëtëli wosu kë dou, hën da u mbei möiti u feni gaan hia sëmbë di de sa feni u ko sabi dee tuutuu lei u Bëibel. Di buku aki ta lei i taa sö a dë tuutuu. Di Tii Kulupu hën mbei taa di buku aki sikifi, hën de mandëën ku computer go da höndöhöndö kulupu sëmbë di ta puu buku ko a woto töngö a hii goonliba. Baka di dë, de bi doloki ën a masini di ta doloki buku hesihesi di dë a so u dee Bëtëli ka de ta doloki buku, hën de mandëën ku boto go a möön leki 110.000 kemeente. Hii dee wooko di dee Bëtëli famii ta du, ta heepi u u du di möön fanöudu wooko, di wooko u paaja di bunu buka.​—Maikusi 13:10.

• Ambë ta wooko a Bëtëli, nöö unfa de ta sölugu de?

• Un gaan wooko hii dee Bëtëli ta heepi u du?

Dee sëmbë u di Bëtëli famii ta wooko a dee peipei pisi u di bëikantoo. De ta heepi u mbei di peleikiwooko go a fesi a wan köndë nasö a möön hia köndë. So u de ta wooko a kamian ka de ta puu buku ko a woto töngö, wotowan ta wooko a kamian ka de ta doloki buku nasö ta mbei buku, wotowan ta wooko a buku makisin, wotowan möön ta wooko a kamian ka de ta mbei CD ku fëlön nasö ta du woto wooko a di köndë.

Wan Bëikantoo Komite ta luku di wooko di ta du a di köndë. Di Tii Kulupu buta di faantiwöutu u hii bëikantoo a wan Bëikantoo Komite maun dendu. Nöö di Bëikantoo Komite da wan kulupu u dii nasö möön hia gaanwomi di sabi soni. Di Bëikantoo Komite ta konda da di Tii Kulupu unfa di wooko ta waka a hiniwan köndë di de ta tii, nöö de ta mbei de sabi dee fuka di ta miti de tu. Dee lö buka dë di di Tii Kulupu ta kisi ta heepi de u sabi andi de musu sikifi a dee njunjun buku di de o mbei, söseei andi de musu taki a dee komakandi ku dee gaan komakandi. Di Tii Kulupu ta manda gaanwomi u tei kamian da de u go luku dee bëikantoo, söseei u da dee baaa u di Bëikantoo Komite lai u de sa du di wooko u de a wan möön bunu fasi.(Nöngö 11:14). Soni seti a wan apaiti fasi fa di baaa o ko dë, nöö wan taki seti di a o hoi u da dee sëmbë dee ta libi a di köndë ka di bëikantoo dë degihati.

A ta heepi dee kemeente u di köndë. Baaa di ta tei fesi a di bëikantoo ta taki ee de feni ën bunu ta njunjun kemeente sa hopo. Söseei dee baaa aki ta luku di wooko u dee pionili, sëndëlengi, ku dee keling gaanwomi di ta dini a di köndë ka di bëikantoo dë. De ta seti dee gaan komakandi, de ta tii di wooko te njunjun Könuköndë zali musu mbei, söseei de ta luku taa dee kemeente kisi dee buku di de abi fanöudu. Hii dee wooko di de ta du a di bëikantoo ta heepi di peleikiwooko u go a fesi.​—1 Kolenti 14:33, 40.

• Unfa dee Bëikantoo Komite ta heepi di Tii Kulupu?

• Un wooko de ta du a wan bëikantoo?

U di u kë mbei hii möiti u konda di „Bunu Buka” da „hii pei nasiön sëmbë, ku hii pei lö, ku hii pei föluku dee ta fan hii dee peipei töngö u goonliba”, mbei u ta mbei buku pasa 750 töngö (Akoalimbo 14:6). Unfa u ta du di gaan wooko aki? Wë wan kulupu u sikifima u peipei köndë ta heepi u, söseei sëmbë di ta puu buku ko a woto töngö ta heepi u tu. Hii dee sëmbë aki tuu da Jehovah Kotoigi.

Hii soni ta sikifi a Ingisitöngö fosu. Di Tii Kulupu ta luku di wooko di di Sikifi Kantoo ta du a di hedikantoo fuu. Di Sikifi Kantoo aki hën ta taki andi dee sikifima dee dë a di hedikantoo ku so u dee woto bëikantoo musu du. U di u abi wan kulupu sikifima u peipei lö, mbei de ta heepi u u sa sikifi peipei soni di sa abi kaakiti a hii pei lö sëmbë liba. Hën mbei hii pei lö sëmbë lo’ u lesi dee buku fuu.

De ta manda dee soni di de sikifi da dee sëmbë di ta puu buku ko a woto töngö. Te de feni taa hii soni sikifi bunu, nöö de ta mandëën ku computer go da dee kulupu u sëmbë di ta puu buku ko a woto töngö di dë a hii di goonliba. Nöö dee sëmbë dee ta puu buku ko a woto töngö, de ta luku ee hii soni sikifi bunu, söseei de ta lesi luku ee föutu an dë a dee soni di de puu ko a di töngö u de. De ta mbei möiti u puu dee „soifi wöutu u di tuu” di o tja di seei pakisei u di soni di sikifi a di Ingisitöngö ko a di töngö u de.​—Pleikima 12:10.

Computer ta mbei di wooko go möön hesi. Wan computer an sa du di wooko di wan sikifima ta du nasö di wooko di wan sëmbë di ta puu buku ko a woto töngö ta du. Ma di computer sa heepi de u mbei di wooko de ta du go möön hesi. Jehovah Kotoigi mbei wan soni di de ta kai MEPS (Multilanguage Electronic Publishing System), nöö nëën de ta sikifi soni buta a höndöhöndö töngö. Söseei de ta seti hii dee soni di de sikifi ku dee peentje nasö footoo u de sö taa de dë kabakaba u de sa doloki de.

Faandi mbei u ta mbei hii dee möiti aki, söseei da wan töngö di wan piki kulupu sëmbë nöö ta fan? Wë u di Jehovah kë taa „hii sëmbë u goonliba tuu musu feni libi u teego nëën. A kë fu hii sëmbë musu ko sabi dee soni fëën, biga de nöö da tuutuu soni a mundu”.​—1 Timoteo 2:3, 4.

• Andi ku andi de ta du u sikifi dee buku fuu?

• Faandi mbei u ta puu dee buku fuu ko a sömëni töngö?

Di ölganisaasi fuu ta mbei milionmilion Bëibel ku woto buku hiniwan jaa, söseei a ta paati de söndö u hakisi möni u de. U ta mbei Könuköndë zali ku bëikantoo, nöö u ta seeka de hii juu u de an booko. U ta heepi dusudusu sëmbë u Bëtëli ku sëndëlengi, söseei u ta heepi dee sëmbë di gaan fuka ta miti tu. Sonte i sa hakisi iseei: ’Naasë de ta feni möni u ta du hii dee soni aki?’

Wa ta musu sëmbë u buta möni, nöö wa ta pii möni a sëmbë tu. Hii fa dee paima u ta mbei u du di peleikiwooko hia, tökuseei wa ta pidi sëmbë möni. Söwan höndö jaa pasa nöö a di u tu Hei Wakitimawosu di bi ko a döö, a bi sikifi taa u ta biibi taa Jehovah da di sëmbë di ta heepi u, nöö hën mbei „nöiti woo hakisi nasö begi sëmbë u heepi u ku di wooko aki.” Nöö wa du ën nöiti tu!​—Mateosi 10:8.

Möni di sëmbë ta da ku hii de hati ta heepi u u du di wooko fuu. Sömëni sëmbë ta si di wooko di u ta du u lei sëmbë soni u Bëibel kuma wan gaan soni, nöö de ta da möni u heepi u ku di wooko. Ku piizii dee Jehovah Kotoigi dë kabakaba u da de ten, de kaakiti, de möni ku woto soni u du di kë u Gadu a hii di goonliba (1 Kloniki 29:9). Möni këdë dë a di Könuköndë zali ku te u abi gaan komakandi, ka sëmbë sa buta möni te de kë nasö i sa go a di website fuu jw.org ee i kë da möni. Gaansë u dee möni di u ta kisi ta ko u sëmbë di an gudu, sëmbë di dë kuma di pena mujëë di manu fëën bi dëdë, di Jesosi bi taki bunu fëën taa a bi buta tu köpö sensi a di möni këdë u di Wosu u Gadu (Lukasi 21:1-4). Hën da hii juu hiniwan sëmbë sa ’buta möni a wan së’ faa sa da „ku wai nëën hati”.​—1 Kolenti 16:2; 2 Kolenti 9:7.

U dë seiki taa Jehovah o jabi dee hati u dee sëmbë dee kë ’bigi ën ku dee gudu u de’ u heepi di Könuköndë wooko go a fesi sö taa di kë fëën sa pasa.​—Nöngö 3:9.

• Andi ta mbei taa di ölganisaasi fuu tooka ku dee woto keiki?

• Andi de ta du ku dee möni di sëmbë ta da ku hii de hati?

Di në Könuköndë zali ta lei u taa di lei di u ta kisi te u nango a zali, da di möön fanöudu lei u di Bëibel di ta taki u di Könuköndë u Gadu. Di dë bi dë di möön fanöudu soni faandi Jesosi bi ta taki a di diniwooko fëën.​—Lukasi 8:1.

De dë kamian a di pisiwata dë ka sëmbë ta dini di tuutuu Gadu. A di kamian dë de ta tei seeka u go paaja di bunu buka u di Könuköndë (Mateosi 24:14). Dee Könuköndë zali ta tooka u di bigi u de ku di fasi fa de mbei. Ma na wan u de dë ku wanlö soni di an dë fanöudu, nöö sömëni kemeente sa hoi dee komakandi u de a di wan seei zali. A dee jaa di pasa, u mbei dusudusu njunjun Könuköndë zali (söwan feifi zali ta mbei hiniwan daka) sö taa kamian sa dë tjika dee hia peleikima di ta ko ku dee hia kemeente di ta hopo. Unfa de ta du mbei dee hia Könuköndë zali dë?​—Mateosi 19:26.

De ta mbei de ku dee möni sëmbë ta da. De ta manda dee möni aki da di bëikantoo faa sa da kemeente di kë mbei njunjun zali nasö di kë mbei di zali u de ko wan woto fasi.

Hii pei sëmbë di kë heepi söndö u kisi paka ta mbei dee zali aki. A sömëni köndë de seti Kulupu u mbei Könuköndë zali. Sömëni kulupu u sëmbë di seti buta u ta mbei Könuköndë zali ku sëmbë di dë kabakaba u heepi, nango a sömëni kemeente baka-na-baka u wan köndë. Söseei de nango a gaan longi kamian u heepi dee kemeente a dee pisiwata dë u mbei dee Könuköndë zali u de. A woto köndë, de buta Kotoigi di sabi di wooko u mbei nasö u seeka Könukönde zali baka. Baaa di sabi di wooko ta da de seei u wooko. A hii zali di de ta mbei, sëmbë u di kemeente ta dë möön hia u da deseei u du di wooko. Di santa jeje u Jehovah ku di möiti di dee sëmbë fëën ta mbei ku hii de hati, ta mbei de sa du hii dee soni aki.​—Psalöm 127:1; Kolosën 3:23.

• Faandi mbei u ta kai dee kamian ka u ta dini Gadu, Könuköndë zali?

• Unfa a du ko taa u sa ta mbei Könuköndë zali a hii së u di goonliba?

Hiniwan Könuköndë zali u Jehovah Kotoigi ta tja di santa në u Gadu. Fëën mbei u ta si ën kuma wan gaandi, söseei kuma wan fanöudu pisi u di dini u ta dini Gadu u heepi seeka di zali faa sa tan limbolimbo, faa sa fiti wojo, söseei u seeka soni nëën di booko. Hiniwan sëmbë sa da wan maun u heepi.

Heepi seeka di zali baka komakandi faa sa dë limbolimbo gbegedee. Baka hiniwan komakandi, baaa ku sisa ta dë waiwai u seeka di Könuköndë zali faa sa dë limbolimbo gbegedee. Wan pasi a di wiki, u ta seeka di zali möön fini. Wan gaanwomi nasö wan dinai ta tii di wooko, nöö de guwenti u luku a pampia liba andi ku andi musu du. Te a dë fanöudu, nöö sëmbë ta dë kabakaba u heepi bai di zali, u duweli ën, u feki dee sutuu, söseei u seti de buta baka. Boiti di dë de ta seeka dee weesei kamian, ta feki dee fënsë gaasi ku dee sipei, ta tuwë dee sundju u dee sundju baki, nöö de ta wasi di wosu sinkii, söseei de ta seeka di djai tu. Wan pasi a wan jaa u ta seeka hii soni a di zali. Te u ta mbei dee mii fuu ta du so wooko tu, nöö sö u ta lei de u abi lesipeki da di kamian ka u ta dini Gadu.​—Peleikima 5:1.

Da wan maun u heepi mbei dee soni di booko. Hiniwan jaa de ta luku finifini unfa di Könuköndë zali dë, a dendu ku döösë fëën tuu. Te de si taa soni musu seeka a di zali, nöö de ta seeka de sö taa di zali tan bunu. A sö wan fasi de an ta tuwë möni a soni di an dë fanöudu (2 Kloniki 24:13; 34:10). Wan Könuköndë zali di dë limbolimbo ku di dë seekaseeka da wan kamian di fiti u dini di Gadu fuu. Te u ta heepi u du di wooko aki, nöö u ta lei taa u lobi Jehovah, söseei taa u ta lesipeki di kamian ka u ta dini Gadu (Psalöm 122:1). Disi ta mbei sëmbë u di pisiwata ka di zali dë, ta taki bunu fuu.​—2 Kolenti 6:3.

• Faandi mbei wa musu malëngë u seeka di kamian ka u ta dini Gadu?

• Andi seti u heepi u u hoi di Könuköndë zali limbolimbo gbegedee?

Ja bi o kë öndösuku so soni u ko sabi dee lei u Bëibel möön bunu ö? I bi o kë ko fusutan wan tëkisi nasö sabi wan sëmbë, wan kamian, naa wan soni di sikifi a Bëibel ö? Nasö i ta hakisi iseei ee di Wöutu u Gadu sa heepi i ku wan bookohedi di i abi? Wë nöö go a di bukukasi u di Könuköndë zali.

A abi sömëni soni u heepi u u öndösuku soni möön bunu. A sa dë sö taa ja abi hii dee buku u Jehovah Kotoigi a di töngö di i ta fan. Ma di bukukasi u di Könuköndë zali abi dee möön njunjun buku di ko a döö. Söseei a sa abi peipei Bëibel di puu ko a peipei töngö, söseei wan bunu wöutubuku ku woto buku u öndösuku soni. Ufö di komakandi bigi nasö baka di komakandi, i sa go öndösuku soni nasö lesi wan buku a di bukukamba te i kë. Ee wan computer dë a di bukukamba, nöö a sa dë sö taa de buta di Watchtower Library nëën. A dë wan seti a di computer ka de buta hii dee buku fuu ko a wan, nöö di dë ta mbei taa an ta taanga u öndösuku wan woto, wan wöutu nasö wan Bëibel tëkisi di i bi o kë ko sabi.

A dë wan heepi da sëmbë di ta tei paati a di libi ku di diniwooko komakandi. I sa go öndösuku soni a di bukukasi u di Könuköndë zali te i ta seeka iseei da wan taki di i abi. Di libi ku di diniwooko komakandi gaanwomi hën abi di faantiwöutu u di bukukasi. A abi di faantiwöutu tu u buta dee njunjun buku di ko a döö a di bukukasi, söseei u seti de buta bunu tu. Hën nasö di sëmbë di ta lei i soni u Bëibel sa lei i fa i sa feni dee soni di i abi fanöudu. Ma na wan sëmbë musu tei buku puu a di bukukasi tja go. Nöö sö a dë tu taa wa kë poi dee buku, söseei wa kë maaka a dee buku nasö sikifi a de tu.

Di Bëibel ta konda taa ee u kë „ko sabi Gadu tuutuu”, nöö u musu kë suku ën kumafa sëmbë ta „suku gudu di dë tjubitjubi” (Nöngö 2:1-5). Di bukukasi u di Könuköndë zali sa heepi i fii sa bigi suku dee soni di i kë ko sabi.

• Andi dë a di bukukasi u di Könuköndë zali di sa heepi u u öndösuku soni?

• Ambë sa lei i fa i sa öndösuku soni a wan bunu fasi a di bukukasi?

Jesosi Keesitu bi taki da dee bakama fëën taa: „[Di libi fuunu] musu dë gbegedee kuma wan faja limbo. Nöö sëmbë o ko si dee bunu soni un ta du, nöö de o ta gafa di Tata fuunu di dë a liba ala” (Mateosi 5:16). U di u kë dou di maaka dë, mbei u ta wooko ku soni di könima mbei, soni kuma di Internet. Di website fuu jw.org, da di kamian a di Internet ka i sa go u ko sabi soni u di biibi u dee Jehovah Kotoigi ku dee wooko di de ta du. Andi i sa feni a di website fuu?

Dee piki di Bëibel ta da u dee hakisi di sëmbë guwenti u buta. I sa feni dee piki u so u dee möön fanöudu hakisi di sëmbë bi buta kaa. Di talakitaati Pena ku fuka o kaba wan daka u?, ku di talaktaati Dëdë sëmbë sa toona libi baka tuutuu ö? dë u feni a di website fuu a Internet a möön leki 600 töngö. I sa feni söseei di Nyun-Grontapuvertaling di dë a möön leki 130 töngö ku wanlö buku di sa heepi i u fusutan di Bëibel, buku kuma Andi di Bëibel ta lei u tuutuu?, söseei dee njunjun Hei Wakitimawosu ku dee Ontwaakt! I sa lesi sömëni u dee buku aki nasö i sa haika de a di website fuu, söseei i sa download de a MP3, PDF naso EPUB tei. I sa doloki soni puu a di website fuu a di töngö di i ta taki u lei sëmbë di kë ko sabi möön soni u Bëibel! Buku fuu di buta a video da tapabukama dë u feni a sömëni töngö tu. I sa puu woto soni kuma Bëibel woto di de lesi, woto u Bëibel di de pëë kuma fëlön, ku suti poku seei di i sa haika.

Tuutuu woto di nama ku Jehovah Kotoigi. Söseei i sa feni dee möön lasiti njunsu ku fëlön u di wooko fuu di ta du a hii goonliba. Boiti di dë i sa feni soni di miti Jehovah Kotoigi ku soni di de ta du u heepi wotowan te wan gaan hogi pasa. I sa feni söseei soni u di dii-daka komakandi di musu hoi jeti, nöö i sa feni tëlëfön nöbu u di bëikantoo nasö di kamian ka a dë.

Ku hii dee soni di u kai aki u ta mbei di tuutuu lei tuwë di faja limbo fëën go tee a dee möön longi kamian u goonliba. Sëmbë u hii kamian u goonliba, te dou sëmbë u Antaatika seei ta feni wini u dee soni aki. U ta begi taa „di Buka u Masa [Jehovah] musu paaja seei waaa go a hii kamian” u goonliba sö taa Gadu kisi gafa.​—2 Tesalonika 3:1.

• Unfa di website u Jehovah Kotoigi jw.org ta heepi möön hia sëmbë u ko sabi di tuutuu lei u Bëibel?

• Andi i bi o kë go suku a di website fuu?