Sömëni sëmbë an nango a keiki möön u di de an ta feni piki u dee hakisi di de kë ko sabi, söseei u di de an ta feni di kötöhati di de abi fanöudu. Faandi mbei a bi o bunu u go a dee komakandi di Jehovah kotoigi ta hoi? Andi joo feni a dee komakandi?

Joo feni di piizii u dë makandi ku sëmbë di lobi wotowan ku di ta booko de hedi ku wotowan. A di fosu jaahöndö, kemeente u Keesitu sëmbë bi seti, nöö de bi ta hoi komakandi u dini Gadu, u lei soni u di Bëibel, söseei u da deseei taanga (Hebelejën 10:24, 25). Te de bi ta ko makandi ku baaa ku sisa di lobi de, nöö de bi ta fii taa de bi dë a tuutuu mati dendu (2 Tesalonika 1:3; 3 Johanisi 14). Wë u ta libi a di seei fasi fa dee fosu Keesitu sëmbë bi ta libi, söseei u ta fii di piizii di de bi ta fii tu.

Joo feni wini u di joo ko sabi fa i sa fiti dee lai u Bëibel a i libi. Leti kumafa a bi dë a Bëibel ten, nöö womi ku mujëë ku mii tuu bi ta ko makandi. Baaa di sa’ u da bunu lei u di Bëibel, ta heepi u fuu si fa u sa fiti dee lai u Bëibel a di hii daka libi fuu (Detolonomi 31:12; Nehemia 8:8). Hii sëmbë sa da piki a dee komakandi, söseei hii sëmbë sa kanda tu, u di di dë ta heepi u u lei wotowan di houpu di u kuma Keesitu sëmbë abi.​—Hebelejën 10:23.

Di biibi di i ta biibi Gadu o ko möön taanga. Apösutu Paulosu bi taki da wan u dee kemeente a di ten fëën taa: „Mi hangi u si unu gaanfa seei, . . . fu mi ku unu tuu musu miti fuu da u seei taanga, fa u ta biibi Gadu makandi aki” (Loomë 1:11, 12). Di miti di u ta miti hii juu ku dee woto baaa ku sisa fuu te u nango a dee komakandi, ta taanga di biibi fuu, söseei a ta heepi u u dë kabakaba u libi ku dee wëti u Bëibel.

Ja bi o kë ko a di komakandi fuu di o hoi wan u dee daka aki ö? Woo wai ku i seei te i ko. Ja a’ fu paka u ko a dee komakandi aki, nöö wa ta pii möni a sëmbë tu.

• Kuma ambë u ta hoi dee kemeente komakandi fuu?

• Un wini woo feni te u nango a dee kemeente komakandi?

Aluwasi u musu waka pasa a matu kamian nasö waka a tjuba dendu so juu, tökuseei u nango hii juu a dee kemeente komakandi. Jehovah Kotoigi seei abi booko hedi a di libi, söseei de ta wei te de kumutu a wooko. Ma faandi mbei de ta mbei taanga möiti sö u ko komakandi tökuseei ku dee woto baaa ku sisa u de?

A ta tja bunu ko da u. Di Paulosu bi sikifi taa ’un boo buta mëni a u seei’, nöö a bi ta taki u dee baaa ku sisa dee ta ko makandi ku u a di kemeente (Hebelejën 10:24). Dee wöutu aki kë taki taa „u musu mbei möiti” u ko sabi wotowan möön bunu. Fëën mbei dee wöutu u di apösutu ta da u degihati u buta pakisei a wotowan. Te u ta ko sabi sëmbë u woto wosudendu di dë bakama u Keesitu, nöö woo ko sabi fa de bi pasa dee seei fuka dee ta miti u tu. Nöö de sa heepi u u pasa dee fuka dë tu.

A ta mbei di matifasi fuu ku wotowan ko möön taanga. Dee baaa ku sisa dee u ta ko makandi ku de, an dë guwentima fuu nöö, ma de dë gaan mati fuu tu. Söseei u ta tei ten u mbei piizii makandi ku de, piizii di fiti. Un bunu a ta tja ko da u te u ta ko makandi ku wotowan? U ta ko si taa u abi useei tuutuu fanöudu, nöö di dë ta mbei di lobi di u lobi useei ko möön taanga. Fëën mbei te fuka miti wan baaa nasö wan sisa fuu, u ta dë kabakaba u heepi makandi u di u ku de da gaan mati (Nöngö 17:17). Te u ta ko nama ku hii sëmbë u di kemeente, nöö u ta lei taa u ’ta sölugu u na u makandi’.​—1 Kolenti 12:25, 26.

Tei sëmbë di ta du di kë u Gadu ko i mati. I sa feni Jehovah Kotoigi kuma dee mati dë. Na mbei na wan soni tapa i u hai ko nama ku u.

• Faandi mbei a ta tja bunu ko da u te u ta ko makandi ku woto baaa ku sisa a dee kemeente komakandi?

• Na un ten i bi o kë ko makandi ku u u ko sabi dee Kotoigi u di kemeente fuu möön bunu?

A dee fosu kemeente, Keesitu sëmbë bi ta kanda, ta begi, ta lesi di Bëibel, söseei de bi ta taki fëën makandi tu (1 Kolenti 14:26). Di wan seei fasi fa soni bi seti a dee kemeente u fosuten, sö nöö soni seti a dee kemeente u di ten aki tu.

Dee soni u ta lei kumutu a Bëibel, nöö de ta heepi u te u ta wooko ku de. Hiniwan sata nasö sonde hii sëmbë u dee kemeente ta ko makandi u haika wan Bëibel-taki di ta hoi a 30 miniti dendu. Di taki aki ta heepi u fuu si fa u musu libi, söseei a ta lei u na un ten u ta libi. Hii sëmbë ta kisi degihati u lesi tëkisi a de Bëibel te di taki ta hoi. Baka di taki aki, nöö i abi di Hei Wakitimawosu-lei di ta hoi wan juu longi, nöö hii sëmbë u di komakandi ta kisi di okasi u da wan piki a di pisi di woo luku a di Hei Wakitimawosu-lei. Di takimakandi u di Hei Wakitimawosu-lei ta heepi u u mbei di Bëibel tii u libi. Di wan seei soni u ta lei a dee möön leki 110.000 kemeente a hii goonliba.

U ta kisi lei fuu sa lei sëmbë soni möön bunu. U abi wan komakandi a mindi wiki tu di paati a dii pisi di u ta kai Di libi ku di diniwooko fuu kuma Keesitu sëmbë. U ta hoi di komakandi aki ku dee soni dee sikifi a Di libi ku di diniwooko fuu komakandi-buku, di u ta feni hiniwan liba. Di fosu pisi u di komakandi de kai „Dee gudu dee dë a di Wöutu u Gadu” ta heepi u fuu ko sabi wan pisi u di Bëibel möön bunu, di hii di kemeente bi musu lesi a fesi. Di u tu pisi „Mbei möiti u ko toon wan möön bunu peleikima” abi demo di ta lei unfa u sa konda soni u di Bëibel da wotowan. Di baaa di ta da lai ta taki soni di sa heepi u fuu sa’ u lesi möön bunu, söseei fuu sa fan möön bunu (1Timoteo 4:13). Di lasiti pisi „Di libi fuu kuma Keesitu sëmbë” ta lei u unfa u sa wooko ku dee mama wëti u Bëibel a u libi. A abi wan pisi tu ka de ta buta hakisi, nöö u musu da piki. A sö wan fasi u ta fusutan di Bëibel möön bunu.

Te i ko a dee komakandi fuu, joo foondo seei u si fa joo kisi bunu lei di kumutu a di Bëibel.​—Jesaaja 54:13.

• Andi i ta pakisei taa i sa jei a dee komakandi u Jehovah Kotoigi?

• Na undi u dee komakandi di u ta hoi hiniwan wiki i bi o kë ko?

I si fa dee footoo u di buku aki ta lei fa Jehovah Kotoigi ta bisi hanse te de nango a dee kemeente komakandi u de u? Faandi mbei u ta luku bunu ku di fasi fa u ta bisi ku di fasi fa u ta seeka useei?

U ta lei taa u ta lesipeki di Gadu fuu. A dë sö tuu taa Gadu an ta luku fa wan sëmbë dë a döösë nöö (1 Samuëli 16:7). Ma te u ta ko makandi u dini Gadu, nöö u kë söi lesipeki ku hii u hati dëën, söseei da dee baaa ku sisa fuu a di biibi. Ee a bi dë sö taa u bi musu go a wan gaama nasö wan tiima u wan köndë, nöö u bi o bisi a wan fasi di ta lei taa u abi lesipeki da di sëmbë dë u di a dë wan heihei sëmbë. Sö nöö a dë taa te u ta bisi koosu di fiti te u nango a dee komakandi fuu, nöö u ta söi taa u abi gaan lesipeki da Jehovah Gadu, „di kaba Tiima u mundu fu nöömö”, söseei da di kamian ka u nango dini ën.​—1 Timoteo 1:17.

U lei taa dee wëti dee u ta hoi, dë tumisi fanöudu. Di Bëibel ta da Keesitu sëmbë degihati u bisi „a wan lesipeki fasi ku di ta lei taa de dë ku limbolimbo fusutan” kuma sëmbë di ta „dini Gadu” (1 Timoteo 2:9, 10, NW). Te u ta bisi „a wan lesipeki fasi”, hën da wa o ta bisi soni u hai sëmbë pakisei nasö di ta puu u sinkii ko a döö. Söseei te u dë ku „limbolimbo fusutan”, nöö a ta heepi u u bisi soni a wan fasi di fiti a sëmbë wojo. Dee Bëibel lai aki an ta tapa sëmbë u bisi soni di deseei kë. Di hanse fasi fa u ta bisi ku di fasi fa u ta seeka useei, sa mbei sëmbë ’gafa di lei u di Heepima fuu’, söseei a sa mbei sëmbë „gafa Masa Gadu”, söndö fuu taki wan soni (Titusi 2:10; 1 Petuisi 2:12). Te u ta bisi hanse te u nango a dee komakandi, nöö woo mbei wotowan si taa di dini di u ta dini Jehovah da wan bumbuu soni.

Ee i feni taa ja a’ soni u bisi go a keiki, tökuseei na mbei di dë tapa i taa ja nango a dee komakandi a di Könuköndë zali. Aan fu dë diidii bisi. Solanga dee bisi fuu limbo ku de fiti, nöö u sa bisi de go a zali.

• Faandi mbei a dë fanöudu u bisi soni a wan fasi di fiti te u ta dini Gadu?

• Un Bëibel lai sa heepi u u bisi a wan fasi di fiti, söseei u seeka useei a wan bunu fasi?

Ee i ta lei soni u di Bëibel ku wan Jehovah Kotoigi, nöö i bi o kë seeka iseei a fesi bifö a ko lei i. Ee u kë feni gaan wini u dee komakandi, a bi o bunu u seeka useei a fesi ufö u go a dee komakandi. U ta feni möön wini te u tei ën kuma wan guwenti u ta seeka useei da dee komakandi.

Buta di juu ku di kamian ka joo lei soni u Bëibel. Un ten möön bunu da i u buta hii i pakisei a soni di i kë lei? Mamate fuuku ufö i go a wooko naa ndeti te dee mii fii go duumi? Aluwasi ja sa lei soni longi seei, tökuseei luku un mëni ten i sa buta a wan së u lei soni, nöö na mbei na wan soni ko poi di ten i buta dë. Suku wan pii kamian, nöö tapa hii soni di sa puu i pakisei, soni kuma ladio, teefei nasö tëlëfön. Te i ta begi ufö i lei soni a Bëibel, nöö di dë o heepi i u puu dee booko hedi u di daka dë sö taa i sa buta hii pakisei fii a di Wöutu u Gadu.​—Filipi 4:6, 7.

Maaka dee soni di i bi o kë taki, nöö seeka iseei u da piki. Suku u fusutan andi di woto kë lei i. Pakisei u di në u di woto, buta mëni unfa hiniwan hedipakisei fiti ku di në u di woto, söseei luku dee footoo nasö dee peentje finifini, nöö luku dee hakisi baka dee ta tja dee möön fanöudu lei ko a limbo. Baka di dë, lesi hiniwan u dee palaglaaf, nöö suku di piki u hiniwan u dee hakisi u dee palaglaaf. Suku dee Bëibel tëkisi dee sikifi, nöö lesi de. Pakisei unfa de ta heepi i u fusutan di woto möön bunu (Tjabukama 17:11). Te i feni dee piki kaa, nöö maaka de sö taa ja fëëkëtë de. Nöö te i dë a di komakandi, nöö i sa tëndë i maun go a liba u da wan sati piki kumafa i fusutëën.

Te i ta öndösuku dee peipei soni dee i ta lei hii wiki a dee komakandi, nöö joo ko sabi njunjun soni u di Bëibel, nöö a o dë kuma i ta lai möön gudu a di ’gudu kamba’ fii di lai ku Bëibel gudu.​—Mateosi 13:51, 52.

• Un guwenti i sa tei u seeka iseei da dee komakandi?

• Unfa i sa seeka iseei u da piki a dee komakandi?

Sensi awooten Jehovah bi kë taa hii wosudendu bi musu tei ten u dë makandi u taanga di matifasi u de ku ën, söseei u taanga di matifasi u de na de (Detolonomi 6:6, 7). Fëën mbei hibiwan Jehovah Kotoigi wosudendu seti wan ten buta taa hibi wiki de ta hoi di Wosudendu Dini u de. A di dini dë de ta sindo makandi ta taki u soni di de abi fanöudu u mbei di matifasi u de ku Jehovah ko möön taanga, nöö de ta du ën a wan piizii fasi. Aluwasi i dë ju wanwan, tökuseei i sa tei di ten naandë u ko möön zuntu ku Gadu u di joo lei wan soni u Bëibel di i kë ko sabi.

A dë wan ten di o mbei u ko möön zuntu ku Jehovah. „Ko zuntu u Gadu, nöö a o ko zuntu fii tu” (Jakobosi 4:8, NW). U ta ko sabi Jehovah möön bunu te u ta lei finifini andi da dee fasi fëën, ku dee soni di a ta du, dee sikifi a di Wöutu fëën, di Bëibel. Wan fasi fa i ku i wosudendu sa hoi di Wosudendu Dini, da te un ta tei ten u lesi di Bëibel makandi. Kandë un sa lesi dee pisi u di Bëibel di u musu lesi da di lesi pisi u Bëibel a di libi ku di diniwooko komakandi makandi. Hiniwan sëmbë u di wosudendu sa kisi wan pisi u lesi, nöö baka di dë hiniwan u de sa taki andi de lei u di pisi dë.

A dë wan ten di ta mbei dee sëmbë u wan wosudendu ko möön zuntu ku deseei. Te manu ku mujëë, söseei miii ku dee gaan sëmbë u de ta lei soni u Bëibel makandi, nöö de ta ko möön zuntu ku deseei. A musu dë wan piizii ten ka hii sëmbë u di wosudendu ta feni kötöhati a di wiki. Mama ku tata sa tei soni u dee Di Hei Wakitimawosu nasö u dee Ontwaakt! söseei a di website fuu jw.org di fiti ku di jaa u dee mii u de u taki makandi ku de. Un sa taki u wan fuka di dee mii ta miti a siköö ku andi de musu du u pasa di fuka dë. Faandi mbei wan ta luku JW Broadcast (tv.jw.org) makandi nöö u taki andi un lei? Kandë un sa feni ën wan piizii soni u kanda makandi dee kanda di woo kanda a dee komakandi u di wiki dë. Söseei a bi o dë wan piizii soni tu u njan nasö bebe wan soni baka di Wosudendu Dini.

Di ten di u ta tei buta apaiti hiniwan wiki u dini Jehovah makandi ku u wosudendu, o heepi hii sëmbë u ko feni ën wan piizii soni u lei soni u di Wöutu u Gadu. Nöö Gadu o mbei un feni gaan bunu seei u di möiti di un ta mbei.​—Psalöm 1:1-3.

• Faandi mbei u ta buta ten a wan së da di Wosudendu Dini?

• Unfa mama ku tata sa mbei di Wosudendu Dini dë wan piizii soni da hii sëmbë?

Faandi mbei dee sëmbë aki dë waiwai sö? De dë a wan u dee gaan komakandi fuu. Leti kumafa dee dinima u Gadu u awooten bi ta ko makandi dii pasi a wan jaa, sö nöö u kuma dinima u di ten aki ta wakiti hibi jaa u ko makandi ku gaan hia baaa ku sisa (Detolonomi 16:16). Hibi jaa u abi dii gaan komakandi: tu wan-daka komakandi, ku wan dii-daka komakandi. Un wini u ta feni u dee gaan komakandi aki?

De ta taanga di matifasi di u abi kuma baaa ku sisa. Leti kumafa dee Isaëli sëmbë bi ta piizii u gafa Jehovah te de bi dë „a dee gaan komakandi”, sö nöö useei ta piizii tu u dini Gadu makandi a dee gaan komakandi. (Psalöm 26:12; 111:1). Dee komakandi aki ta mbei u ta miti ku Kotoigi u woto kemeente nasö u woto köndë seei. Nöö a sonuati juu, u ta piizii u njan makandi, nöö di dë ta mbei taa dee komakandi ta möön suti seei (Tjabukama 2:42). A dee gaan komakandi aki u ta fii di lobi di mbei „hii dee baaa [ku dee sisa]” ko dë wan a hii di goonliba.​—1 Petuisi 2:17, NW.

De ta heepi u u go a fesi a di dini u Gadu. Dee Isaëli sëmbë seei bi ta feni wini u di de bi ta „fusutan dee soni” u di Bëibel di de bi ta konda da de (Nehemia 8:8, 12). U seei ta lei taa dee soni u di Bëibel di de ta konda da u a dee gaan komakandi, dë gaan bumbuu soni seei. Di në u hii dee komakandi aki, kumutu a Bëibel. U ta lei unfa u sa du di kë u Gadu a u libi a dee waiti taki di ta hoi ku dee taki di paati a un mëni pisi, söseei a dee pëë di de ta pëë u lei u fa wan woto bi pasa. U ta kisi degihati te u ta jei dee woto u sëmbë di hoi dou hii fa de bi miti fuka, u di de ta libi kuma Keesitu sëmbë a dee taanga ten aki. A di dii-daka komakandi de ta pëë Bëibel woto ku awooten bisi di ta tja dee woto dë ko a limbo da u, nöö de ta lei u bunu soni di u sa fiti a u libi dendu. A hii dee gaan komakandi, soni seti taa sëmbë di kë tei dopu u lei taa de buta de libi a Gadu maun, sa tei dopu.

• Faandi mbei dee gaan komakandi ta dë piizii ten da u?

• Un wini i sa feni te i go a wan gaan komakandi?

Ufö Jesosi bi dëdë, a bi taa: „Di bunu buka u di Njunjun Tii u Gadu [Könuköndë, NW] musu paaja te dou hii goonliba e, be hii föluku musu jei. Nöö baka u di dë ufö di ten u dë aki o kaba” (Mateosi 24:14). Ma unfa di peleikiwooko aki bi o du dou a hii goonliba? Wë te u bi o du di wooko kumafa Jesosi bi du ën di a bi dë a goonliba aki.​—Lukasi 8:1.

U ta mbei möiti u miti sëmbë a de wosu. Jesosi bi lei dee bakama fëën fa de bi musu paaja di bunu buka a hii wosu (Mateosi 10:11-13; Tjabukama 5:42; 20:20). Dee peleikima u di fosu jaahöndö bi kisi wanlö kamian ka de bi musu peleiki (Mateosi 10:5, 6; 2 Kolenti 10:13). Sö nöö di peleikiwooko di u ta du seti a wan bunu fasi a di ten aki, nöö hiniwan kemeente kisi wan kamian ka de musu peleiki. Disi ta heepi u u du di wooko di Jesosi bi manda u u „peleiki da sëmbë, söseei u konda soni da de finifini.”​—Tjabukama 10:42, NW.

U ta mbei taanga möiti u miti sëmbë a hii kamian teka u sa miti de. Jesosi seei bi lei u fa u sa peleiki a kamian ka hia sëmbë dë, u di a bi ta peleiki a kamian kuma ze bandja nasö a baaku wata bandja ka hia sëmbë bi ta ko ba wata (Maikusi 4:1; Johanisi 4:5-15). U seei ta fan ku sëmbë u di Bëibel a hii kamian ka u sa miti de. U ta fan ku de a sitaati, a kamian ka de ta sei soni, a kamian ka sëmbë nango ta waka ta köi, söseei u ta fan ku de a tëlëfön. U ta peleiki da sëmbë di ta libi a u bandja tu, sëmbë di u ku de ta wooko a di wan kamian, sëmbë di u ku de ta sindo a di wan kalasi, söseei da famii fuu. Te u feni wan bunu okasi u fan ku de, nöö u ta fan ku de. Hii dee möiti di u ta mbei u peleiki, ta mbei milionmilion sëmbë a hii goonliba ko jei ’di bunu buka di o tja tjubi ko da sëmbë’.​—Psalöm 96:2.

I abi wan sëmbë a pakisei di i bi o kë konda di bunu njunsu u di könuköndë u Gadu da u, sö taa a sa tja bunu ko dëën a di ten di ta ko u? Na hoi di bunu njunsu aki da i wanwan. Na biabia u kondëën da wotowan tu!

• Un „bunu buka” u musu paaja da wotowan?

• Unfa Jehovah Kotoigi ta du di peleikiwooko kumafa Jesosi bi ta du ën?

So juu di wöutu „pionili” kë taki sëmbë di nango luku kamian ka wotowan an dou jeti, nöö di ta jabi pasi da wotowan u de waka a de baka. Jesosi bi dë kuma wan pionili, u di Gadu bi mandëën ko a goonliba u du di peleikiwooko di sa mbei sëmbë feni teego libi, söseei u jabi pasi da sëmbë u de feni di tjubi u Gadu (Mateosi 20:28). A di ten aki, dee bakama u Jesosi ta waka nëën baka u di de ta da hii di ten di de sa da u mbei sëmbë ’bia ko dë bakama fëën kuma de’ (Mateosi 28:19, 20). So u de tei di wooko di u ta kai pionili wooko.

Wan pionili da wan sëmbë di ta tei di paaja u di bunu buka kuma wooko fëën. Hii Jehovah Kotoigi da peleikima u di bunu njunsu. Ma so u de seti de libi a sö wan fasi taa de sa dini kuma kowoonu pionili, nöö de ta peleiki 70 juu hiniwan liba. Sömëni sëmbë an ta wooko hia a di wiki dendu sö taa de sa dou dee juu dë. De ta tei so u de u wooko kuma apaiti pionili a kamian ka de abi möön hia Könuköndë peleikima fanöudu, nöö de ta peleiki 130 juu nasö möön hia hiniwan liba. Dee pionili aki dë tifihedi ku dee soni de abi u libi, nöö de ta futoou taa Jehovah o da de dee soni di de abi fanöudu a di libi (Mateosi 6:31-33; 1 Timoteo 6:6-8). Dee sëmbë dee an sa du di kowoonu pionili wooko ku di apaiti pionili wooko, sa du di heepi pionili wooko. De sa peleiki möön hia kumafa de bi guwenti peleiki, hën da de sa peleiki 30 nasö 50 juu a wan liba.

Wan pionili ta du hën wooko u di a lobi Gadu ku woto sëmbë. Leti kumafa Jesosi bi ta si taa gaan hia sëmbë an sabi Gadu ku dee soni di a abi a pakisei u du, sö nöö u ta si ën a di ten aki tu (Maikusi 6:34). Ma u abi di lei di sa heepi de nöunöu kaa u ko abi wan tuutuu houpu u di ten di ta ko. U di wan pionili lobi woto sëmbë, mbei a ta da gaansë fëën ten ku ën kaakiti u heepi de u ko jei di bunu buka (Mateosi 22:39; 1 Tesalonika 2:8). Di dë ta mbei taa di biibi u di pionili ta ko möön taanga, söseei a ta ko möön zuntu ku Gadu, nöö a ta dë waiwai seei u dee bunu dee a ta feni.​—Tjabukama 20:35.

• Ambë i bi o taki taa da wan pionili?

• Andi ta da so sëmbë taanga u du di pionili wooko?

Na tide soni Jehovah Kotoigi abi di guwenti u lei sëmbë soni u Bëibel. De seti apaiti siköö u da dee sëmbë dee da deseei u du di pioniliwooko lei, sö taa de sa „ta konda di Bunu Buka fëën [Gadu] da sëmbë nöömö ta hai de tja ko nëën së”.​—2 Timoteo 4:5.

Pionili siköö. Te wan baaa nasö wan sisa du di kowoonu pioniliwooko wan hii jaa, nöö a sa kisi di gaandi u go a di pionili siköö di ta hoi sikisi daka longi a wan Könuköndë zali di dë a di pisiwata fëën. Di siköö aki seti u heepi dee pionili u ko möön zuntu ku Jehovah, u du di peleikiwooko u de möön bunu, söseei u tan du di diniwooko u de ku de hii hati.

Siköö da Könuköndë peleikima. Di siköö aki di ta hoi tu liba longi, ta heepi baaa ku sisa di du di pioniliwooko wan pisiten kaa, nöö di dë kabakaba u go disa di kamian ka de ta libi u go dini a wan woto kamian ka möön peleikima dë fanöudu. Dee baaa ku sisa aki ta djeesi Jesosi di bi dë di möön Gaan Peleikima di bi libi a goonliba aki. De ta taki taa: „Aki mi dë! Manda mi!” (Jesaaja 6:8; Johanisi 7:29). Dee baaa ku sisa aki di ta foloisi go libi a wan woto kamian musu sa fiti deseei a wan woto fasi u libi di de an bi guwenti. Söseei de musu sa fiti deseei a di fa dee sëmbë u di kamian dë kiija, a di fa di wei dë, ku woto pei njanjan di de an bi guwenti njan. So juu a dë fanöudu taa de musu lei wan woto töngö. Di siköö aki ta heepi baaa ku sisa di an toou, söseei baaa ku sisa di toou, di abi 23 jaa te go miti 65, u ko abi fasi di de o abi fanöudu a di wooko di de ta du. Söseei de o lei soni di o mbei Jehovah ku di ölganisaasie fëën sa tei de u wooko möön bunu da de.

Waktitoren Bëibel-siköö u Giliati. Di wöutu „Giliati” a Hebelejëntöngö kë taki ’hipi sitonu di de buta kuma maaka’. A pasa 8000 baaa ku sisa di de manda go kuma sëndëlengi u go paaja di bunu buka, baka di de bi go a di Giliati siköö di bi seti a di jaa 1943. Nöö soni bi waka bunu da de baka di de bi manda de go peleiki da „hii pei sëmbë u goonliba” (Tjabukama 13:47). Di de bi manda sëndëlengi go a di köndë Pelu u di fosu pasi, nöö na wan kemeente bi dë ala. Ma nöunöu a pasa 1000 kemeente dë a di köndë dë. Di dee sëndëlengi bi bigi peleiki a di köndë Japan, nöö Kotoigi an bi dë dou teni a di köndë. Ma nöunöu a pasa 200.000 Kotoigi di dë a di köndë dë. A di Giliati siköö aki di ta hoi feifi liba longi, de ta lei soni u di Wöutu u Gadu. Dee baaa ku sisa dee dë apaiti-pionili, dee keling gaanwomi, dee ta wooko a bëikantoo, nasö dee gaanwomi dee ta waka luku dee kemeente, de ta kisi di kai u go a sö wan siköö u go tei bunu lei u de sa heepi u mbei di peleikiwooko go a fesi a hii di goonliba.

• Andi da di maaka u di pionili siköö?

• Ambë ku ambë ta kisi di kai u go a di siköö da Könuköndë peleikima?