Di sisa mii u Paulosu bi abi degihati

Boo go luku wan woto u wan njönku kijoo di bi heepi hën tio u de an kii ën. Apösutu Paulosu bi dë di tio u di njönku kijoo aki. Bëibel an ta kai di në u di njönku kijoo aki, ma u sabi taa a bi abi degihati u di soni di a bi du. I kë sabi andi a bi du ö?—

Paulosu bi dë a dunguwosu a Jelusalen. De bi kisi ën tja go söötö u di a bi ta konda soni u Jesosi. Wanlö takuhati womi di bi ta buuse Paulosu bi seti soni u kii ën. De bi taa: ’Boo go hakisi di hedima u dee sodati, be dee sodati fëën tja Paulosu go a kuutu. Woo dë tjubitjubi a bandja pasi. Te Paulosu o pasa, nöö woo kii ën!’

Di sisa mii u Paulosu jei andi de bi taki taa de o du ku Paulosu. Andi a bi o du? Wë a go a di dunguwosu, hën a go piki Paulosu andi de taki taa de o du ku ën. Wantewante Paulosu piki ën faa go konda da di hedima u dee sodati taa sö wan hogihati soni de kë du ku ën. I si kuma a bi taanga da di sisa mii u Paulosu u fan ku di hedima u dee sodati ö?— Aai, biga di hedima u dee sodati bi dë wan heihei sëmbë. Ma di sisa mii u Paulosu bi abi degihati, nöö a go fan ku di hedima u dee sodati.

Di hedima u dee sodati bi sabi bumbuu andi a bi musu du. A bi tei söwan 500 sodati u tjubi Paulosu. A bi piki de taa de bi musu tja Paulosu go a Sesalia a di wan seei ndeti dë. De bi heepi Paulosu u de an kii ën u?— Aai, dee takuhati womi an bi sa du na wan soni ku ën möön! De an bi sa du di hogihati soni di de bi kë du.

Andi i sa lei a di woto aki?— Wë iseei sa abi degihati leti kuma di sisa mii u Paulosu aki. U abi degihati fanöudu te u ta konda soni u Jehovah da wotowan. Joo abi degihati ö? Nöö joo ta konda soni u Jehovah da sëmbë nöömö u?— Kandë iseei sa heepi woto sëmbë u de feni libi ee i du sö.