-
Andi da di Könuköndë u Gadu?I sa dë waiwai u teego!—Feni wini u di i ta lei soni u Bëibel
-
-
WOTO 31
Andi da di Könuköndë u Gadu?
Di möön fanöudu buka di sikifi a di Bëibel, da di buka u di Könuköndë u Gadu. Jehovah o wooko ku di Könuköndë aki u mbei di goonliba ko toon wan paladëisi kumafa a bi abi a pakisei a di bigi. Andi da di Könuköndë? Unfa u du sabi taa a ta tii nöunöu? Andi ku andi a du kaa? Nöö andi a o du a di ten di ta ko? Di woto aki, ku dee tu woto dee ta ko nëën baka o piki dee hakisi aki.
1. Andi da di Könuköndë u Gadu, nöö ambë da di Könu fëën?
Di Könuköndë u Gadu da wan tii di Jehovah Gadu seei seti. Di Könu fëën da Jesosi Keesitu, nöö a dë a liba ala ta tii (Mateosi 4:17; Johanisi 18:36). Di Bëibel ta taki u Jesosi taa: „A o tii kuma Könu u . . . teego” (Lukasi 1:32, 33). Jesosi di dë Könu u di Könuköndë u Gadu, o tii hii sëmbë a goonliba.
2. Ambë ta tii makandi ku Jesosi?
Jesosi an ta tii hën wanwan. Di Bëibel ta taki taa sëmbë u ’hii pei nasiön ku hii pei lö ku hii pei föluku dee ta fan hii dee peipei töngö u goonliba tuu . . . o tii di goonliba’ (Akoalimbo 5:9, 10). Un mëni sëmbë o tii makandi ku Keesitu? Wë sensi di Jesosi ko a goonliba, hën milionmilion sëmbë ko toon bakama fëën. Ma hii de tuu o go tii makandi ku ën a liba ala u? Nönö, 144.000 u de nöö o go a liba ala u go tii makandi ku ën. (Lesi Akoalimbo 14:1-4.) Nöö hii dee woto bakama u Keesitu a goonliba aki o ko dë sëmbë di di Könuköndë u Gadu o ta tii.—Psalöm 37:29.
3. Faandi mbei di Könuköndë u Gadu bunu möön hii dee tii u libisëmbë?
Aluwasi dee tiima ta mbei möiti u du bunu soni, tökuseei de an abi di makiti u du hii soni di de kë du. Nöö te u kaba fëën, de ta puu dee tiima aki buta wotowan di ta pakisei deseei nöö, ka u de heepi dee sëmbë di de ta tii. Ma nöiti de o puu Jesosi, di dë di Tiima u di Könuköndë u Gadu, buta woto sëmbë nëën kamian. Di Bëibel ta taki taa Gadu „seti wan Könuköndë di an o booko kaba a sösö wan daka” (Daniëli 2:44). Jesosi o tii hii di goonliba, nöö an o ta paati bëë. A lobi sëmbë, a abi sutifasi, a ta du soni a wan leti fasi, nöö a o lei sëmbë unfa de musu libi ku wotowan a di wan seei fasi.—Lesi Jesaaja 11:9.
WOTO SONI DI I SA LEI
Woo luku faandi mbei di Könuköndë u Gadu bunu möön hii dee woto tii u di goonliba aki.
4. Di Könuköndë u Gadu o tii hii di goonliba
Jesosi Keesitu abi makiti u tii möön hii dee tiima u di goonliba aki. Lesi Mateosi 28:18, nöö piki di hakisi aki:
Faandi mbei di makiti di Jesosi abi u tii bunu möön di u dee tiima u di goonliba aki?
De lo’ u tooka dee tiima u di goonliba aki buta wotowan, nöö hiniwan u dee tiima aki ta tii a wan pisi u di goonliba nöö. Ma unfa a dë ku di Könuköndë u Gadu? Lesi Daniëli 7:14, nöö piki dee hakisi aki:
Faandi mbei a dë wan bunu soni taa di Könuköndë u Gadu „an o booko kaba a sösö möönsö”?
Faandi mbei a dë wan bunu soni taa a o tii hii di goonliba?
5. Dee tii u di goonliba aki an sa puu dee bookohedi u libisëmbë
Faandi mbei di Könuköndë u Gadu musu puu dee tii u libisëmbë, nöö a tii a de kamian? Pëë di FËLÖN, nöö piki di hakisi aki.
Andi ta pasa u di libisëmbë ta tii?
Lesi Peleikima 8:9, nöö piki di hakisi aki:
I si kuma di Könuköndë u Gadu musu puu dee tiima u di goonliba aki ö? Faandi mbei i taki sö?
6. Dee sëmbë dee o tii a di Könuköndë u Gadu ta fusutan u
U di di Könu fuu Jesosi, bi libi kuma libisëmbë a goonliba aki, mbei a ta „fusutan dee suwaki fasi fuu” (Hebelejën 4:15). Jehovah tei dee 144.000 womi ku mujëë dee o tii makandi ku Jesosi, puu „a hii pei nasiön ku hii pei lö ku hii pei föluku dee ta fan hii dee peipei töngö u goonliba tuu”—Akoalimbo 5:9.
Di sabi di i sabi taa Jesosi ku dee sëmbë dee o tii makandi ku ën bi dë libisëmbë kuma u ta mbei i fii bunu ö? Faandi mbei i taki sö?
Jehovah tei womi ku mujëë u tookatooka lö u tii makandi ku Jesosi
7. Di Könuköndë u Gadu abi dee möön bunu wëti
Di tii u wan köndë ta mbei wëti u soni musu go bunu ku dee sëmbë u di köndë u de, söseei u tjubi de. Di Könuköndë u Gadu seei abi wëti tu, nöö dee sëmbë dee a ta tii musu hoi deseei a dee wëti dë. Lesi 1 Kolenti 6:9-11, nöö piki dee hakisi aki:
Unfa i si kuma di goonliba o dë ee hii sëmbë ta hoi deseei a dee wëti u Gadu?a
I si kuma a dë wan bunu soni taa Jehovah kë u dee sëmbë dee dë a di Könuköndë tii fëën basu ta lesipeki dee wëti fëën u? Faandi mbei i taki sö?
Andi ta lei taa sëmbë di an ta hoi dee wëti u Gadu sa tooka?—Luku vers 11.
Dee tii u dee köndë ta mbei wëti u tjubi dee sëmbë u di köndë u de, söseei u heepi de. Di Könuköndë u Gadu abi dee möön bunu wëti di ta tjubi dee sëmbë fëën, nöö dee wëti aki ta tja wini ko da de
WAN SËMBË SA HAKISI I TAA: „Andi da di Könuköndë u Gadu?”
Andi i bi o piki ën?
ANDI I LEI?
Di Könuköndë u Gadu da wan tuutuu tii di dë a liba ala, di o tii hii di goonliba.
Andi i bi o piki?
Ambë da dee sëmbë dee o tii a di Könuköndë u Gadu?
Faandi mbei di Könuköndë u Gadu bunu möön hii dee tii u libisëmbë?
Andi da wantu soni di Jehovah kë u dee sëmbë dee dë a di Könuköndë tii fëën basu musu ta du?
WOTO SONI DI I SA LUKU
Lesi di woto aki fii si andi Jesosi bi taki u di kamian ka di Könuköndë u Gadu dë.
„A Kownukondre fu Gado de na ini yu ati?” (Woto a di website fuu)
Faandi mbei dee Jehovah Kotoigi ta hoi deseei a di Könuköndë u Gadu, ma de an ta hoi deseei a dee tii u libisëmbë?
Lesi di woto aki fii si andi di Bëibel ta taki u dee 144.000 sëmbë di Jehovah tei u tii makandi ku Jesosi.
Lesi di woto aki fii si andi bi heepi wan mujëë faa ko fusutan taa Gadu wanwan nöö sa tja letilibi ko a goonliba?
„Het antwoord op mijn vragen over onrecht” (Ontwaakt!, ëlufumuliba 2011)
-
-
Di Könuköndë u Gadu ta tii nöunöu!I sa dë waiwai u teego!—Feni wini u di i ta lei soni u Bëibel
-
-
WOTO 32
Di Könuköndë u Gadu ta tii nöunöu!
Di Könuköndë u Gadu bigi tii a liba ala sensi di jaa 1914. A di ten dë, dee lasiti daka u dee tii u libisëmbë bi bigi. Unfa u du sabi di soni aki? Woo luku wantu tjabukama woto u Bëibel, woo luku andi ta pasa a goonliba, söseei woo luku unfa sëmbë ta tja deseei sensi di jaa 1914.
1. Andi dee tjabukama woto u Bëibel ta lei u?
Di Bëibel buku Daniëli, ta lei u taa di Könuköndë u Gadu bi o bigi tii a di kaba u wan ten di Bëibel ta kai dee „seibi pisiten” (Daniëli 4:16, 17). Höndöhöndö jaa baka di dë, Jesosi bi kai di wan seei ten aki „di ten u dee woto köndë sëmbë”, nöö a bi taki taa di ten dë an bi kaba jeti (Lukasi 21:24). Kumafa woo si, nöö dee seibi pisiten kaba a di jaa 1914.
2. Andi ta pasa a goonliba sensi di jaa 1914, nöö unfa sëmbë ta tja deseei?
Dee bakama u Jesosi bi hakisi ën taa: „Nöö un maaka joo lei u tu, fuu sa sabi di juu di joo toona ko baka ku di juu di di goonliba di u dë aki o kaba?” (Mateosi 24:3). Jesosi bi konda da de andi ku andi bi o pasa baka te a bi o bigi tii kuma Könu u di Könuköndë u Gadu a liba ala. So u dee soni dee bi o ta pasa da gaan feti, hangi pena, ku goon di bi o ta seki ta bai ta latja. (Lesi Mateosi 24:7.) Di Bëibel bi taki a fesi tu taa di fasi fa sëmbë bi o ta libi a „dee lasiti daka”, bi o mbei taa ’wan tumusi hogiten bi o ko’ dë (2 Timoteo 3:1-5). Hii dee soni aki bi ko dë gbelingbelin u si sensi di jaa 1914.
3. Faandi mbei soni bi ko möön hogi a goonliba sensi di di Könuköndë u Gadu bigi tii?
Kölö sö baka di Jesosi toon Könu u di Könuköndë u Gadu, hën a feti ku Saatan ku dee taku jeje fëën a liba ala. Saatan lasi di feti. Di Bëibel ta taki taa „De hiti hën ku dee basia fëën tuu tuwë go a goonliba” (Akoalimbo 12:9, 10, 12). Saatan hati ta boonu gaanfa seei u di a sabi taa a o dëdë abiti möön. Fëën mbei a ta mbei libisëmbë ta tja pena ku fuka a hii së u goonliba. Di soni aki ta mbei u ko fusutan faandi mbei di goonliba hogi sö! Di Könuköndë u Gadu o puu hii dee bookohedi aki.
WOTO SONI DI I SA LEI
Woo luku unfa u du sabi taa di Könuköndë u Gadu bigi tii a di jaa 1914, söseei woo luku andi di soni aki kë taki da u.
4. Dee tjabukama woto u Bëibel ta lei taa di Könuköndë u Gadu bigi tii a di jaa 1914
Gadu bi mbei Könu Nebukatnesali u di awooten Babilon sunjan wan sunjan di bi ta lei andi bi o pasa a di ten fëën ku di ten fuu aki. A di Bëibel buku Daniëli i sa lesi andi da di sunjan, nöö di fasi fa Daniëli bi puu di sunjan aki ta lei taa a nama ku di tii u Nebukatnesali, söseei ku di Könuköndë u Gadu.—Lesi Daniëli 4:17.a
Lesi Daniëli 4:20-26, nöö luku di pisi a di kaita, nöö piki dee hakisi aki:
(A) Andi Nebukatnesali bi si a di sunjan?—Luku vers 20 ku 21.
(B) Andi bi o pasa ku di pau?—Luku vers 23.
(C) Andi bi o pasa a di kaba u dee „seibi pisiten”?—Luku vers 26.
Unfa di pau nama ku di Könuköndë u Gadu?
DI TJABUKAMA WOTO (Daniëli 4:20-36)
A ta tii
(A) Wan gaan gindi pau
An ta tii möön
(B) „Koti di pau tuwë”, nöö mbei „seibi pisiten pasa”
A bigi tii baka
(C) „Joo bigi tii kuma könu baka”
Di fosu pasi di di tjabukama woto pasa tuutuu . . .
(D) Ambë bi dë di pau?—Luku vers 22.
(E) Faandi mbei an bi ta tii möön?—Lesi Daniëli 4:29-33.
(F) Andi bi pasa ku Nebukatnesali a kaba u dee „seibi pisiten”?—Lesi Daniëli 4:34-36.
DI FOSU PASI DI DI TJABUKAMA WOTO PASA TUUTUU
A ta tii
(D) Nebukatnesali, di könu u Babilon
An ta tii möön
(E) Baka 606 bifö Keesitu, hën Nebukatnesali bi lasi ën fusutan, nöö seibi jaa longi an bi tii möön
A bigi tii baka
(F) Nebukatnesali bi kisi hënseei baka, hën a bigi tii baka
Di u tu pasi di di tjabukama woto pasa tuutuu . . .
(G) Ambë bi dë di pau?—Lesi 1 Kloniki 29:23.
(H) Faandi mbei de an bi ta tii möön? Unfa u du sabi taa Isaëli an bi abi könu möön a di pisiten di Jesosi bi dë a goonliba?—Lesi Lukasi 21:24.
(I) Na un ten Gadu bi buta wan njunjun könu, nöö naasë a bi butëën?
DI U TU PASI DI I TJABUKAMA WOTO PASA TUUTUU
A ta tii
(G) Dee könu u Isaëli dee bi ta tei kamian da Gadu
An ta tii möön
(H) Jelusalen bi booko kaba a sösö, nöö 2520 jaa longi na wan könu u Isaëli bi tii möön
A bigi tii baka
(I) Jesosi bigi tii kuma Könu u di Könuköndë u Gadu a liba ala
Un mëni jaa da dee seibi pisiten?
So pisi u di Bëibel ta heepi u fuu fusutan woto pisi fëën. Kuma te u luku di Bëibel buku Akoalimbo, nöö a ta taki taa dii pisiten ku hafu dë di wan seei kuma 1260 daka (Akoalimbo 12:6, 14). Hën da seibi pisiten da tu toon u di nöbu dë, hën da 2520 daka. So juu di wöutu daka kë taki jaa a di Bëibel (Ezekiëli 4:6). Nöö sö a dë ku dee seibi pisiten di di Bëibel buku Daniëli ta taki soni u de. Dee seibi pisiten dë da 2520 jaa.
5. Soni tooka a goonliba sensi di jaa 1914
Jesosi bi taki a fesi unfa di goonliba bi o ko dë baka te a bi toon Könu. Lesi Lukasi 21:9-11, nöö piki di hakisi aki:
Undi u dee soni dee sikifi a di tëkisi aki i ta si ta pasa nasö i jei ta pasa?
Apösutu Paulosu bi taki unfa sëmbë bi o ta tja deseei a dee lasiti daka u di goonliba aki. Lesi 2 Timoteo 3:1-5, nöö piki di hakisi aki:
Undi u dee fasi aki i ta si a dee sëmbë u di ten aki?
6. Unfa i sa lei taa i ta biibi taa di Könuköndë u Gadu ta tii nöunöu?
Lesi Mateosi 24:3, 14, nöö piki dee hakisi aki:
Un fanöudu wooko ta lei taa di Könuköndë u Gadu ta tii nöunöu?
Andi i sa du u heepi ku di wooko aki?
Di Könuköndë u Gadu ta tii nöunöu, nöö di daka di a o tii hii di goonliba zuntu seei. Lesi Hebelejën 10:24, 25, nöö piki di hakisi aki:
Andi hiniwan fuu musu du, di „u si taa di kaba zuntu”?
Ee i ko sabi wan soni di sa heepi woto sëmbë nasö di sa tjubi woto sëmbë libi, nöö andi i bi o du ku di soni dë? I bi o hoi ën da i wanwan u?
WAN SËMBË SA HAKISI I TAA: „Faandi mbei dee Jehovah Kotoigi lo’ u taki soni u di jaa 1914?”
Andi i bi o piki ën?
ANDI I LEI?
Dee tjabukama woto u Bëibel ku dee soni dee ta pasa a goonliba ta lei taa di Könuköndë u Gadu ta tii nöunöu kaa. U ta lei taa u ta biibi di soni aki te u ta paaja di buka u di Könuköndë, söseei te u nango a dee komakandi.
Andi i bi o piki?
Andi bi pasa a di kaba u dee seibi pisiten kumafa di buku Daniëli bi taki?
Andi ta mbei i dë seiki taa di Könuköndë u Gadu bigi tii a di jaa 1914?
Unfa i sa lei taa i ta biibi taa di Könuköndë u Gadu ta tii nöunöu kaa?
WOTO SONI DI I SA LUKU
Lesi di woto aki fii si andi könima ku woto sëmbë taki u di tooka di soni tooka a goonliba sensi di jaa 1914.
„Wanneer begon het morele verval?” (Ontwaakt!, piki-deewei-liba 2007)
Lesi di woto aki fii si unfa di tjabukama woto di sikifi a Mateosi 24:14 tooka wan womi libi.
„Mi ben lobi honkbal moro ala tra sani!” (A Waktitoren Nö. 3 2017)
Lesi di woto aki fii si unfa u du sabi taa di tjabukama woto di sikifi a Daniëli kapitë 4 nama ku di Könuköndë u Gadu.
„O ten Gado Kownukondre bigin tiri? (Pisi 1)” (A Waktitoren, 1 u tinimu-liba 2014)
Lesi di woto aki fii si andi ta lei taa dee „seibi pisiten” dee kai a Daniëli kapitë 4 kaba a di jaa 1914
„O ten Gado Kownukondre bigin tiri? (Pisi 2)” (A Waktitoren, 1 u ëlufumu-liba 2014)
a Lesi dee tu lasiti woto a di pisi „Woto soni di i sa luku” u di woto aki.
-
-
Dee soni di di Könuköndë u Gadu o duI sa dë waiwai u teego!—Feni wini u di i ta lei soni u Bëibel
-
-
WOTO 33
Dee soni di di Könuköndë u Gadu o du
Di Könuköndë u Gadu ta tii nöunöu kaa. Abiti möön a o tooka sömëni soni a di goonliba. Boo luku wantu u dee bunu soni dee woo feni te di Könuköndë u Gadu o tii di goonliba abiti möön.
1. Unfa di Könuköndë u Gadu o tja fiifii libi ku leti libi ko a goonliba?
Jesosi, di Könu u di Könuköndë u Gadu, o kii hii dee sëmbë dee ta du hogi ku hii dee tiima u di goonliba aki a di feti de kai Amagedon (Akoalimbo 16:14, 16). A di ten dë, di soni di Gadu bi paamusi u a di Bëibel o pasa tuutuu: „Wan sati pisiten nöö fika, nöö dee sëmbë dee ta du hogi an o dë möön” (Psalöm 37:10). Ku di heepi u di Könuköndë u Gadu, Jesosi o mbei taa fiifii libi ku letilibi o dë a hii së u goonliba.—Lesi Jesaaja 11:4.
2. Unfa di libi o dë te di kë u Gadu o pasa a goonliba?
Te di Könuköndë u Gadu o tii, „nöö dee sëmbë dee ta libi a wan leti fasi, de o feni di goonliba, nöö naandë de o libi u teego” (Psalöm 37:29). Pakisei unfa a o dë u libi a wan goonliba ka hii sëmbë o ta du soni a wan leti fasi, ka hii sëmbë o lobi Jehovah, söseei ka hii sëmbë o lobi de na de! Na wan sëmbë o ta siki, nöö hii sëmbë o libi u teego.
3. Andi di Könuköndë u Gadu o du baka te hii dee sëmbë dee bi ta du hogi dëdë?
Baka te dee sëmbë dee bi ta du hogi an dë möön, nöö Jesosi o tii kuma Könu u 1000 jaa longi. A di ten dë, hën ku dee 144.000 sëmbë dee o tii makandi ku ën, o heepi libisëmbë u de an abi zöndu möön. Baka di ten dë, di goonliba o ko toon wan gaan hansë paladëisi, nöö dee sëmbë dee o ta libi nëën o ta dë waiwai, u di de ta hoi deseei a dee wëti u Jehovah. Baka di dë, nöö Jesosi o toona da hën Tata Jehovah di Könuköndë. Nöö di „në u Jehovah [o] ko santa” a hii goonliba (Mateosi 6:9, 10). Hii sëmbë o ko sabi taa Jehovah da di möön bunu tiima, söseei taa a lobi dee sëmbë dee a ta tii. Baka di dë, Jehovah o kii Saatan ku dee taku jeje fëën, ku hii dee woto sëmbë dee hopo fia ku di tii fëën (Akoalimbo 20:7-10). Dee bunu di di Könuköndë u Gadu o mbei u feni o dë u teego.
WOTO SONI DI I SA LEI
Woo luku faandi mbei u sa biibi taa Gadu o mbei di Könuköndë fëën du hii dee bunu soni dee a paamusi u a di Bëibel, da di ten di ta ko.
4. Di Könuköndë u Gadu o puu hii dee tii u libisëmbë
„Di libisëmbë bigi tii wotowan, an tja bunu ko da de” (Peleikima 8:9). Jehovah o mbei di Könuköndë fëën puu hii dee hogi dee libisëmbë tja ko, u di de an ta libi a wan leti fasi.
Lesi Daniëli 2:44 ku 2 Tesalonika 1:6-8, nöö piki dee hakisi aki:
Andi Jehovah ku di Womi Mii fëën Jesosi, o du ku dee tiima u di goonliba aki, ku dee sëmbë dee dë ku de a wan së?
Unfa dee soni dee i lei u Jehovah ku Jesosi, ta mbei i dë seiki taa de o du soni a wan leti fasi?
5. Jesosi da di möön bunu Könu
Jesosi, di Könu u di Könuköndë u Gadu, o du sömëni bunu soni da dee sëmbë dee ta saka deseei a di tii fëën basu. Pëë di FËLÖN fii si unfa Jesosi bi lei taa a kë heepi sëmbë, söseei taa Gadu dëën di makiti faa du di soni dë.
Di Jesosi bi dë a goonliba, a bi lei u andi di Könuköndë u Gadu o du a di ten di ta ko. Undi u dee gaan bunu dee sikifi a dee tëkisi a basu aki i kë feni seei? Lesi dee tëkisi dee ta taki u dee gaan bunu dee woo feni.
DI JESOSI BI DË A GOONLIBA . . .
A LIBA ALA JESOSI O DË . . .
a bi basi wata ku ventu.—Maikusi 4:36-41.
seeka di goonliba ko bunu baka.—Jesaaja 35:1, 2.
a bi da dusudusu sëmbë njanjan.—Mateosi 14:17-21.
puu hangi pena a goonliba aki.—Psalöm 72:16.
a bi kula dee sëmbë dee bi dë ku suwaki.—Lukasi 18:35-43.
puu siki, nöö a o mbei hii sëmbë a goonliba dë gösöntu.—Jesaaja 33:24.
a bi weki dëdë sëmbë ko a libi baka.—Lukasi 8:49-55.
puu dëdë.—Akoalimbo 21:3, 4.
6. Di Könuköndë u Gadu o mbei woo abi wan bunu libi a di ten di ta ko
Di Könuköndë u Gadu o mbei libisëmbë feni di bunu libi di Jehovah bi kë da de sensi di bigi u goonliba. A o mbei de feni di libi u teego a wan paladëisi a goonliba aki. Pëë di FËLÖN fii si unfa Jehovah ta mbei di Womi Mii fëën, Jesosi Keesitu, du dee soni dee a abi a pakisei u du.
Lesi Psalöm 145:16, nöö piki di hakisi aki:
Unfa i feni ën taa Jehovah o da „hiniwan soni di dë ku libi di soni di a kë”?
SO SËMBË TA TAKI TAA: „Ee hii u tuu buta maun ko a wan, nöö woo sa puu dee bookohedi u di goonliba aki.”
Un bookohedi di Könuköndë u Gadu o puu, di dee tiima u di goonliba aki an sa puu?
ANDI I LEI?
Di Könuköndë u Gadu o du hii dee soni dee Gadu abi a pakisei da libisëmbë. A o mbei di goonliba ko toon wan paladëisi, ka bunuhati sëmbë wanwan nöö o ta libi, nöö u teego de o ta dini Jehovah.
Andi i bi o piki?
Unfa di Könuköndë u Gadu o mbei di në u Jehovah ko santa?
Faandi mbei u sa biibi taa di Könuköndë u Gadu o du hii dee soni dee Gadu paamusi u a di Bëibel?
Undi u dee bunu soni di di Könuköndë u Gadu o du i kë si seei?
WOTO SONI DI I SA LUKU
Lesi di woto aki fii si andi Amagedon kë taki.
Lesi di woto aki fii si andi o pasa a di pisiten di Jesosi bi kai di „gaan fuka”-Mateosi 24:21.
Luku di fëlön aki fii si unfa sëmbë u wan wosudendu ta kai pakisei a dee gaan bunu di di Könuköndë u Gadu o mbei u feni.
Lesi di woto „Furu aksi ben e dangra mi”, fii si unfa wan womi di bi ta hopo fia ku lanti, bi ko fusutan taa Gadu wanwan nöö sa puu dee bookohedi fuu.
-