WOTO 18
Unfa i sa sabi dee tuutuu Keesitu sëmbë?
Milionmilion sëmbë ta taki taa de da Keesitu sëmbë. Ma de an ta biibi dee seei soni, söseei de an ta libi a di wan seei fasi. Ma unfa u sa ko sabi ambë da dee tuutuu Keesitu sëmbë?
1. Ambë da wan Keesitu sëmbë?
Dee Keesitu sëmbë da bakama u Jesosi Keesitu. (Lesi Tjabukama 11:26.) Unfa de ta lei taa de da bakama u Jesosi? Jesosi bi taki taa: „Ee un ta hoi dee lei mi ta lei unu aki nango nöömö, nöö woon ko dë bakama u mi tuutuu” (Johanisi 8:31). Di soni aki kë taki taa dee tuutuu Keesitu sëmbë musu ta du dee soni dee Jesosi ta lei de. Nöö leti kumafa Jesosi bi ta lei sëmbë soni di sikifi a di Wöutu u Gadu, sö nöö dee tuutuu Keesitu sëmbë ta lei sëmbë soni di sikifi a di Bëibel.—Lesi Lukasi 24:27.
2. Unfa tuutuu Keesitu sëmbë ta lei taa de lobi wotowan?
Jesosi bi piki dee bakama fëën taa: „Un musu ta lobi unu na unu e, leti kumafa i si mi ta lobi unu” (Johanisi 15:12). Unfa Jesosi bi lei taa a lobi dee bakama fëën? A bi ta dë makandi ku de, a bi ta da de taanga, söseei a bi ta heepi de. Nöö boiti di dë, a bi dëdë da de tu (1 Johanisi 3:16). Sö nöö tuutuu Keesitu sëmbë an ta taki nöö taa de lobi sëmbë. Ma dee soni di de ta taki ku dee soni di de ta du, ta lei taa de lobi sëmbë tuutuu.
3. Un wooko tuutuu Keesitu sëmbë ta du möön gaanfa?
Jesosi bi da dee bakama fëën wan wooko u du. A bi „manda de u de go paaja di buka u di Könuköndë u Gadu.” (Lukasi 9:2). Dee fesiten Keesitu sëmbë bi ta peleiki tu, ma de an bi ta peleiki a di kamian ka de bi nango dini Gadu nöö, ma de bi nango ta peleiki a woto kamian tu ka hia sëmbë bi ta ko makandi, söseei a sëmbë pisi. (Lesi Tjabukama 5:42; 17:17.) Dee tuutuu Keesitu sëmbë u di ten aki seei ta paaja di tuutuu lei u Bëibel a hii kamian ka de ta miti sëmbë. De lobi woto sëmbë, nöö ku hii de hati de ta tei de ten ku de kaakiti u konda soni u Bëibel da sëmbë, söseei u da sëmbë kötöhati.—Maikusi 12:31.
WOTO SONI DI I SA LEI
Woo luku unfa dee tuutuu Keesitu sëmbë tooka ku dee sëmbë dee an ta du andi Jesosi ta lei u, söseei dee an ta djeesi ën.
4. Dee tuutuu Keesitu sëmbë ta mbei möiti u ko sabi di tuutuu lei di dë a Bëibel
Dee fesiten Keesitu sëmbë bi ta tei di Wöutu u Gadu u bigi
Na hii sëmbë di ta kai deseei Keesitu sëmbë ta libi kumafa di tuutuu lei u Bëibel ta taki. Pëë di FËLÖN, nöö piki di hakisi aki.
Andi so u dee keiki dee bi ta kai deseei Keesitu sëmbë bi ta du u tapa sëmbë u de an lei wotowan dee soni di Jesosi bi ta lei sëmbë?
Jesosi bi ta lei sëmbë soni u di tuutuu lei di dë a di Wöutu u Gadu. Lesi Johanisi 18:37, nöö piki di hakisi aki:
Kumafa Jesosi bi taki, nöö unfa u sa ko sabi dee Keesitu sëmbë dee tei di së u di tuutuu lei?
5. Dee tuutuu Keesitu sëmbë ta konda soni u di tuutuu lei u Bëibel da sëmbë
Dee fesiten Keesitu sëmbë bi ta peleiki da woto sëmbë
Ufö Jesosi bi toona go a liba ala, a bi da dee bakama fëën wan wooko, nöö di wooko dë nango dou te kuma tide jeti. Lesi Mateosi 28:19, 20 ku Tjabukama 1:8, nöö piki di hakisi aki:
Un longi dee bakama u Jesosi bi o du di peleikiwooko, nöö te naasë de bi o du ën dou?
6. Dee tuutuu Keesitu sëmbë ta du dee soni di de ta lei sëmbë
Andi bi heepi wan womi de kai Tom faa bi dë seiki taa a bi feni dee tuutuu Keesitu sëmbë? Pëë di FËLÖN, nöö piki dee hakisi aki.
Andi bi mbei taa Tom an bi kë jei soni u keiki möön?
Andi bi mbei a dë seiki taa a feni di tuutuu lei?
Dee soni dee u ta du abi kaakiti möön dee soni dee u ta taki. Lesi Mateosi 7:21, nöö piki di hakisi aki:
Andi da di möön fanöudu soni da Jesosi, di taki di u ta taki taa u ta biibi naa dee soni dee u ta du?
7. Dee tuutuu Keesitu sëmbë lobi de na de
Dee fesiten Keesitu sëmbë bi lobi de na de
A pasa kaa taa Keesitu sëmbë bi lei taa de bi sa dëdë da woto Keesitu sëmbë u? Pëë di FËLÖN, nöö piki dee hakisi aki.
Andi bi mbei taa Baaa Lloyd bi kë u de kii hën, ka u de bi kii Baaa Johansson?
I si kuma a bi lei taa hën da wan tuutuu Keesitu sëmbë u?
Lesi Johanisi 13:34, 35, nöö piki dee hakisi aki:
Unfa dee bakama u Jesosi, hën da dee tuutuu Keesitu sëmbë, ta libi ku sëmbë u wan woto lö nasö u wan woto köndë?
Unfa de ta lei taa de lobi wotowan te wan gaan feti ta feti?
SO SËMBË TA TAKI TAA: „Aantoobi un pei keiki i nango, di möön fanöudu soni, hën da i musu ta biibi a Jesosi”.
Un tëkisi i sa lesi da wan sëmbë u lei ën unfa u sa ko sabi dee tuutuu Keesitu sëmbë?
ANDI I LEI?
Dee tuutuu Keesitu sëmbë ta du andi di Bëibel ta lei, de lobi woto sëmbë ku hii de hati, nöö de ta konda soni u di tuutuu lei u Bëibel da sëmbë.
Andi i bi o piki?
Naasë dee soni di dee tuutuu Keesitu sëmbë ta biibi ta kumutu?
Un fasi tuutuu Keesitu sëmbë abi di ta mbei sëmbë ko sabi de?
Un wooko tuutuu Keesitu sëmbë ta du?
WOTO SONI DI I SA LUKU
Luku di fëlön aki fii si unfa wan kulupu sëmbë ta mbei möiti u djeesi Jesosi, söseei u du andi a lei u.
Luku di fëlön aki fii si andi bi heepi wan mazo faa bi feni dee sëmbë dee ta dini di tuutuu Gadu.
„Den gebroiki Bijbel fu piki ibri aksi!” (A Waktitoren, 1 u piki-deewei-liba 2014)
A di fëlön aki joo si unfa dee tuutuu Keesitu sëmbë ta heepi deseei te de abi heepi fanöudu.
Heepi dee baaa ku dee sisa fuu te wan gaan hogi pasa—Wan sati pisi (3:57)
Lesi di woto aki fii si unfa dee fesiten Keesitu sëmbë ku dee tuutuu Keesitu sëmbë u di ten aki, ta du dee seei soni di Jesosi bi taki taa dee bakama fëën bi o ta du.
„Fa yu kan kon sabi san na a tru Kresten bribi?” (A Waktitoren, 1 u gaanliba 2012)