Faandi mbei a dë fanöudu fuu buta pakisei a dee soni dee u ta bisi ku di fasi fa u ta modo?

Hii u tuu ta kë bisi soni di u lobi, söseei u ta kë modo kumafa u kë. Di Bëibel abi wantu mama wëti di sa heepi u fuu sa modo a wan fasi di useei lobi, söseei a wan fasi di ta kai ku Jehovah. Boo luku wantu u dee mama wëti aki.

1. Un mama wëti u Bëibel sa heepi u fuu sabi andi u musu bisi, söseei unfa u musu modo?

U musu „bisi a wan fasi di fiti”, söseei „a wan lesipeki fasi u lei taa u dë ku limbolimbo fusutan”. Di fasi fa u ta bisi musu lei taa „u ta dini Gadu” (1 Timoteo 2:9, 10). Buta pakisei a dee fö mama wëti dee sikifi a di tëkisi aki: (1) U musu ta „bisi a wan fasi di fiti”. Kumafa i ta si a dee komakandi u dee Jehovah Kotoigi, nöö de ta bisi a tookatooka fasi, ma dee soni dee u ta bisi ku di fasi fa u ta seeka di uwii fuu ta lei taa u ta lesipeki di Gadu di u ta dini. (2) Bisi „a wan lesipeki fasi” kë taki taa wa o ta bisi soni di o ta weki dee manu ku mujëë fii u wotowan, nasö di o mbei sëmbë ta buta pakisei a u poi. (3) U ta lei taa „u dë ku limbolimbo fusutan” te wa ta tei hii dee njunjun modo dee ko. (4) Di fasi fa u ta bisi musu ta lei hii juu taa „u ta dini Gadu”.​—1 Kolenti 10:31.

2. Faandi mbei u musu hoi dee baaa ku dee sisa fuu a pakisei te woo bisi soni?

Hii fa u sa bisi andi u kë, tökuseei u musu hoi wotowan a pakisei. Wa kë taa dee soni dee woo bisi toobi wotowan. Boiti di dë, wa kë u de fii sen, ma u kë du soni di o kai ku de, di o tja bunu ko da de, u de ko möön taanga a di biibi.​—Lesi Loomë 15:1, 2.

3. Unfa dee soni dee u ta bisi sa mbei sëmbë kë ko sabi soni u Jehovah?

Hii juu u musu ta mbei möiti u ta bisi soni a wan fasi di fiti. Ma te u nango a dee komakandi, söseei te u nango peleiki da sëmbë, nöö u ta möön buta pakisei a dee soni dee u ta bisi. Wa kë bisi soni di o mbei taa sëmbë an kë haika di bosikopu di u ta tja. Ma u kë bisi soni di o „tja gafa ko da di lei u Masa Gadu”, söseei di o mbei sëmbë kë sabi möön soni fëën​—Titusi 2:10.

WOTO SONI DI I SA LEI

4. Te u ta bisi soni a wan fasi di fiti, nöö u ta lei taa u ta lesipeki Jehovah

Faandi mbei a dë fanöudu fuu ta bisi a wan fasi di fiti? Lesi Psalöm 47:2, nöö piki dee hakisi aki:

• Unfa sëmbë musu si Jehovah te de ta luku dee soni dee u ta bisi?

• I si kuma a dë fanöudu fuu buta pakisei a dee soni dee u ta bisi te woo go a komakandi nasö te woo go a di peleikiwooko u? Faandi mbei i taki sö?

5. Andi sa heepi u fuu sabi andi u musu bisi, söseei unfa u musu modo?

Pëë di FËLÖN.

FËLÖN: „Du hii soni u tja gafa ko da Gadu” (10:18)

Hii juu dee lai fuu musu ta dë limbolimbo, aluwasi de dii nasö de an dii. Nöö aluwasi naasë u dë nasö andi u ta du u musu bisi soni di fiti. Lesi 1 Kolenti 10:24 ku 1 Timoteo 2:9, 10. Baka di dë, nöö taki faandi mbei wa kë bisi soni . . .

• di an dë limbolimbo, nasö di an dë dililii, nasö di an fiti di kamian ka u nango.

• di peeta a u sinkii nasö di ta weki dee manu ku mujëë fii u wotowan.

Hii fa Keesitu sëmbë an ta hoi deseei a di wëti u Mosesi möön, tökuseei di wëti aki ta lei u unfa Jehovah ta pakisei te a nama ku dee soni dee u ta bisi. Lesi Detolonomi 22:5, nöö piki dee hakisi aki:

• Faandi mbei wan mujëë an musu bisi lai nasö modo a wan fasi di ta mbei a djei wan womi, nasö faandi mbei wan womi an musu bisi lai nasö modo a wan fasi di ta mbei a djei wan mujëë?

Lesi 1 Kolenti 10:32, 33 ku 1 Johanisi 2:15, 16, baka di dë, nöö piki dee hakisi aki:

• Faandi mbei u musu buta pakisei a dee soni dee u ta bisi ku di fasi fa u ta modo fu an toobi dee sëmbë u di pisiwata ka u ta libi nasö dee sëmbë u di kemeente?

• Unfa sëmbë lo’ u bisi nasö lo’ u modo a di pisiwata ka i ta libi?

• I si kuma dee fasi u bisi aki fiti wan Keesitu sëmbë u? Faandi mbei i ta taki sö?

ANDI I LEI?

Te u ta bisi lai di fiti, söseei te u ta modo a wan fasi di fiti, nöö u ta lei taa u ta lesipeki Jehovah ku woto sëmbë.

Andi i bi o piki?

• Faandi mbei di fasi fa u ta bisi, ku di fasi fa u ta modo dë wan fanöudu soni da Jehovah?

• Andi da wantu mama wëti u Bëibel di sa heepi u fuu sabi un lai fiti u bisi, söseei un fasi u modo fiti?

• Andi sëmbë sa pakisei u di tuutuu biibi te de luku di fasi fa u ta bisi?

WOTO SONI DI I SA LUKU

Lesi di woto aki fii si unfa sëmbë sa pakisei fii te de ta luku dee soni dee i ta bisi.

„Den krosi di mi weri bun?” (Woto a di website fuu)

Lesi di woto aki fii si faandi mbei a dë wan fanöudu soni fii pakisei bunu ufö i buta tatoeage a i sinkii.

„San Bijbel e taki fu tatoeage?” (Woto a di website fuu)

Lesi di woto aki fii si woto mama wëti di sa heepi i fii sabi andi i musu bisi.

„Dee soni dee i ta bisi ta tja gafa ko da Gadu ö?” (Di Hei Wakitimawosu u wajamaka-liba 2016)

Lesi di woto aki fii si andi bi heepi wan mujëë fu an kuutu di fasi fa wotowan ta bisi.

„Moderne kleding was voor mij een struikelblok” (Ontwaakt!, 22 u tuwalufumu-liba u 2003)