WOTO 53

Mbei piizii a wan fasi di ta kai ku Jehovah

Di de doloki buta a pampia

Jehovah da wan Gadu di ta dë waiwai (1 Timoteo 1:11). A kë fuu ta dë waiwai, söseei a kë fuu ta piizii u di libi. A ta feni ën bunu te u ta buta ten a wan së u böö dendu, söseei u mbei piizii. A di woto aki, woo luku unfa u sa wooko ku di ten fuu, fuu ta piizii a wan fasi di Jehovah ta feni bunu.

1. Andi u musu hoi a pakisei te woo mbei piizii?

Andi i lo’ u du te i ta böö dendu? So sëmbë lo’ u dë a wosu lesi wan buku, haika poku, luku wan fëlön nasö go a Internet. Wotowan lo’ u du soni makandi ku dee mati u de. De nango köi, de nango sun nasö de ta pëë game. Aluwasi andi woo du u mbei piizii, u musu du soni „di Gadu ta feni bunu” (Efeise 5:10). A dë fanöudu fuu fusutan di soni aki bunu, u di gaansë u dee soni di sëmbë ta du te de ta mbei piizii, da soni di Jehovah an lobi. Dee soni aki da soni kuma feti, fanafiti libi a di së u womi ku mujëë nasö soni di nama ku taku jeje. (Lesi Psalöm 11:5.) Andi sa heepi u fuu ta piizii a wan fasi di ta kai ku Gadu?

Te u ta suku mati di lobi Jehovah, nöö de o sa heepi u fuu mbei piizii a wan fasi di Jehovah ta feni bunu. A woto 48, u bi si taa „di sëmbë di ta waka ku köni sëmbë o ko köni”. Ma ee u ta hulu sëmbë di an lobi dee wëti u Gadu, nöö ’soni an o waka bunu da u’.—Nöngö 13:20.

2. Faandi mbei a dë fanöudu fuu luku un hia ten woo ta tei u mbei piizii?

Aluwasi woo mbei piizii di ta kai ku Gadu, tökuseei u musu luku bunu fu an tei hia ten fuu poi. Ee wa du sö, nöö wa o abi ten tjika u du dee möön fanöudu soni. Di Bëibel ta da u degihati „fuu wooko ku di ten [fuu] a wan köni fasi”.—Lesi Efeise 5:15, 16.

WOTO SONI DI I SA LEI

Woo luku andi sa heepi u fuu mbei piizii di ta kai ku Gadu.

3. Na mbei piizii di an bunu

Faandi mbei a dë fanöudu fuu luku bunu un piizii woo mbei? Pëë di FËLÖN, nöö piki dee hakisi aki.

FËLÖN: Un soni mi sa tei u mbei piizii? (4:39)

Unfa dee pëë di sëmbë bi ta pëë na awooten dë kuma so u dee piizii di sëmbë ta mbei a di ten aki?
Andi Danny bi ko fusutan?

Lesi Loomë 12:9, nöö piki di hakisi aki:

Unfa di tëkisi aki ta heepi u fuu mbei piizii di ta kai ku Jehovah?

Andi da wantu soni di Jehovah ta buuse? Lesi Nöngö 6:16, 17 ku Galasia 5:19-21. Baka te i lesi hiniwan u dee tëkisi, nöö piki di hakisi aki:

Undi u dee soni a di tëkisi aki i ta si hiahia a fëlön ku game a di ten aki?

Andi sa heepi i fii mbei piizii di ta kai ku Gadu?

Hakisi iseei dee soni aki:

Andi mi o du? Di soni di mi kë du nama ku soni di Jehovah ta buuse u?
Un mëni ten a o tei? Di soni di mi o du o mbei taa ma o abi ten tjika u du dee möön fanöudu soni ö?
Ku ambë mi o du ën? Te mi o du di soni aki, mi o hulu sëmbë di an lobi Jehovah u?

A dë wan bunu soni te u ta köni ku soni di sa mbei hogi miti u. Fëën mbei ee wa dë seiki taa di soni di woo du u mbei piizii da wan bunu soni, nöö a möön bunu fu wa du ën

Wan wagi ta lëi a wan kuun buka. Nöö a fika piki, nöö a kai kumutu a di kuun.

4. Wooko ku di ten fii a wan bunu fasi

Pëë di FËLÖN, nöö piki di hakisi aki.

FËLÖN: Andi ta tei hia ten fii? (2:45)

Hii fa di baaa a di fëlön an bi ta luku soni di an bunu, tökuseei a bi abi wan bookohedi. Un bookohedi a bi abi?

Lesi Filipi 1:10, nöö piki di hakisi aki:

Unfa di tëkisi aki sa heepi u fuu luku un hia ten woo tei u mbei piizii?

5. Mbei piizii di bunu

Hii fa so piizii an ta kai ku Jehovah, tökuseei hia soni dë di u sa du u mbei piizii. Lesi Peleikima 8:15 ku Filipi 4:8, nöö piki di hakisi aki:

Un bunu soni i lo’ u du u mbei piizii?

Di peentje: Sëmbë di abi tookatooka jaa ta du soni di de lobi. 1. Wan mujëë mii ta haika poku, nöö a ta teeken. 2. Dii njönku womi mii ta pëë basketbal. 3. Tu womi mii ta lëi baisigi. 4. Wan womi mii ta mbei wan pëëpëë wagi. 5. Wan womi ta pëë wan doon. 6. Wan womi mii ta pëë game ku hën tata. 7. Wan mujëë ta puu footoo. — Sömëni soni dë di i sa du u mbei piizii di bunu

SO SËMBË TA TAKI TAA: „Na wan hogi soni u luku wan fëlön ka de ta feti, nasö ka de ta du fanafiti soni a di së u womi ku mujëë, nasö ka de ta du soni di nama ku taku jeje. Du nöö ja musu du dee soni dë.”