Soni di dee lesima hakisi

Ambë bi dë dee siköutu dee bi ta wooko a di Wosu u Gadu? Andi ku andi de bi ta du?

Na hii womi sëmbë di bi dë wan Leifi sëmbë bi ta toon mindima. Dee womi dee an bi dë mindima bi ta du woto wooko. So u de bi dë siköutu. Di fesima u di Wosu u Gadu bi ta piki dee siköutu aki andi de bi musu du. Wan Dju womi de kai Filo, di ta sikifi buku, bi konda andi ku andi dee siköutu aki bi ta du. A bi taki taa: „So womi di bi dë Leifi sëmbë bi ta hoi wakiti a dee dööbuka u di Wosu u Gadu. Wotowan bi dë wakitima a di gaan santa kamian. De bi ta luku taa sëmbë an denda go a di kamian aki. So u de bi ta waka ta lontu di Wosu u Gadu ta hoi wakiti. Ndeti ku didia de bi ta du di wooko aki.”

Dee sëmbë u di kuutuwosu u dee Dju bi sa hakisi dee siköutu aki u de ko wooko da de tu. Dee sëmbë aki nöö dee tiima u Loomë bi ta da pasi u tja fetilai.

Wan womi de kai Joachim Jeremias, di ta öndösuku soni u Bëibel, bi taki taa: „Di dee siköutu bi ko kisi Jesosi, a bi hakisi de faandi mbei de an bi ko kisi ën di a bi ta lei sëmbë soni a di Wosu u Gadu (Mat. 26:55). Jesosi an bi o hakisi de di soni aki ee de an bi dë siköutu di ta wooko a di kamian aki.” Joachim Jeremias bi taki tu taa dee womi dee sëmbë bi manda u de kisi Jesosi u tjëën go söötö, bi dë siköutu di bi ta wooko a di Wosu u Gadu (Joh. 7:32, 45, 46). Bakaten, dee siköutu aki ku di hedima u de bi go kisi dee bakama u Jesosi tja go a di kuutuwosu u dee Dju. A kan tu taa dee siköutu aki bi go hai apösutu Paulosu puu ku taanga a di Wosu u Gadu.​—Tjab. 4:1-3; 5:17-27; 21:27-30.