Dë kabakaba u lei njunjun soni te i ta lei soni u Bëibel

Te u ta seeka u lei soni u Bëibel, nöö a kan taa u ta hakisi useei taa: ’Andi mi o lei?’ Wë hii fa u ta hakisi useei di soni dë, tökuseei u musu ta köni be di soni di u kë lei an tapa u fu wa lei woto njunjun soni di Jehovah kë fuu ko sabi. Unfa u sa dë kabakaba u lei njunjun soni te u ta lei soni u Bëibel?

Begi Jehovah faa da i köni. Hakisi Jehovah faa heepi i fii ko fusutan andi a kë fii ko sabi nöunöu dë (Jak. 1:5). Na ta hoi a dee soni dee i sabi kaa nöö a kaba.​—Nöng. 3:5, 6.

Be di kaakiti u di Wöutu u Gadu wooko a di libi fii. „Di Wöutu u Gadu dë ku libi’’ (Heb. 4:12). Hiniwan pasi te u ta lesi di Wöutu u Gadu, nöö a sa lei u wan njunjun soni, söseei a sa heepi u a tookatooka fasi. Ma u musu kë jabi u hati da dee soni dee Jehovah kë lei u.

Wai ku hiniwan soni di Jehovah ta tei u lei u soni. Dee lei u Jehovah dë kuma peipei sutisuti „njanjan” di a seeka da u (Jes. 25:6). Ee i kë feni wini u de, nöö ja musu ta buta dee soni dee i ta si kuma ja o lobi a wan së. Te ja ta du sö, nöö joo da Jehovah pasi faa heepi i fii ko toon wan möön bunu sëmbë, söseei joo ko möön lo’ u lei soni u Bëibel!