’A bunu da u fuu ko zuntu ku Gadu’!

1-2. (a) Un möiti ta dë fanöudu fuu mbei, fuu ku wan sëmbë sa ko dë mati? (b) Fuun soni woo taki a di woto aki?

I ABI wan gaan mati ö? Unfa i ku ën du ko dë mati? Wë a kan taa i bi ta dë makandi ku ën, taa i bi ko sabi dee soni dee ta taanga dëën, söseei taa i bi ko sabi andi a lobi ku andi an lobi. I bi ko si taa a abi bunu fasi di i bi o kë djeesi ën a de, nöö hën i ko lobi di mati fii.

² A ta tei ten ku möiti fii ku wan sëmbë ko dë mati. Wë sö nöö a ta tei ten ku möiti fuu ku Jehovah Gadu sa ko dë mati tu. Di woto aki o taki unfa u sa ko zuntu ku di Gadu fuu, söseei un wini u ta feni te u du sö. Boo taki fosu faandi mbei a bunu fuu ko zuntu ku Jehovah, di gaan mati fuu.

3. Faandi mbei u musu ta kai pakisei a dee wini dee woo feni te u ta ko dë möön zuntu ku Jehovah? Konda wan woto.

³ An dë u taki taa iseei ta si taa a dë fanöudu fuu ko zuntu ku Jehovah. Ma te u ta kai pakisei a di fa di soni dë bunu tjika, nöö di soni dë sa da u taanga fuu mbei möiti go dou fuu ko zuntu ku ën (Ps. 63:6-8). Hii u tuu sabi taa a dë fanöudu fuu ta njan bumbuu, fuu ta du sport, fuu ta duumi bunu, söseei fuu ta bebe hia wata. Hii fa a dë sö, tökuseei sömëni sëmbë an ta buta pakisei a dee soni aki, nöö a sö wan fasi de an ta buta pakisei a di gösöntu u de. Ma möön u ta buta pakisei a dee wini dee u ta feni te u ta du dee soni aki, möön woo ta kë du de. Wë sö nöö a dë taa u sa sabi taa a dë fanöudu fuu ko zuntu ku Jehovah, ma te u ta kai pakisei a dee wini dee woo feni te u ta du sö, nöö di soni dë sa da u taanga fuu ta mbei möiti go dou fuu ta ko dë möön zuntu ku ën.​—Ps. 119:27-30.

4. Andi di womi di sikifi Psalöm 73:28 bi taki?

⁴ Lesi Psalöm 73:28. Di sëmbë di sikifi psalöm 73 bi dë wan Leifi sëmbë di de bi buta faa ta kanda nasö faa ta pëë poku a di Wosu u Gadu. A musu u dë sö taa a bi dini Jehovah sömëni jaa longi. Ma tökuseei a bi ta si taa a dë fanöudu jeti faa toona mëni hënseei taa a bunu dëën faa „ko zuntu ku Gadu”, söseei a bi ta si taa a dë fanöudu faa mëni wotowan di soni aki tu. Andi da so u dee wini dee u ta feni te u ta du di soni aki?

U TA DË WAIWAI TE U TA „KO ZUNTU KU GADU”

5. (a) Faandi mbei u ta dë waiwai te u ta ko möön zuntu ku Jehovah? (b) Unfa di köni di Jehovah ta da i ta heepi i, söseei unfa a ta tjubi i da hogi? (Nöngö 2:6-16)

⁵ Möön u ta ko zuntu ku Jehovah, möön woo ta dë waiwai (Ps. 65:4). Sömëni soni dë di mbei woo ta dë waiwai te u ta du sö. Wan u dee soni, hën da u ta feni wini u di u ta libi ku dee köni soni dee Jehovah ta piki u a di Wöutu fëën, di Bëibel. Dee soni dee a ta piki u ta heepi u fuu ta köni ku soni di sa tja hogi ko da u, söseei de ta heepi u fu wa mbei gaangaan föutu. (Lesi Nöngö 2:6-16.) Fëën mbei di Bëibel ta taki taa: „Di sëmbë di abi köni o dë waiwai. Di sëmbë di abi köni u si soni a wan bunu fasi, o dë waiwai.”​—Nöng. 3:13.

6. Andi bi mbei taa di psalöm sikifima an bi ko ta dë waiwai möön?

⁶ Dee mati u Jehovah seei ta dë ku tjali so juu. Di womi di sikifi Psalöm 73 an bi ko ta dë waiwai möön, u di a bi bigi ta pakisei soni di an bi ta dëën taanga. A bi ko ta si kuma dee sëmbë dee an bi a’ toobi ku Gadu ku dee Wëti fëën bi ta abi wan möön bunu libi, nöö di soni dë bi ta toobi ën, söseei a bi ko ta haun ku de. A bi ta si kuma dee sëmbë dee bi abi gaanfasi ku dee sëmbë dee bi ta du hogi ku wotowan bi ta feni hii soni di de kë, de bi ta dë gösöntu, söseei hogi an bi ta miti de (Ps. 73:3-7, 12). Di soni aki bi ta toobi di psalöm sikifima aki sö tee taa a bi bigi hakisi hënseei ee na u sösö a bi ta mbei möiti u dini Jehovah. U di a bi ta tjali, mbei a bi taki taa: „U sösö seei mi mbei möiti u ko abi wan limbo hati. U sösö mi wasi mi maun u lei taa ma du hogi.”​—Ps. 73:13.

7. Andi u sa du te u ta tjali? (Luku di peentje tu.)

⁷ Di psalöm sikifima an bi mbei di tjali di a bi ta tjali wini ën. A bi hopo du wan soni. A bi „denda go a di gaan santa kamian u Gadu”, ka Jehovah bi heepi ën faa tooka di pakisei fëën (Ps. 73:17-19). Te u ta tjali, nöö Jehovah, di gaan mati fuu, ta sabi. Ee u begi ën faa tii u, nöö u tei di heepi di a ta da u ku di Wöutu fëën söseei ku dee baaa ku dee sisa u di kemeente, nöö woo feni taanga fuu sa hoi dou, hii fa u ta tjali. Aluwasi ee u ta fii taa dee bookohedi fuu ta möön u, tökuseei Jehovah o da u taanga ku kötöhati.​—Ps. 94:19.a

U SA ABI WAN BUNU LIBI NÖUNÖU, SÖSEEI A DI TEN DI TA KO, TE U TA „KO ZUNTU KU GADU”

8. Un woto wini u ta feni te u ta ko zuntu ku Gadu?

⁸ Te u ta ko zuntu ku Gadu, nöö u ta feni wini fëën a tu woto fasi jeti. Di fosuwan, hën da u ta abi wan bunu libi. Nöö u di u tu, hën da u ta ko dë seiki taa soni o waka bunu da u a di ten di ta ko (Jel. 29:11). Boo taki soni u dee tu wini aki.

9. Unfa di ko di u ta ko zuntu ku Jehovah ta mbei u ko abi wan möön bunu libi?

⁹ Te u ta ko zuntu ku Jehovah, nöö u ta abi wan bunu libi. Sömëni sëmbë u di ten aki di an ta biibi taa Gadu dë, an sabi faandi mbei u dë a libi, söseei de ta si kuma te u kaba fëën nöö libisëmbë an o dë möön. Ma u di u ta lei soni u di Wöutu u Gadu, mbei u ko dë seiki taa Gadu ’dë, söseei taa a ta paka dee sëmbë dee ta suku ën ku wan hati’ (Heb. 11:6). Nöunöu kaa u ta abi wan möön suti libi, u di u ta du di soni di Jehovah mbei u fuu ta du. Di soni dë da di dini di u musu ta dini di Tata fuu di dë a liba ala.​—Deto. 10:12, 13.

10. Unfa Psalöm 37:29 ta piki u taa soni o dë da dee sëmbë dee ta biibi Jehovah?

¹⁰ Sömëni sëmbë an sabi taa Gadu sa mbei de ko abi wan bunu libi a di ten di ta ko. Fëën mbei de ta wooko u de nöö, de ta tööu pai miii, nöö de ta buta möni a wan së da te de go ku pensu. De an sabi andi Gadu paamusi u taa a o du da u a di ten di ta ko. Ma dee sëmbë u Jehovah de de sabi taa Jehovah ta luku dee sëmbë fëën (Ps. 25:3-5; 1 Tim. 6:17). U ta futoou di Gadu di u ko dë mati fëën, söseei u ta biibi dee soni dee a paamusi u. Woo feni sömëni gaan bunu a di ten di ta ko, söseei woo sa dini Gadu u nöömö a di Paladëisi.​—Lesi Psalöm 37:29.

11. Andi ta pasa te u ku Gadu dë mati, nöö unfa u sa mbei a fii?

¹¹ U ta feni sömëni woto wini jeti te u ta ko zuntu ku Gadu. Jehovah paamusi u taa a o da u paadon te u ta tjali u dee zöndu fuu (Jes. 1:18). Fëën mbei an dë u hati fuu ta fon u u nöömö u dee zöndu dee u bi du a di ten di pasa (Ps. 32:1-5). Söseei u ta fii bunu te u ta du soni di ta da Jehovah piizii (Nöng. 23:15). An dë u taki taa sömëni woto bunu dë di u ta feni u di u ku Gadu dë gaan mati. Wë nöö andi i sa du fii sa ta ko möön zuntu ku Gadu?

ANDI I SA DU FII SA TA ’KO MÖÖN ZUNTU KU GADU’

12. Andi i bi du fii bi sa ko zuntu ku Gadu?

¹² Ee i da wan dopudopu Keesitu sëmbë, hën da i ko zuntu ku Jehovah gaanfa kaa. I lei sömëni soni u Jehovah Gadu ku Jesosi Keesitu, i lei taa i ta tjali u dee zöndu dee i bi du a di ten di pasa, i lei taa i ta biibi Gadu tuutuu, söseei i mbei möiti fii du soni di ta kai ku ën. Ma fuu sa ko möön zuntu ku Gadu, nöö u musu ta du dee soni aki go dou.​—Kol. 2:6.

13. Andi da dii soni di sa heepi u fuu sa ta ko möön zuntu ku Jehovah?

¹³ Andi o heepi u fuu sa ta ko möön zuntu ku Gadu? (1) U musu ta lesi di Bëibel, ta öndösuku soni nëën go dou. Te u ta du di soni aki, nöö wa musu ta suku u lei soni u Gadu nöö a kaba. Ma u musu ta mbei möiti fuu ko fusutan andi Gadu kë fuu du, nöö u mbei dee mama wëti dee dë a di Wöutu fëën tii u te u ta du soni (Ef. 5:15-17). (2) U musu ta kai pakisei a hii dee soni dee ta lei taa a lobi u, sö taa di biibi fuu sa ko möön taanga. (3) U musu ta mbei möiti go dou fuu buuse dee soni dee an ta kai ku Jehovah, söseei u musu ta mbei möiti fu wa ko dë mati ku sëmbë di ta du dee lö soni aki.​—Ps. 1:1; 101:3.

14. Andi da wantu soni di u sa ta du hiniwan daka u mbei Jehovah wai, te u luku 1 Kolenti 10:31? (Luku dee peentje tu.)

¹⁴ Lesi 1 Kolenti 10:31. A dë fanöudu seei fuu ta mbei möiti fuu ta du soni di ta kai ku Jehovah, boiti di go di u nango a di peleikiwooko ku dee komakandi. Hii dee soni dee u ta du hiniwan daka seei musu dë soni di ta kai ku Jehovah. Te wa ta ganjan sëmbë, söseei te u ta paati dee soni dee u abi ku wotowan, nöö u ta mbei Jehovah ta wai (2 Kol. 8:21; 9:7). A kë fuu ta lei tu taa u ta kai di libi di a da u gaan soni. Te wa ta njan pasa maaka, te wa ta bebe pasa maaka, söseei te u ta buta mëni a di gözöntu fuu a wan fasi di fiti, nöö u ta ko möön zuntu ku di Sëmbë di da u libi. Hiniwan möiti di u ta mbei u du soni di ta kai ku Jehovah, aluwasi ee a soni di ta djei pikipiki soni seei, o mbei a ko möön lobi u.​—Luk. 16:10.

15. Unfa Jehovah kë fuu ta libi ku wotowan?

¹⁵ Jehovah ta libi bunu ku hii sëmbë, aluwasi ee de ta dini ën nasö de an ta dini ën (Mat. 5:45). Sö nöö a kë fuu seei musu ta libi ku wotowan tu. An kë fuu ’ta kosi sëmbë, ta buja ku sëmbë’, ma a kë ’fuu a’ saapifasi ku lesipeki ta libi suti ku hii sëmbë’ (Tit. 3:2). Fëën mbei wa ta sösö wotowan, aluwasi ee de an ta biibi dee soni dee u ta biibi (2 Tim. 2:23-25). U ta ko möön zuntu ku Jehovah te u ta mbei möiti hii juu fuu ta libi bunu ku hii sëmbë.

U SA „KO ZUNTU KU GADU” ALUWASI EE U MBEI WAN FÖUTU

16. Unfa di womi di sikifi Psalöm 73 bi bigi ta fii baka wan pisiten?

¹⁶ So juu i sa ta fii kuma Jehovah an dë zuntu fii, u di i bi mbei föutu. Ma mëni di woto u di womi di sikifi Psalöm 73. A bi taki taa: „Piki fika möön nöö futu u mi bi kumutu a di pasi. Piki fika möön nöö futu u mi bi mbei mi kooga kai” (Ps. 73:2). A bi taki taa a bi ko „bita”, söseei taa „an bi ko ta si soni limbolimbo möön” a Jehovah fesi, „leti kuma wan mbeti di an bi abi fusutan” (Ps. 73:21, 22). A dë sö taa a bi ko ta fii kuma an bi bunu a Jehovah wojo möön, söseei taa an fiti möön u Jehovah lobi ën, u di a bi mbei wan föutu ö?

17. (a) Andi a djei kuma di psalöm sikifima bi du, hii fa soni bi hebi dëën gaanfa seei? (b) Andi u sa lei a di woto fëën? (Luku dee peentje tu.)

¹⁷ Ee a dë taa di psalöm sikifima bi ta fii kuma Jehovah bi disëën, nöö a musu u dë sö taa an bi fii sö u wan longi pisiten. A djei kuma di soni bi ta hebi dëën gaanfa seei, hën a bi ko fusutan taa a bi musu mbei möiti faa ko möön zuntu ku Gadu. A bi taki taa: „Ma tökuseei ma disa [Jehovah] möönsö. I panjan mi hoi a mi letisë maun. Joo lei mi fa mi musu waka, nöö bakaten joo mbei mi feni gafa tu” (Ps. 73:23, 24). Useei musu suku heepi a Jehovah te wa ta fii taanga nasö te u lasi hati (Ps. 73:26; 94:18). Aluwasi ee futu fuu kumutu a di pasi u wan pisiten, tökuseei u sa toona ko a Jehovah baka, ku di biibi taa a „dë kabakaba u da sëmbë paadon” (Ps. 86:5). U musu ko möön zuntu ku di Gadu fuu, möönmöön te soni ta hebi da u gaanfa seei.​—Ps. 103:13, 14.

„KO ZUNTU KU GADU” U NÖÖMÖ

18. Faandi mbei woo sa ta ko zuntu ku Jehovah u nöömö?

¹⁸ U nöömö seei u sa ta ko zuntu ku Jehovah, söseei u nöömö woo ta lei soni fëën. Di Bëibel ta taki taa dee fasi u Jehovah, ku di köni fëën, ku dee soni dee a sabi aan kaba.​—Lom. 11:33.

19. Fuun soni u sa dë seiki, te u luku dee soni dee sikifi a dee Psalöm?

¹⁹ Psalöm 79:13 ta taki taa: „U da dee sëmbë fii, söseei u da dee sikapu dee dë a di wei fii. Woo ta da i tangi u nöömö. Woo ta gafa i u nöömö.” Iseei sa dë seiki taa joo ta feni gaan bunu u nöömö te i ta mbei möiti go dou fii ta ko zuntu ku Gadu. Nöö iseei sa taki taa: „Gadu da wan sitonu kuun di mi ta futoou ku hii mi hati. Hën da di gudu u mi u nöömö.”​—Ps. 73:26.