Dee soni dee i bi lei a di Bëibel bigibigi sa heepi i tide jeti ö?

1. Unfa dee soni dee i bi lei a di Bëibel bigibigi bi heepi i?

DEE soni dee u bi lei a di Bëibel bigibigi bi tooka u libi. Di u bi ko sabi taa Gadu në da Jehovah, hën u bi mbei möiti fuu bi sa ko dë mati fëën (Jes. 42:8). Di u bi ko sabi andi ta pasa ku wan sëmbë te a dëdë, nöö wa bi ko ta booko u hedi möön ta hakisi useei ee dee sëmbë fuu dee dëdë ta tja sitaafu (Peleik. 9:10). Boiti di dë, di u bi ko sabi taa Gadu paamusi u taa di goonliba o ko dë wan paladëisi, nöö wa bi ko ta booko u hedi möön ku di fa libi fuu o dë amanjan. U bi ko dë seiki taa wa o libi u 70 jaa, u 80 jaa, nasö u wan sati pisiten nöö, ma woo libi u teego.​—Ps. 37:29; 90:10.

2. Unfa 2 Petuisi 1:12, 13 ta lei u taa Keesitu sëmbë di dë gaangaan sëmbë a di biibi seei, ta feni wini u dee soni dee de bi lei a di Bëibel bigibigi?

² Nöiti u musu si dee soni dee u bi lei a di Bëibel bigibigi kuma sösö soni. Apösutu Petuisi bi sikifi di u tu biifi fëën manda da Keesitu sëmbë di bi „ta hoi gingin a dee tuutuu soni u Gadu”. (Lesi 2 Petuisi 1:12, 13.) Ma a di ten dë, hogihati sëmbë bi dë a di kemeente di bi ta mbei möiti u mbei dee baaa ku dee sisa bia baka da Jehovah (2 Pet. 2:1-3). Petuisi bi kë da dee baaa ku dee sisa fëën taanga u de bi sa hoi dou. Fëën mbei a bi toona mëni de so u dee soni dee de bi lei bigibigi. Dee soni dë bi o heepi de u de hoi dou u te di kaba dou.

3. Konda faandi mbei hiniwan Keesitu sëmbë musu ta kai pakisei go dou, a dee soni dee a bi lei a di Bëibel bigibigi.

³ Aluwasi ee u ko dë gaangaan sëmbë a di biibi, tökuseei u sa lei soni jeti a dee soni dee u bi lei a di Bëibel bigibigi. Boo luku wan woto di sa heepi u fuu fusutan di soni dë: Wan sëmbë di sa’ u boi soni, ku wan sëmbë di bigi lei boi soni, sa ta tei dee seei soni u boi wan soni. Ma di sëmbë di sa’ u boi soni, hën a bi feni pasi lei unfa a sa boi peipei sutisuti soni ku dee seei soni dë. Wë sö nöö dee sëmbë dee ta dini Jehovah u wan pisiten, ku dee sëmbë dee bigi lei soni u Bëibel, sa ta lei tookatooka soni a dee soni u Bëibel dee de bi lei bigibigi. Wë a musu u dë sö taa soni ko tooka a u libi, nasö taa u ko abi woto gaandi a di biibi sensi di u dopu. Te u ta libi ku dee soni dee u bi lei longi ten a fesi, nöö u sa ko si unfa dee soni dë sa heepi u a woto fasi. Boo luku andi dee Keesitu sëmbë dee dë gaangaan sëmbë a di biibi, sa lei a dii soni u Bëibel di u bi lei bigibigi.

JEHOVAH HËN MBEI HII SONI

4. Unfa di sabi di u sabi taa Jehovah hën mbei hii soni ta heepi u?

⁴ „Di sëmbë di mbei hii soni da Gadu” (Heb. 3:4). U sabi taa wan gaan köni Sëmbë di abi hii makiti, hën mbei di goonliba di u dë nëën aki, ku hii dee soni dee ta libi nëën. Hën mbei u, nöö a sabi u te dou. Ma di suti u di woto, hën da a ta booko hën hedi ku u tu. A sabi andi bunu da u. Di sabi di u sabi taa Jehovah hën mbei hii soni, mbei taa libi fuu ko dë wan hii woto fasi, nöö u ko sabi faandi mbei u dë a libi.

5. Un lei u Bëibel sa heepi u fuu ko abi sakafasi? (Jesaaja 45:9-12)

⁵ Di sabi di u ko sabi taa Jehovah hën mbei hii soni, sa heepi u fuu ko abi sakafasi. Baka di Jöpu bi ko ta buta pakisei nëën seei ku woto libisëmbë poi, hën Jehovah bi toona mëni ën taa hën da di Sëmbë di mbei hii soni (Jöpu 38:1-4). Di soni aki bi heepi Jöpu faa ko si taa di fasi fa Jehovah ta si soni, hei möön di fasi fa libi sëmbë ta si soni. Di tjabukama de kai Jesaaja seei bi taki taa: „I si kuma wan pisi pötöpötö sa hakisi di sëmbë di ta tei ën u mbei wan soni taa ’Andi seei i ta mbei’ ö?”​—Lesi Jesaaja 45:9-12.

6. Na un ten a ta dë fanöudu seei fuu pakisei fa di Sëmbë di mbei u köni tjika, söseei fa a abi makiti tjika? (Luku dee peentje tu.)

⁶ Te wan Keesitu sëmbë ta ko abi öndöfeni, nöö a sa bigi ta buta futoou gaanfa poi a di fasi fa a ta si soni, ka faa ta suku heepi a Jehovah ku di Wöutu fëën (Jöpu 37:23, 24). Ma unfa a dë ee wan sëmbë ta kai pakisei a di fasi fa di Sëmbë di mbei u köni tjika, söseei fa a hei tjika? (Jes. 40:22; 55:8, 9). Wë di soni aki o heepi ën faa sa abi sakafasi go dou, söseei faa sa bia du soni woto fasi.

7. Andi Rahela bi du, sö taa a bi sa libi ku wan soni di bi tooka a di ölganisaasi?

⁷ Wan sisa de kai Rahela, di ta libi a di köndë Solofeinia, bi ko si taa di buta di a bi ta buta pakisei a di Sëmbë di mbei ën, bi heepi ën faa sa libi ku wan soni di bi tooka a di ölganisaasi. A bi taki taa: „So juu a bi ta taanga da mi u mi libi ku dee soni di dee baaa dee ta tei fesi ta tooka a di ölganisaasi. Hii fa mi bi luku di Update nr. 8 fu a Tiri Skin 2023, tökuseei mi bi panta di fosu pasi di mi bi si wan baaa ku bia ta hoi wan taki. Fëën mbei mi bi begi Jehovah faa heepi mi u mi sa libi ku di soni di tooka dë.” Rahela bi ko fusutan taa u di Jehovah hën mbei liba ala ku goonliba aki, mbei a sa tii di ölganisaasi fëën a di möön bunu fasi. Ee a ta taanga da i fii libi ku wan soni di tooka a di ölganisaasi, nasö ku wan njunjun fasi fa u ko ta fusutan wan soni, nöö i sa kai pakisei a di fa di Sëmbë di mbei u köni tjika, söseei fa a abi makiti tjika.​—Lom. 11:33-36.

FAANDI MBEI GADU TA DA PASI TAA SËMBË TA TJA SITAAFU?

8. Unfa di sabi di u ko sabi faandi mbei Gadu ta da pasi taa sëmbë ta tja sitaafu, ta mbei u feni wini?

⁸ Faandi mbei Gadu ta da pasi taa sëmbë ta tja sitaafu? So sëmbë hati ta boonu ku Gadu, nasö de ta si kuma Gadu an dë tuutuu, u di de an sabi faandi mbei Gadu ta da pasi taa sëmbë ta tja sitaafu (Nöng. 19:3). Ma ii ko sabi taa di zöndu di u feni a Adam ku Eva hën mbei taa libisëmbë ko ta tja sitaafu, na Jehovah. I ko sabi tu taa u di Jehovah abi pasensi, mbei milionmilion sëmbë ko sabi ën, söseei de ko sabi unfa a o puu fuka u teego (2 Pet. 3:9, 15). U di i ko sabi faandi mbei Gadu ta da pasi taa sëmbë ta tja sitaafu, mbei i ko feni kötöhati, söseei i ko möön zuntu ku Gadu.

9. Na un ten a sa dë fanöudu seei, fuu toona buta pakisei a dee soni dee mbei Gadu ta da pasi taa sëmbë ta tja sitaafu?

⁹ U ta fusutan faandi mbei a dë fanöudu fuu ta hoi pasensi, ta wakiti u Jehovah puu fuka a goonliba. Ma te u, nasö wan sëmbë fuu abi bookohedi, te sëmbë ta libi hogi ku u, nasö te wan sëmbë fuu lasi libi, nöö u sa ta hakisi useei ee faandi mbei Jehovah an ta hopo du soni möön hesi (Hab. 1:2, 3). A dee ten dë, a ta bunu fuu buta pakisei a dee soni dee mbei Jehovah ta da pasi u dee bunuhati sëmbë ta tja sitaafua (Ps. 34:19). U sa buta pakisei tu a di puu di a o puu fuka u teego te di ten fëën dou.

10. Unfa Anne bi feni kötöhati di hën mama bi lasi libi?

¹⁰ Te u ko sabi faandi mbei Gadu ta da pasi taa sëmbë ta tja sitaafu, nöö di soni dë sa heepi u fuu hoi dou te soni ta taanga da u. Wan sisa de kai Anne, di ta libi a di paati de kai Mayotte, bi taki taa: „Mi bi ta tjali seei di mi mma bi lasi libi wantu jaa pasa. Ma hii juu mi bi ta mbei möiti u mi ta hoi a pakisei taa na Jehovah hën ta mbei libisëmbë ta tja sitaafu. A kë puu di soni de kai sitaafu a goonliba, söseei a kë weki dee sëmbë fuu dee dëdë ko a libi baka. Te mi ta kai pakisei a dee soni aki, nöö de ta da mi kötöhati a wan apaiti fasi seei.”

11. Unfa di sabi di u sabi faandi mbei Jehovah ta da pasi taa sëmbë ta tja sitaafu, ta heepi u fuu sa du di peleikiwooko go dou?

¹¹ Di sabi di u sabi faandi mbei Jehovah ta da pasi taa sëmbë ta tja sitaafu, sa da u taanga fuu ta du di peleikiwooko go dou. Baka di Petuisi bi taki taa di pasensi u Gadu ta heepi dee sëmbë dee ta tjali u dee zöndu u de, u de feni libi, hën a bi taki taa: „Un musu pakisei luku un pei sëmbë un musu dë e. Un musu ta tja unuseei a wan limbolimbo fasi, ta du soni di ta lei taa un ta dini Gadu fajafaja” (2 Pet. 3:11). Wan u dee fasi fa u ta ’du soni di ta lei taa u ta dini Gadu fajafaja’, hën da te u ta peleiki. U lobi sëmbë leti kuma u Tata. U kë u de dë a di njunjun goonliba u Gadu ka hii soni o ta waka bunu. Jehovah ta da dee sëmbë u di pisiwata fii pasi u de sa ko dini ën. I abi di okasi u wooko makandi ku Jehovah, u heepi sömëni sëmbë u de ko sabi soni fëën ufö di kaba dou. Wan gaandi seei wë i abi dë e!​—1 Kol. 3:9.

U TA LIBI A „DEE LASITI DAKA U DI GOONLIBA AKI”

12. Unfa di sabi di u sabi taa u ta libi a „dee lasiti daka u di goonliba aki” ta heepi u?

¹² Di Bëibel ta piki u gbelingbelin unfa sëmbë bi o dë a „dee lasiti daka u di goonliba aki” (2 Tim. 3:1-5). Luku nöö u musu luku lontu ko kai, fuu sa si taa di tjabukama woto aki ta pasa tuutuu. Di si di u ta si fa sëmbë ta libi hogi nango möönmöön, ta mbei u ko dë möön seiki taa di Wöutu u Gadu ta taki tuutuu soni.​—2 Tim. 3:13-15.

13. Andi u sa hakisi useei, te u luku di woto di Jesosi bi konda a Lukasi 12:15-21?

¹³ Di sabi di u sabi taa u ta libi a dee lasiti daka, ta heepi u fuu ta wooko ku di ten fuu a di möön bunu fasi. U sa si faandi mbei a dë fanöudu fuu du di soni aki, te u luku di woto di Jesosi bi konda a Lukasi 12:15-21. (Lesi ën.) Faandi mbei de bi kai di guduma ’donma!’? De an bi kai ën sö u di a bi gudu, ma u di an bi ta buta pakisei a dee möön fanöudu soni. A bi ta ’suku gudu a goonliba aki, söndö faa ta suku u libi kumafa Masa Gadu kë, faa sa feni gudu nëën ala’. Faandi mbei u sa taki taa di womi aki bi mbei wan gaan föutu, u di an bi wooko ku di ten fëën a wan bunu fasi? Wë u di Gadu bi piki ën taa: „A di ndeti aki seei joo lasi i libi.” U di ten an fika hia möön ufö di kaba dou, mbei a bunu fuu hakisi useei dee soni aki: ’Dee soni dee mi ta kë du, ta lei taa mi ta wooko ku di ten u mi a wan bunu fasi ö? Andi mi ta da dee mii u mi taanga u de du? Mi ta wooko ku di ten u mi, ku di kaakiti u mi, söseei ku dee soni dee mi abi u suku gudu da miseei, naa mi ta biinga u mi feni gudu a Gadu ala.’

14. Te u luku di woto u Miki, nöö faandi mbei a dë wan köni soni fuu ta kai pakisei a dee soni di di Bëibel ta taki, di ta lei taa u ta libi a dee lasiti daka?

¹⁴ Hii di fasi fa u ta si di libi sa tooka, te u ta buta pakisei a dee soni dee ta lei taa u ta libi a dee lasiti daka u di goonliba aki. Di soni aki hën bi pasa ku wan sisa de kai Miki. A bi taki taa: „Di mi bi feni di diploma u mi, nöö mi bi ta fii seei u mi du wan wooko ka mi bi o sa ta öndösuku soni u dee mbeti. Mi bi kë du di kowoonu pioniliwooko tu, söseei mi bi kë go heepi a wan kamian ka möön peleikima bi dë fanöudu. So mati u mi di bi dë gaangaan sëmbë a di biibi, bi da mi taanga u mi wegi finifini luku ee mi bi o sa du di wooko di mi bi kë du dë, söndö faa tapa mi u mi du dee soni dee mi bi kë du da Jehovah. De bi toona mëni mi taa di kaba u di goonliba aki hën a o dou abiti möön. Ma a di njunjun goonliba, mi o abi okasi u mi sa ta öndösuku soni u sömëni peipei mbeti u teego. Fëën mbei mi bi bia go a wan siköö di an bi tei hia ten u mi, söseei ka mi bi sa lei u du wan wooko. Di soni aki bi mbei taa mi bi sa feni wan wooko, di bi ta heepi mi u mi bi sa ta sölugu miseei, ta du di pioniliwooko. Fëën mbei bakaten, mi bi sa go a di köndë de kai Ekwadölu, ka möön peleikima bi dë fanöudu.” Nöunöu sisa Miki, ku hën manu, ta du di keling-wooko a di köndë dë.

15. Unfa a sa pasa taa sëmbë ko tei di bunu buka bakaten? Konda wan woto. (Luku dee peentje tu.)

¹⁵ Wa musu lasi hati te sëmbë an kë haika di bunu buka wantewante. Sëmbë sa tooka. Luku unfa soni bi dë da di baaa u Jesosi de kai Jakobosi. A bi si fa Jesosi bi ta göö u tefa a ko bigi, a bi si fa a bi ko dë di Mësiasi, söseei a bi si fa a bi ta lei sëmbë soni a wan fasi di sëmbë an bi lei wotowan soni wan daka. Ma tökuseei Jakobosi bi dë sömëni jaa longi, söndö faa waka a Jesosi baka. Di Jesosi bi toona weki ko a libi baka ufö hën baaa bi ko dë bakama fëën, nöö hën baaa bi ko dë gaagaa a di biibi seeib (Joh. 7:5; Gal. 2:9). Ja musu si kuma u sösö seei i ta peleiki da dee sëmbë fii dee an tei di bunu buka jeti, söseei ja musu ko wei u peleiki da dee woto sëmbë dee an bi kë jei di bunu buka u di Könuköndë wantewante. Hoi a pakisei taa u ta libi a dee lasiti daka u di goonliba aki, nöö ten an fika hia möön fuu du di peleikiwooko. A kan taa dee soni dee i ta piki de nöunöu sa heepi de bakaten, aluwasi baka te di gaan fuka bigi.c

TEI ËN U BIGI TAA JEHOVAH TA TOONA MËNI U SONI

16. Unfa i bi feni wini u dee soni dee Jehovah ta toona mëni u? (Luku di pisi „Tei dee soni aki u heepi wotowan”.)

¹⁶ So u dee soni dee ta dë a dee buku ku dee fëlön fuu, ta dë da sëmbë di an sabi soni u Bëibel wan bëtë. So u dee woto ku dee fëlön dee ta dë a jw.org, dee buku dee u ta paati da sëmbë a di peleikiwooko, ku dee taki dee u ta hoi hiniwan wiki, dë möönmöön da dee sëmbë dee an dë Kotoigi. Hii fa soni dë sö, tökuseei u ta feni wini u dee soni dë tu. De ta heepi u fuu ko möön lobi Jehovah, fuu ko ta möön biibi dee soni dee sikifi a di Wöutu fëën, söseei de ta heepi u fuu ko möön sa u lei sëmbë dee fanöudu soni u Bëibel.​—Ps. 19:7.

17. Na un ten a sa bunu seei fii buta pakisei a dee soni dee i bi lei a di Bëibel bigibigi?

¹⁷ U di u dë Jehovah Kotoigi, mbei u ta wai te u ko fusutan wan lei u Bëibel möön bunu. Ma u ta wai seei ku dee soni dee u bi lei a di Bëibel bigibigi, dee bi hai u ko a di tuutuu lei. Ee a ko pasa wan daka taa u kë du soni kumafa u ta pakisei, ka fuu du soni kumafa di ölganisaasi u Jehovah ta lei u, nöö a bi o bunu fuu toona mëni ambë da di sëmbë di ta tii di ölganisaasi aki. Di sëmbë dë da di köni Gadu di mbei hii soni, söseei di abi hii makiti. Te soni ta miti u, nasö te soni ta miti wan sëmbë fuu, nöö u sa hoi pasensi, nöö u pakisei faandi mbei Jehovah ta da pasi taa sëmbë ta tja sitaafu. Boiti di dë, te woo luku unfa woo wooko ku di ten fuu, nasö ku dee soni dee u abi, nöö u sa hoi a pakisei taa u ta libi a dee lasiti daka, nöö ten an fika hia möön. Be di mëni di Jehovah ta toona mëni u a soni heepi u go dou fuu sa ko köni, söseei fuu sa hoi useei nëën go dou.