Biibi taa Jehovah lobi i

1. Faandi mbei i buta i libi a Jehovah maun? (Luku di peentje tu.)

I TA mëni jeti di i bi buta i libi a Jehovah maun ö? I bi du di soni aki u di i bi lei soni fëën, söseei u di i bi ko lobi ën. I bi paamusi ën taa di dini di i ta dini ën bi o dë di möön fanöudu soni a i libi, söseei taa i bi o ta lobi ën go dou ku hii i hati, ku hii i libi, ku hii i pakisei, söseei ku hii i kaakiti (Maik. 12:30). Sensi di ten dë, hën i ko ta lobi ën möönmöön. Wë nöö unfa i bi o piki ee wan sëmbë hakisi taa: „I dë seiki taa i lobi Jehovah u?” A musu dë sö taa i bi o piki wante taa: „Mi lobi ën möön hii soni, söseei möön hii sëmbë!”

2-3. Andi Jehovah kë fuu biibi, nöö andi woo luku a di woto aki? (Jelemia 31:3)

² Unfa i bi o piki ee wan sëmbë hakisi i taa: „I dë seiki taa Jehovah lobi i ö?” A dë sö taa i bi o tei ten ufö i piki, u di i ta si kuma ja fiti u Jehovah lobi i ö? Wan sisa di soni bi taanga dëën di a bi dë miii, bi taki taa: „Mi sabi taa mi lobi Jehovah. Mi dë seiki u di soni dë. Ma di soni di ma ta kaba dë seiki fëën so juu, hën da ee Jehovah lobi mi.” Ma unfa Jehovah ta si i tuutuu?

³ Jehovah kë fii dë seiki taa a lobi i. (Lesi Jelemia 31:3.) Fuu taki ën kumafa a dë, nöö Jehovah seei hën hai i tja ko nëën. Nöö di i buta i libi nëën maun, hën i dopu, hën a da i wan gaan dii kado. Di kado dë da di lobi fëën. Di lobi dë da wan taanga lobi di an ta kaba möönsö. Di lobi dë ta mbei a ta si dee dinima fëën dee ta hoi deseei nëën kuma „wan apaiti gudu” di a abi (Mal. 3:17). Jehovah kë fii dë seiki taa a lobi i, leti kumafa apösutu Paulosu bi dë seiki taa Jehovah lobi ën. Paulosu bi taki gbelin taa: „Mi dë seiki taa na wan soni dë di sa paati u ku di fa Gadu lobi u tjika aki e. Na dëdë, na libi, na wan basia u Gadu köndë, na wan soni u di ten u dë aki, na wan soni u bakaten tu, na wan makiti sa paati u puu a di lobi u Gadu aki. Na wan soni a liba ala, na wan soni a basu aki tu. Na wan kodo soni seei a hii di mundu di Gadu mbei aki abi di kaakiti u sa paati u ku di lobi di Gadu lobi u aki e, dee sëmbë” (Lom. 8:38, 39). A di woto aki, woo luku faandi mbei u musu mbei möiti fuu ko dë seiki taa Jehovah lobi u, söseei woo luku andi sa heepi u fuu du di soni aki.

FAANDI MBEI U MUSU BIIBI TAA JEHOVAH LOBI U?

4. Andi u sa du u Saatan ’an feni u kisi ku wan u dee hogi köni fëën a ta boi’?

⁴ Te u ta biibi taa Jehovah lobi u, nöö Saatan ’an o feni u kisi ku wan u dee hogi köni fëën a ta boi’ (Ef. 6:11). Saatan o du hii soni di a sa du u tapa u fu wa dini Jehovah möön. Wan u dee hogi köni u Saatan, hën da a ta suku u mbei u biibi taa Jehovah an lobi u. Na fëëkëtë taa lulu Saatan ta lulu u. A lo’ u ko a u te wa dë sö taanga. A sa dë te u ta fii bookosaka u soni di bi pasa ku u, u dee soni dee ta miti u nöunöu, nasö a sa dë te wa kaba dë seiki unfa soni o go da u a di ten di ta ko (Nöng. 24:10). Saatan dë kuma wan lëun di ta suku u kisi wan mbeti di an sa heepi hënseei. Hën da a ta suku u kisi u te wa kaba dë sö taanga, sö taa u sa disa u dini Jehovah. Ma ee u ta mbei möiti go dou fuu ko dë möön seiki taa Jehovah lobi u, nöö an o taanga da u sö fuu finga futu da Saatan ku dee taapu fëën.​—1 Pet. 5:8, 9; Jak. 4:7.

5. Faandi mbei a dë fanöudu taa u ta fii taa Jehovah lobi u?

⁵ Te u ta biibi taa Jehovah lobi u, nöö u ku ën ta ko dë möön gaan mati. Luku faandi mbei u sa taki di soni dë. Jehovah mbei u fuu sa ta lobi wotowan, söseei u wotowan sa ta lobi u. Te wan sëmbë lei u taa a lobi u, nöö di soni dë ta mbei u ta kë lobi ën tu. Fëën mbei möön u ta fii taa Jehovah lobi u, nöö möön useei o ta lobi ën tu (1 Joh. 4:19). Möön woo ta lobi ën, nöö möön hënseei o ta lobi u tu. Di Bëibel ta piki u gbelin taa: „Ko zuntu u Gadu, nöö a o ko zuntu fii tu” (Jak. 4:8). Wë nöö unfa u sa ko dë seiki taa Jehovah lobi u?

ANDI SA HEEPI U FUU BIIBI TAA JEHOVAH LOBI U?

6. Ee u kë ko ta biibi taa Jehovah lobi u, nöö andi u sa hakisi ën?

⁶ I musu ta begi Jehovah faa heepi i fii ko fusutan faandi mbei a lobi i (Luk. 18:1; Lom. 12:12). Ee a dë fanöudu, nöö i sa ta hakisi Jehovah sömëni pasi a wan daka, faa heepi i fii ko ta si iseei kumafa a ta si i. A dë sö tuu taa so juu hati fii sa ta mbei i si kuma Jehovah an lobi i. Ma hoi a pakisei taa Jehovah bigi möön i hati (1 Joh. 3:19, 20). A sabi i möön fa i sabi iseei. A ta si dee soni dee sa ta taanga da i fii si (1 Sam. 16:7; 2 Klon. 6:30). Fëën mbei a bunu fii ta konda finifini dëën unfa i ta fii, nöö i ta hakisi ën faa heepi i fii biibi taa a lobi i (Ps. 62:8). Te i begi ën kaa, nöö a dë fanöudu fii du dee soni dee woo taki nöunöu.

7-8. Unfa di buku Psalöm ta heepi u fuu dë seiki taa Jehovah lobi u?

⁷ Biibi dee soni dee Jehovah ta taki. A mbei dee sëmbë dee sikifi Bëibel konda da u unfa a dë tuutuu. Buta pakisei a di waiti fasi fa Dafiti ta konda soni u Jehovah da u. A bi taki taa: „Jehovah dë zuntu u dee sëmbë dee lasi hati. A ta heepi dee sëmbë dee ta fii booko saka” (Ps. 34:18). Te i ta tjali, nöö i sa fii kuma i dë i wanwan. Ma Jehovah paamusi i taa a dee pisiten dë a ta dë zuntu ku i, u di a ta si taa i abi ën fanöudu möön gaanfa. Dafiti bi taki a wan woto tëkisi a di buku Psalöm taa: „Buta dee wojo wata u mi a di bata fii di i mbei ku mbeti kakisa” (Ps. 56:8). Jehovah ta si te soni ta taanga da i. A ta booko hën hedi gaanfa seei ku i, söseei a ta fii ku i. A dë kuma a ta kisi dee wojo wata fii buta a wan kamian, nöö a ta kai de gaan soni, leti kumafa wan sëmbë di ta waka a wan sabana ta kai di wata di dë a di bata fëën gaan soni. Psalöm 139:3 ta taki taa: „I [Jehovah] sabi hii dee soni dee mi ta du.” Jehovah ta si hii dee soni dee i ta du, ma a ta buta pakisei a dee bunu soni (Heb. 6:10). Faandi mbei? Wë u di a ta tei hii dee möiti dee i ta mbei u dini ën, u bigi.a

⁸ Jehovah ta piki i ku dee Bëibel tëkisi aki unfa a lobi i tjika, söseei unfa a ta booko hën hedi ku i tjika. Ma kumafa u bi taki kaa, nöö Saatan ta suku u mbei i biibi taa Jehovah an lobi i. Fëën mbei ee so juu i ta si kuma kandë Jehovah an lobi i, nöö a bunu fii hakisi iseei taa: ’Ambë mi o biibi? ’Di sëmbë ka mindi soni ku lëgëdë kumutu’, naa „di Gadu di ta taki tuutuu soni”?’​—Joh. 8:44; Ps. 31:5.

9. Andi Jehovah paamusi dee sëmbë dee lobi ën? (Ëkisodesi 20:5, 6)

⁹ Pakisei unfa Jehovah ta si dee sëmbë dee lobi ën. Buta pakisei a di soni di Jehovah bi piki Mosesi ku dee Isaëli sëmbë. (Lesi Ëkisodesi 20:5, 6.) Jehovah paamusi u taa hii juu seei a o ta lobi dee sëmbë dee lobi ën. U di Jehovah da wan Gadu di ta hoi hënseei a sëmbë, mbei u sa dë seiki taa an o dë, nöö an toona lobi wan dinima fëën di lobi ën (Neh. 1:5). Fëën mbei ee so juu i ta fii kuma Jehovah an lobi i, nöö a bunu fii hakisi iseei taa: ’Mi lobi Jehovah u?’ Baka di dë, nöö i pakisei di soni aki: Ee i lobi Jehovah, söseei ee i ta mbei hii möiti u du soni di ta dëën piizii, nöö i sa dë seiki taa a lobi i seei te na soni (Dan. 9:4; 1 Kol. 8:3). Hën da ee i dë seiki taa i lobi Jehovah, nöö an dë fii ta si kuma an lobi i. I sa dë seiki taa hii juu a o ta lobi i, söseei an o disa i möönsö.

10-11. Unfa Jehovah kë fii ta si di lusupaima? (Galasia 2:20)

¹⁰ Kai pakisei a di lusupaima. Di dëdë di Jesosi ko dëdë paka paima da u, da di möön gaan kado di Jehovah da libisëmbë (Joh. 3:16). Ma a dë sö taa di soni dë da wan kado di Jehovah da i vö u? Wë aai! Luku di woto u apösutu Paulosu. Hoi a pakisei taa a bi du wantu gaangaan zöndu ufö a ko dë wan Keesitu sëmbë, söseei a bi musu ta mbei möiti go dou faa disa dee fasi fëën dee an bi ta kai ku Jehovah (Lom. 7:24, 25; 1 Tim. 1:12-14). Ma tökuseei a bi ko ta si di lusupaima kuma wan kado di Jehovah bi dëën vö. (Lesi Galasia 2:20.) Hoi a pakisei taa Jehovah bi mbei Paulosu sikifi dee soni aki buta a di Bëibel, nöö hii soni di sikifi a di Bëibel, sikifi u lei u wan soni (Lom. 15:4). Dee soni dee Paulosu bi taki, ta heepi i fii si unfa Jehovah kë fii ta si di lusupaima. A kë fii ta si ën kuma wan kado di a da i vö. Te i ko ta si di lusupaima a di fasi aki, nöö joo ko dë seiki taa Jehovah lobi i vö.

¹¹ U ta da Jehovah tangi taa a manda Jesosi ko a goonliba aki ko dëdë da u. Ma wan woto soni di mbei taa Jesosi bi ko a goonliba aki, hën da faa bi sa konda da sëmbë unfa Gadu dë tuutuu (Joh. 18:37). Jesosi bi lei u tu unfa Jehovah lobi u tjika.

UNFA JESOSI TA HEEPI U FUU BIIBI TAA JEHOVAH LOBI U?

12. Faandi mbei u sa biibi dee soni u Jehovah dee Jesosi bi konda da u?

¹² Di Jesosi bi dë a goonliba aki, nöö ku piizii seei a bi konda da u unfa Jehovah dë (Luk. 10:22). U sa biibi dee soni u Jehovah dee Jesosi bi konda da u. Jesosi bi libi wan gaan longi pisiten a liba ala ku Jehovah, ufö a ko a goonliba aki (Kol. 1:15). Jesosi bi si ku hënseei wojo unfa Jehovah lobi dee mii fëën a liba ala ku goonliba aki tjika, te kisi hënseei tu. Unfa Jesosi ta heepi wotowan u de biibi taa Gadu lobi de?

13. Unfa Jesosi kë fuu ta si Jehovah?

¹³ Jesosi kë fuu ta si Jehovah kumafa a ta si ën. A dee buku dee ta taki soni u di libi u Jesosi di a bi dë goonliba aki, Jesosi ta kai Jehovah „Taata” möön leki 160 pasi. Nöö te a bi ta fan ku dee bakama fëën, nöö a bi ta kai Jehovah „di Tata fuunu” nasö ’di Tata fuunu di dë a liba’ (Mat. 5:16; 6:26). Ufö Jesosi bi ko a goonliba aki, nöö dee dinima u Jehovah bi ta kai Jehovah di ’Gadu di abi hii makiti’, di ’Kaba Hei Gadu’, di ’Gadu di mbei hii soni a mundu’, ku woto fasi jeti. Ma Jesosi bi lo’ u kai Jehovah u ’Tata’. Di soni aki ta lei u taa Jehovah kë taa dee dinima fëën fii taa a dë mati u de, leti kumafa wan mii ta fii taa hën ku hën tata dë mati. Wë a dë gbelingbelin u si taa Jesosi kë fuu ta si Jehovah kumafa a ta si ën. A kë fuu ta si ën kuma di Tata fuu di lobi u, di ta booko hën hedi ku dee mii fëën. Boo buta pakisei a tu okasi ka Jesosi bi kai Jehovah „Taata”.

14. Unfa Jesosi lei taa di Tata fuu di dë a liba ala ta kai hiniwan fuu gaan soni? (Mateosi 10:29-31) (Luku di peentje tu.)

¹⁴ Boo taki fosu u di soni di Jesosi bi taki a Mateosi 10:29-31. (Lesi ën.) Dee fou dee Jesosi bi ta taki soni u de aki, bi dë piki fou di an o lobi Jehovah nöiti, söseei di an o dini ën nöiti. Ma tökuseei di Tata fuu ta kai hiniwan u de fou aki gaan soni sö tee taa a ta sabi te wan u de puu kai a goon. Wë nöö an dë u taki taa a ta möön kai dee sëmbë dee ta dini ën u di de lobi ën, gaan soni! Jesosi bi taki tu taa di Tata fuu sabi un mëni uwii dë a hiniwan fuu hedi. U di Jehovah sabi hii soni fuu te kisi dee pikipiki soni fuu seei, mbei u sa dë seiki taa a ta booko hën hedi ku u gaanfa seei. Awa, Jesosi kë fuu biibi taa Jehovah ta kai hiniwan fuu gaan soni.

15. Andi dee soni dee Jesosi bi taki a Johanisi 6:44 ta lei i u di Tata fii di dë a liba ala?

¹⁵ Boo taki u di u tu okasi ka Jesosi bi kai Jehovah „Taata”. (Lesi Johanisi 6:44.) Di Tata fii di dë a liba seei hën hai i ko a di tuutuu lei. Faandi mbei a hai i ko a di tuutuu lei? Wë u di a si taa i abi wan hati di ta kë du bunu soni (Tjab. 13:48). Di Jesosi bi taki dee soni dee sikifi a Johanisi 6:44, nöö a kan taa a bi ta taki u di soni di Jehovah bi taki a Jelemia 31:3. Jehovah bi piki dee sëmbë fëën a di tëkisi dë taa: „Mi hai [unu] ko a mi ku lobi.” (Jel. 31:3; luku Hosea 11:4). Pakisei andi di soni dë kë taki. Hii juu di Tata fuu a liba ala di lobi u, ta si bunu a i di iseei an ta si.

16. (a) Andi u sa taki taa Jesosi ta piki u, nöö faandi mbei u musu biibi ën? (b) Andi i sa du fii ko ta möön biibi taa Jehovah da di Tata di i abi fanöudu? (Luku di pisi „Di Tata di hii u tuu abi fanöudu”.)

¹⁶ U di Jesosi ta kai Jehovah u Tata, mbei a dë kuma a ta piki u taa: „Na mi Tata nöö Jehovah dë e, ma a dë unu Tata tu. Nöö mi sa piki u unu gbelin taa a lobi unu, söseei taa a ta booko hën hedi ku hiniwan fuunu gaanfa seei.” Fëën mbei ee so juu i ta si kuma Jehovah an lobi i, nöö a bunu fii hoi a pakisei taa Jesosi da di sëmbë di möön sabi di Tata fuu, söseei hii juu a ta taki tuutuu soni. Baka di dë, nöö i hakisi iseei taa: ’Mi musu biibi dee soni di di Womi Mii u Gadu ta taki ö?’​—1 Pet. 2:22.

MBEI MÖITI GO DOU FII KO TA MÖÖN BIIBI TAA GADU LOBI I

17. Faandi mbei u musu ta mbei möiti go dou fuu ko ta möön biibi taa Jehovah lobi u?

¹⁷ U musu ta mbei möiti go dou fuu ko ta möön biibi taa Jehovah lobi u. Kumafa u bi taki a fesi kaa, nöö hii juu Saatan, di felantima fuu di ta boi hogi köni, o ta suku u tapa u fu wa dini Jehovah. A o ta mbei möiti nöömö u mbei u ko ta si kuma Gadu an lobi u. Wa musu dëën pasi faa wini u!​—Jöpu 27:5.

18. Andi i sa du fii sa ko ta möön biibi taa Jehovah lobi i?

¹⁸ Fii sa ko ta möön biibi taa Jehovah lobi i, nöö i musu ta begi ën go dou faa heepi i fii ta si iseei kumafa a ta si i. Kai pakisei a di fasi fa dee womi dee Jehovah mbei sikifi di Bëibel, ta lei u taa Jehovah abi lobi tjika. Kai pakisei a di fasi fa a ta libi ku dee sëmbë dee ta lei ën taa de lobi ën. Hoi a pakisei taa hii juu Jehovah o ta lobi wan sëmbë di lobi ën. Na fëëkëtë nöiti taa Jehovah da hiniwan fuu di lusupaima kuma wan kado. Boiti di dë, biibi taa Jehovah da i Tata, kumafa Jesosi bi taki. Nöö te wan sëmbë hakisi i taa: „I dë seiki taa Jehovah lobi i ö?” Nöö joo sa piki ën wantewante dë taa: „Aai, a lobi mi! Nöö mi ta mbei möiti hiniwan daka u miseei lei ën taa mi lobi ën tu!”