Unfa u sa finga futu da dee hogi soni dee hati fuu ta kë du?

1. Andi ta miti hii zöndu libisëmbë?

A PASA kaa taa i bi ta fii gaanfa seei u du wan soni di Jehovah an lobi ö? Wë ee sö soni dë da i, nöö na lasi hati. Di Bëibel ta taki taa: „Dee soni dee ta pooba i hiniwan daka dë, na tooka soni de dë. De seei ta pooba otowan tu” (1 Kol. 10:13). Di soni aki kë taki taa dee tesi dee ta miti u ta miti wotowan tu. Ja dë i wanwan. Boiti di dë, Jehovah sa heepi i fii wini di feti.

2. Un pei tesi so Keesitu sëmbë ku so sëmbë di ta lei soni u Bëibel, ta abi? (Luku dee peentje tu.)

² Di Bëibel ta taki tu taa: „Tesi ta miti hiniwan sëmbë u di dee taku hangi dee dë nëën hati, ta hai ën faa du hogi” (Jak. 1:14). Di soni di ta hai sëmbë u de du hogi, ta tooka a sëmbë ku sëmbë. So Keesitu sëmbë sa ta fii u de libi fanafiti a di së u manu ku mujëë soni. Wotowan sa ta fii u duumi ku wan womi nasö ku wan mujëë kuma deseei. Dee sëmbë dee bi disa u luku fanafiti soni a di së u womi ku mujëë, sa ta fii u toona ta luku dee soni dë baka. Sömëni sëmbë di bi disa u tei drugs, nasö di bi disa u bebe daan dööngö, sa ta fii tu u de bigi du dee soni dë baka. Dee soni aki da wantu u dee soni dee ta dë tesi da so Keesitu sëmbë, ku so sëmbë di ta lei soni u Bëibel. U sa taki taa hiniwan fuu bi fii wan daka kumafa apösutu Paulosu bi fii, di a bi taki taa: „Wë mi ko si taa di wëti aki hën dë a mi dendu: Te mi kë du wan bumbuu soni nöö hogi nöö mi ta du.”​—Lom. 7:21.

3. Unfa wan sëmbë sa fii te a ta mbei möiti nöömö u na du wan hogi soni di hati fëën ta kë?

³ Ee a dë sö taa i ta mbei möiti nöömö u na du wan hogi soni di hati fii ta kë, nöö a kan taa i sa fii kuma ja taanga tjika u finga futu da di soni dë. Boiti di dë, i sa fii kuma saanfa-u-du fii kaba u di i ta si kuma Jehovah an o da i pasi fii libi u teego, u di hati fii ta kë du hogi. I sa dë seiki taa na wan u dee soni aki dë sö tuutuu! Fii sa ko sabi faandi mbei dee soni aki an dë sö, nöö woo taki u tu soni a di woto aki: (1) Naasë di fii di i ta fii kuma ja taanga tjika, ku di fii di i ta fii kuma saanfa-u-du fii kaba ta kumutu? (2) Unfa i sa duwengi iseei fu ja du dee hogi soni dee hati fii ta kë du?

UNFA SAATAN KË FUU TA FII?

4. (a) Faandi mbei Saatan kë fuu ta fii kuma wa taanga tjika? (b) Faandi mbei u sa dë seiki taa u taanga tjika u finga futu da dee tesi dee ta miti u?

⁴ Saatan kë fuu ta fii kuma wa taanga tjika u finga futu da dee hogi soni dee hati fuu ta kë du. Jesosi bi taki gbelin taa Saatan bi o ko pooba dee bakama fëën, di a bi lei de u de begi taa: ’Na disa u be soni pooba u e, ma puu u a di hogiwan maun dendu’ (Mat. 6:13). Saatan taki taa libisëmbë an o piki Jehovah buka te hati u de ta manda de u de du hogi soni (Jöpu 2:4, 5). Faandi mbei Saatan ta pakisei sö? Wë Saatan da di fosu sëmbë di bi mbei hati fëën ganjëën, nöö an bi kë hoi hënseei a Jehovah. A ta biibi taa u dë kumëën, söseei taa woo dë kabakaba u disa Jehovah te tesi ta miti u. Saatan bi ta mëni taa di Womi Mii u Gadu seei, di an abi zöndu, bi o du hogi te tesi miti ën! (Mat. 4:8, 9) Ma pakisei di soni aki luku: A dë sö tuutuu taa wa taanga tjika u finga futu da dee hogi soni dee hati fuu ta kë u? Na seei! U ta piki ku apösutu Paulosu di a bi taki taa: „Mi sa du hii soni, u di di sëmbë di ta heepi mi ta da mi kaakiti.”​—Fil. 4:13.

5. Unfa u du sabi taa Jehovah dë seiki taa u sa finga futu da dee hogi soni dee hati fuu ta kë?

⁵ Jehovah an dë kuma Saatan. A dë seiki taa u sa finga futu da dee hogi soni dee hati fuu ta kë. Unfa u du sabi di soni dë? Wë u di Jehovah bi taki a fesi taa wan gaan kulupu sëmbë bi o hoi deseei nëën, söseei taa de bi o pasa di gaan fuka libilibi. Pakisei luku andi di soni aki kë taki. Jehovah an sa mindi soni, nöö a taki taa wan gaan kulupu sëmbë o pasa go a di njunjun goonliba ku wan limbo hati, u di „de wasi dee langa koosu u de ko weti faan ku di buuu u di Sikapu Mii” (Ako. 7:9, 13, 14). A dë limbolimbo u si taa Jehovah an ta si kuma wa taanga tjika u finga futu da dee hogi soni dee hati fuu ta kë.

6-7. Faandi mbei Saatan kë fuu ta si kuma saanfa-u-du fuu kaba, te u musu finga futu da dee tesi dee ta miti u?

⁶ Na kë nöö Saatan kë fuu ta fii kuma wa taanga tjika nöö a kaba, ma a kë tu fuu ta fii kuma saanfa-u-du fuu kaba. Awa, a kë fuu ta si kuma Jehovah an o da u pasi fuu libi u teego, u di hati fuu ta kë du hogi soni. Ma na fëëkëtë di soni aki: Saatan hën da di sëmbë di saanfa-u-du fëën kaba, u di Jehovah kuutu ën kaa taa an fiti u feni di libi u teego (Ken. 3:15; Ako. 20:10). An dë u taki taa Saatan kë u useei ko ta fii kuma saanfa-u-du fuu kaba, u di u abi di okasi u libi u teego, nöö hën an abi di okasi dë möön. Ma saanfa-u-du fuu an kaba. Di Bëibel ta mbei u dë seiki taa Jehovah kë heepi u fuu sa libi u teego. Jehovah „an kë u na wan kodo sëmbë lasi libi. Ma a kë taa hii sëmbë musu feni di okasi u de sa bia de libi ko nëën”.​—2 Pet. 3:9.

⁷ Ee u ta biibi taa wa taanga tjika, nasö taa saanfa-u-du fuu kaba te u musu finga futu da dee hogi soni dee hati fuu ta kë, nöö hën da u ta si soni kumafa Saatan kë taa u musu ta si soni. Te u ko fusutan di soni aki, nöö a o heepi u fuu dë kabakaba u finga futu da Saatan.​—1 Pet. 5:8, 9.

UNFA DI DË DI U DË ZÖNDU LIBISËMBË SA MBEI U FII?

8. Boiti dee soni dee u ta du di an bunu, andi di Bëibel kë taki tu te a ta taki soni u zöndu? (Psalöm 51:5) (Luku di pisi „Soni di taki möön fini.”)

⁸ Boiti Saatan, wan woto soni dë di sa mbei u fii kuma wa taanga tjika, nasö taa saanfa-u-du fuu kaba, te u musu finga futu da dee hogi soni dee hati fuu ta kë. Andi da di soni dë? Wë di soni dë da di zöndu di hii u tuu feni a dee fosu gaansëmbë fuu.a​—Jöpu 14:4; lesi Psalöm 51:5.

9-10. (a) Unfa zöndu bi mbei soni ko dë da Adam ku Eva? (Luku di peentje tu.) (b) Unfa zöndu mbei soni ko dë da u?

⁹ Buta pakisei a di fasi fa zöndu bi mbei soni ko dë da Adam ku Eva. Baka di de bi pasa Jehovah buka, hën de bi go tjubi, söseei de bi mbei möiti u tjubi de sinkii. Di buku Inzicht in de Schrift ta taki taa: „Zöndu bi mbei háti u de ko ta fon de, de bi ko ta booko de hedi, de bi ko ta dë pantapanta, söseei de bi ko ta fii sen.” Adam ku Eva an bi o sa dë mati ku Jehovah nöiti möön. Aluwasi de bi mbei hii möiti, tökuseei hii juu háti u de bi o ta fon de, söseei de bi o ta dë ku bookohedi, u di de bi ko abi zöndu.

¹⁰ Soni an kaba dë da u kumafa a bi dë da Adam ku Eva. Di lusupaima sa mbei u ko abi wan limbo háti, söseei a sa mbei u ko dë sëmbë di na abi zöndu möön. Ma di lusupaima an dë da Adam ku Eva (1 Kol. 6:11). Adam ku Eva mbei taa u ko abi zöndu. Fëën mbei háti fuu ta fon u, u ta abi bookohedi, u ta dë pantapanta, söseei u ta fii sen kuma de. Di Bëibel ta taki taa hii libisëmbë dë a zöndu basu, „hii fa de an bi poi wëti a di wan seei fasi fa Adam bi poi ën” (Lom. 5:14). Di soni aki sa mbei u lasi hati, ma wa musu da pasi faa mbei u fii kuma wa taanga tjika, nasö taa saanfa-u-du fuu kaba. Unfa u sa du di soni dë?

11. Unfa u musu du soni te u ta fii kuma wa taanga tjika u hoi useei, nöö faandi mbei u musu du soni a di fasi dë? (Loomë 6:12)

¹¹ Te u ta fii kuma wa taanga tjika u hoi useei fu wa du dee hogi soni dee hati fuu ta kë du, nöö a bunu fuu hoi a pakisei taa di zöndu hën ta mbei u ta fii sö, nöö wa musu haikëën. Faandi mbei? Wë u di di Bëibel ta lei u taa u sa finga futu da di zöndu fu an „tii” u sinkii möön. (Lesi Loomë 6:12.) Di soni aki kë taki taa u sa hoi useei fu wa du dee hogi soni dee hati fuu ta kë du (Gal. 5:16). Jehovah dë seiki taa u sa hoi useei te tesi ta miti u, ee nasö an bi o hakisi u fuu du ën (Deto. 30:11-14; Lom. 6:6; 1 Tes. 4:3). A dë gbelingbelin u si taa u sa finga futu da dee hogi soni dee u hati ta kë du.

12. Andi u musu du te u ta fii kuma saanfa-u-du fuu kaba, nöö faandi mbei u musu du di soni dë?

¹² Wë sö nöö, te u ta fii kuma saanfa-u-du fuu kaba, söseei te u ta si kuma Jehovah an o da u pasi fuu libi u teego u di hati fuu ta kë du hogi soni, nöö a bunu fuu hoi a pakisei taa di zöndu hën ta mbei u ta fii sö, nöö wa musu haikëën. Faandi mbei? Wë u di di Bëibel ta lei u taa Jehovah ta fusutan taa u da zöndu libisëmbë (Ps. 103:13, 14). A sabi „hii soni” fuu, söseei a sabi unfa di zöndu ta mbei u ta kë du hogi soni tjika (1 Joh. 3:19, 20). Solanga u ta finga futu fu wa du dee hogi soni dee hati fuu ta kë du, nöö Jehovah o ta si u kuma sëmbë di abi wan limbo hati. Faandi mbei u sa dë seiki u di soni aki?

13-14. Di fii di wan sëmbë ta fii u du soni di an bunu, kë taki taa Jehovah an sa wai ku ën u? Booko ën a piki möni.

¹³ Di Bëibel ta lei u taa di fii di wan sëmbë ta fii u du soni di an bunu, ku di du di a ta du soni di an bunu, da tu tooka soni. A ta taki sö u di wan sëmbë sa hoi hënseei fu an du soni di an bunu, ma na hii juu a sa hoi hënseei fu an fii u du soni di an bunu. So u dee womi ku dee mujëë u di foto Kolenti, dee bi dë Keesitu sëmbë, bi ta libi ku womi nasö ku mujëë kuma deseei, ufö de ko dë Keesitu sëmbë. Paulosu bi taki taa: „Nöö sö so fuunu bi dë a fesi tu e. Di soni aki kë taki taa nöiti möön de bi fii u toona go libi ku womi nasö ku mujëë kuma deseei ö? Wë an bi o dë wan köni soni fuu pakisei sö, u di dee lö fii dë lo’ u tei ten ufö de kaba a wan sëmbë dendu. Ma Jehovah bi ta wai ku dee Keesitu sëmbë dee bi ta duwengi deseei, söseei dee bi ta mbei möiti u de an du dee hogi soni di de hati bi ta kë du. A bi ta si de kuma sëmbë di bi ’wasi ko limbo’ (1 Kol. 6:9-11). Sö nöö soni sa dë da i tu.

¹⁴ I sa finga futu da dee hogi soni dee hati fii ta kë du, aluwasi un pei hogi soni de dë. Aluwasi ee ja sa puu dee hogi soni aki ku telu a i hati, tökuseei i sa duwengi iseei fu ja du soni kumafa i ta fii, söseei kumafa i ta pakisei (Ef. 2:3). Unfa i sa du di soni dë, sö taa i sa wini di feti di i ta feti ku dee hogi soni dee hati fii ta kë du?

ANDI O HEEPI I FII DUWENGI ISEEI TE TESI TA MITI I?

15. Faandi mbei wa musu ganjan useei ee u kë wini di feti di u ta feti ku dee hogi soni dee hati fuu ta kë du?

¹⁵ Fii sa finga futu da dee hogi soni dee hati fii ta kë du, nöö i musu sabi naasë i suwaki. Köni be ja ganjan iseei (Jak. 1:22). Ee i ta si kuma di soni di i du an hogi sö, nasö ee i ta si kuma wotowan hën mbei i du di hogi, nöö a o möön taanga da i fii hoi iseei te tesi ta miti i. Fëën mbei ja musu ta taki a iseei taa: ’Woto sëmbë ta bebe daan hia möön mi.’ Söseei ja musu ta taki taa: ’Ma bi o ta luku fanafiti soni ee mi mujëë bi ta du möön soni u lei taa a lobi mi.’ Ja musu ta suku u lei taa soni hën mbei i du di hogi. Tei nöö taa mbei i mbei föutu.​—Gal. 6:7.

16. Unfa i sa dë kabakaba u mbei möön möiti fu ja du soni di an bunu?

¹⁶ Boiti di tei di i musu tei taa i ta fii u du soni di an bunu so juu, a dë fanöudu tu fii dë kabakaba u mbei möön möiti fu ja du dee soni dë (1 Kol. 9:26, 27; 1 Tes. 4:4; 1 Pet. 1:15, 16). Pakisei luku andi ta möön mbei i kë du di soni di an bunu, söseei na un ten. Kandë te wan apaiti pei tesi ko a i nëën i ta fii u du di soni di an bunu, nasö kandë a wan apaiti juu u di daka. A dë sö taa i ta möön fii u du di soni di an bunu te i wei nasö te latilati ndeti ö? Seeka iseei a fesi, nöö buta andi joo du te di tesi ko a i. Di möön bunu ten di i sa du di soni aki, hën da ufö di tesi ko a i.​—Nöng. 22:3.

17. Andi u sa lei a di woto u Josëfu? (Kenesesi 39:7-9) (Luku dee peentje.)

¹⁷ Boo luku unfa Josëfu bi du soni di di mujëë u Potifali bi kë faa duumi ku ën. A bi piki ën gbelin dë taa an kë. (Lesi Kenesesi 39:7-9.) Andi u ta lei a di soni aki? Josëfu bi sabi a fesi kaa taa an bi o tei sëmbë mujëë, ufö di mujëë u Potifali bi ko pooba u mbei a duumi ku ën. Sö nöö, iseei sa mbei möön möiti u dë kabakaba u du bunu soni, ufö tesi miti. Di soni aki o mbei an taanga da i sö u du di soni di bi buta a fesi taa i bi o du, te tesi ko a i.

„WEGI UNU SEEI LUKU BUNU”

18. Unfa i sa finga futu da soni di an bunu? (2 Kolenti 13:5)

¹⁸ Fii sa ta finga futu da soni di an bunu, nöö i musu ta wegi iseei ta luku. Di soni aki kë taki taa i musu ta öndösuku iseei nöömö, u si ee i nango a fesi. (Lesi 2 Kolenti 13:5.) Wanwan pasi i musu ta wegi di fasi fa i ta si soni, ku di fasi fa i ta du soni ta luku, sö taa i sa tooka soni ee a dë fanöudu. Aluwasi ee ja bi du soni di an bunu, di wan tesi bi miti i, tökuseei i sa hakisi iseei taa: ’Un longi mi bi dë ufö mi bi taki nönö?’ Ee a dë sö taa ja bi taki nönö wantewante dë, nöö hati fii an musu boonu poi. Pakisei luku unfa i sa du soni möön bunu wan woto pasi. Hakisi iseei taa: ’Te soni di an bunu ta ko a mi pakisei, nöö mi sa puu pakisei nëën möön hesi ö? A sa dë taa dee soni dee mi ta tei u mbei piizii ta mbei a möön taanga da mi u finga futu da tesi ö? Mi ta puu mi wojo wantewante dë te mi si wan soni di an bunu ö? A dë sö taa mi ta fusutan faandi mbei dee mama wëti u Jehovah bunu da mi hii juu, aluwasi ee mi musu ta mbei möiti u ta duwengi mi seei ö?’​—Ps. 101:3.

19. Unfa dee pikipiki soni dee u ta du di an bunu, sa mbei a möön taanga da u fuu finga futu da dee hogi soni dee hati fuu ta kë?

¹⁹ A bunu tu fii ja ta suku fasi u lei taa di soni di i ta du an hogi sö. Di Bëibel ta taki taa: „Di hati ta ganjan sëmbë möön hii soni, nöö a hogi seei” (Jel. 17:9). Jesosi bi taki taa „a libisëmbë hati dendu hii pei hogi ta kumutu” (Mat. 15:19). Wan sëmbë di tapa u luku fanafiti soni a di së womi ku mujëë sa taki baka wan pisiten taa, an hogi u luku peentje di ta hëngi go a di së u manu ku mujëë soni, ee dee peentje dë an dë ku sëmbë di dë pënëpënë. A sa taki tu taa: ’An hogi ee mi ta pakisei u du soni di an bunu, so langa ma go du ën nöö.’ Fuu taki ën kumafa a dë, nöö di sëmbë dë ’ta suku unfa a sa da di sinkii fëën pasi faa piki dee taku kë fëën hati’ (Lom. 13:14). Unfa u sa koti pasi da di soni dë? Wë i musu ko sabi dee pikipiki soni dee i ta kë du di an bunu, söseei i musu ta köni ku de tu, u di de sa mbei taa i du gaangaan soni di an bunu. Wan u dee soni aki da te ja ta finga futu da dee hogi soni dee hati fii ta kë.b Boiti di dë, i musu finga futu da hiniwan pakisei, ku hiniwan hogi di ta kumutu a i hati di sa mbei i fii kuma dee soni dee i ta kë du an hogi sö.

20. Andi o pasa ku dee hogi soni dee hati fuu ta kë a di ten di ta ko, nöö un heepi u abi nöunöu?

²⁰ U lei a di woto aki taa u sa finga futu da tesi, u di Jehovah ta heepi u. Boiti di dë, u di Jehovah abi tjalihati fuu mbei woo sa libi u teego a di njunjun goonliba. Woo ta wai seei te u sa dini Jehovah ku wan limbo pakisei, söseei ku wan limbo hati! Ma u nöunöu aki u sa dë seiki taa u sa finga futu da dee hogi soni dee hati fuu ta kë, söseei u sa dë seiki taa saanfa-u-du fuu an kaba. Jehovah ta mbei u feni bunu u di möiti di u ta mbei, nöö fëën mbei u sa wini di feti!