Di peleiki di i ta peleiki dë kuma do wata u?

DI PELEIKI di u ta peleiki da wan fanöudu soni seei. Ma na hii dee sëmbë dee u ta peleiki da ta fusutan di soni aki. Hii fa sëmbë lobi dee soni di di Bëibel ta taki, tökuseei na hii juu de ta kë fuu lei de soni u di Wöutu u Gadu.

Luku di woto u Gavin. A bi nango a dee komakandi, ma an bi kë u de lei ën soni u Bëibel. Gavin taki taa an bi sabi hia soni u Bëibel, nöö an bi kë u sëmbë sabi di soni dë. A bi ta fëëë taa de bi o hakisi ën faa toon keikima, nöö an bi kë u sëmbë ko ganjëën. Unfa i pakisei? I si kuma sëmbë bi o sa heepi Gavin ö? Pakisei dee wini di wan sëmbë sa feni te a ta lei soni u Bëibel. Jehovah bi piki dee Isaëli sëmbë taa: „Dee soni dee mi taki o kai kuma do wata” (Detolonomi 31:19, 30; 32:2). Boo go luku wantu soni di nama ku do wata, nöö woo luku unfa di peleikiwooko fuu dë kuma do wata. A sö wan fasi woo sa heepi „hii sëmbë u goonliba tuu.”​—1 Timoteo 2:3, 4.

UNFA DI PELEIKI DI U TA PELEIKI SA DË KUMA DO WATA?

Do wata ta kai sapisapi. Do wata ta kai kumutu a liba finufinu. Te a kai a wan soni liba, nöö a toon wata di ta koti tötö ta kai. Unfa dee soni dee Jehovah bi taki dë kuma „do wata”? A bi ta fan ku dee sëmbë fëën a wan suti fasi, a wan saapi fasi, söseei a wan fasi di ta lei taa a bi ta booko hën hedi ku de. U ta djeesi Jehovah, te u ta lesipeki dee soni dee wotowan ta biibi. U ta da de taanga u deseei go pakisei andi de o du a de libi. Te u ta booko u hedi ku wotowan a sö wan fasi, nöö de o kë tei dee soni u ta piki de, söseei woo sa du di peleikiwooko fuu a wan möön bunu fasi.

Do wata ta da soni kaakiti. Di peleikiwooko fuu o mbei woto sëmbë fii bunu, te u ta pakisei unfa u sa heepi dee sëmbë aki u lei soni u di tuutuu biibi. Wan baaa de ta kai Chris da di fosu sëmbë di bi hakisi Gavin u lei ën soni u Bëibel. Ma an bi duwengi ën faa piki taa a kë lei soni u Bëibel. Ma a bi pooba u feni fasi faa sa mbei Gavin fii bunu te a bi ta konda soni u Bëibel dëën. Chris bi piki Gavin taa wan woto dë a di Bëibel di a musu konda dëën, nöö te a bi lei soni u di woto aki, nöö a o heepi ën faa sa ta fusutan dee soni a ta lei a dee komakandi möön bunu. Hën Chris konda dëën taa dee tjabukama woto u Bëibel bi heepi ën faa ko sabi taa di Bëibel da wan buku di ta taki tuutuu soni. Te u kaba fëën, hii juu de bi ta sindo ta taki soni u dee tjabukama woto dee pasa tuutuu. Di fan di de bi ta fan aki bi ta mbei Gavin fii bunu, te u kaba fëën hën a ko kë lei soni u Bëibel.

Do wata ta da soni libi. A di pisiten di deewei bi ko a Isaëli, nöö sömëni liba longi tjuba an bi kai a Isaëli. Te do wata an ta kai a dee uwii, nöö de ta dëë, nöö de ta dëdë tu. Jehovah bi taki taa a di ten fuu aki a bi o dë kuma u dë a deewei, nöö dëëwata bi o ta kisi sëmbë u di de bi o „ta kë jei di wöutu u Jehovah” (Amösi 8:11). A bi paamusi u taa dee salufuwan bi o dë „kuma do wata u Jehovah” te de ta paaja di bunu buka u di Könuköndë, nöö dee „oto sikafu” ta heepi de (Mika 5:7; Johanisi 10:16). Di buka di u ta paaja da wan u dee soni di Jehovah seti u heepi dee sëmbë dee kë sabi soni u di tuutuu lei, u de sa feni libi. U ta tei di buka aki u bigi ö?

Do wata da wan gaan gudu di Jehovah da u (Detolonomi 33:13). Te u ta du di peleikiwooko, nöö dee sëmbë dee ta haika u o sa feni gaan bunu. Di lei di Gavin bi ta lei soni u Bëibel bi dë wan gaan bunu di a bi feni, u di a bi ta heepi ën faa ko sabi dee soni dee a bi kë sabi. A bi nango a fesi a di biibi seei, hën a ko tei dopu, nöö nöunöu a ta wai seei, u di a ta paaja di bunu buka u di Könuköndë makandi ku di mujëë fëën de kai Joyce.

I MUSU TA SI DI PELEIKIWOOKO KUMA WAN GAAN SONI

Te u ta si di peleikiwooko fuu kuma do wata, nöö a sa heepi u fuu fusutan taa di möiti di hii u tuu ta mbei u du di peleikiwooko da wan gaan soni seei. Wë unfa sö? Te di do wata ta koti tötö ta kai, nöö a ta munjan di goon tjë sö nöö, ma te a ta koti ta kai milionmilion pasi, nöö hii di goon ta munjan. A di wan seei fasi, u sa si dee soni dee hiniwan fuu ta du a di peleikiwooko kuma wan piki soni. Ma te u kaba fëën, di taanga möiti di hii dee milionmilion dinima u Jehovah ta mbei, ta heepi „hii föluku” u de jei soni u di bunu buka (Mateosi 24:14). Di peleiki di u ta peleiki da wotowan o mbei Jehovah da de bunu ö? Aai! Di buka di u ta paaja o dë kuma do wata, di ta kai sapisapi, di ta mbei de fii bunu, söseei di o mbei de feni libi!