Tuwë hii dee fuka fii da Jehovah

1, 2. (a) Faandi mbei u ta abi bookohedi? (Luku di peentje a bigi u di woto.) (b) Andi woo taki a di woto aki?

A DI ten aki, Saatan „ta waka zuuu sö ta lontu leti kuma hogimbeti ta suku ambë a sa feni faa tënë pisipisi njan” (1 Petuisi 5:8; Akoalimbo 12:17). Di soni aki ta mbei sëmbë ta abi sömëni bookohedi a de libi, te kisi dee dinima u Gadu seei. Dee dinima u Gadu u di ten di pasa bi ta abi bookohedi tu. Di Bëibel ta taki taa so juu Könu Dafiti seei bi ta abi bookohedi (Psalöm 13:2). Nöö „hiniwan juu” apösutu Paulosu bi ta „tja di hebi u dee biibima a dee kamiankamian” (2 Kolenti 11:28). Andi u sa du te u ta booko u hedi pasa maaka?

² Di lobihati Tata fuu di dë a liba ala bi heepi dee dinima fëën a di ten di pasa ku dee bookohedi di de bi abi, nöö a kë du di wan seei soni da u a di ten aki tu. Di Bëibel ta piki u taa: „Tuwë hii dee fuka fii tuu da Gadu e, dee sëmbë, biga a a’ toobi ku i” (1 Petuisi 5:7). Ma unfa i sa tuwë dee fuka fii da Gadu? Woo taki u fö fasi fa i sa du ën. (1) I sa begi ën, (2) i sa lesi di Wöutu fëën, nöö i pakisei fundu fëën, (3) i sa mbei di santa jeje fëën heepi i, ku (4) i sa konda da wan sëmbë di i ta futoou unfa i ta fii. Te woo taki u dee fö soni aki, nöö pooba u luku ka i sa du soni a wan möön bunu fasi.

„TUWË DI FUKA FII DA JEHOVAH”

3. Unfa i sa „tuwë di fuka fii da Jehovah”?

³ Wan u dee fasi fa u sa tuwë dee fuka fuu da Jehovah, hën da te u ta begi ën. Te i abi bookohedi, nöö di lobihati Tata fii di dë a liba ala kë fii konda dëën unfa i ta fii tuutuu. Di psalöm sikifima Dafiti bi begi Jehovah. A bi taki taa: „Gadu o, haika di begi u mi e.” A di wan seei psalöm Dafiti bi taki tu taa: „Tuwë di fuka fii da Jehovah, nöö hënseei o heepi i” (Psalöm 55:1, 22). Te i du hii soni di i sa du u puu wan bookohedi di i abi, nöö a bi o möön bunu fii begi Jehovah, nöö i konda hii soni dëën, ka fii ta booko i hedi. Unfa begi ta heepi tjika? Unfa a sa heepi u fu wa ta booko u hedi pasa maaka?​—Psalöm 94:18, 19.

4. Faandi mbei u musu ta begi te u abi bookohedi?

⁴ Lesi Filipi 4:6, 7. Unfa Jehovah ta piki dee begi fuu te u ta begi ën ku hii u hati, ku te u ta hakisi ën wan soni nöömö? A sa heepi u sö taa hati fuu an ta dë pantapanta, söseei fu wa pakisei soni di sa mbei u fii booko saka. Gadu an ta disa u fuu ta abi bookohedi pasa maaka nasö fuu ta dë pantapanta, ma a ta heepi u fuu ta fii di kötöhati di a ta da sëmbë. Sömëni u dee baaa ku dee sisa fuu bi feni di kötöhati dë. Iseei sa feni ën tu. ’Di kötöhati di Gadu ta da sëmbë’, sa heepi i ku hiniwan fuka di i abi! I sa biibi di soni di Jehovah paamusi i. A taa: „Na fëëë, biga mi da di Gadu fii. Mi o mbei i ko taanga. Mi o heepi i tuutuu.”​—Jesaaja 41:10.

DI WÖUTU U GADU TA DA U KÖTÖHATI

5. Unfa di Wöutu u Gadu sa heepi i fii feni di kötöhati di a ta da sëmbë?

⁵ Di u tu fasi fa u sa feni di kötöhati di Gadu ta da sëmbë, hën da te u ta lesi di Bëibel, söseei te u ta pakisei fundu fëën. Faandi mbei di soni aki dë fanöudu? Di Bëibel da di Wöutu u Gadu. I sa feni köni lai nëën, di kumutu a di Gadu di mbei u. Aluwasi na un ten i abi bookohedi, i sa pakisei fundu u dee soni u Gadu dee dë a di Bëibel, nöö i sa luku unfa dee lai aki sa da i taanga. Di soni aki sa heepi i fu ja ta booko i hedi sö möön, nasö fu ja ta booko i hedi seei. Jehovah taki taa te wan sëmbë ta lesi di Wöutu fëën, nöö a o abi „degihati”, söseei an o ta „fëëë”, nöö an o ta dë ’pantapanta’ tu.​—Josua 1:7-9.

6. Un wini i sa feni a dee soni dee Jesosi bi taki?

⁶ A di Wöutu u Gadu u ta lesi unfa Jesosi bi ta fan ku sëmbë. Sëmbë bi lo’ u haikëën, u di dee soni dee a bi ta taki, bi ta mbei wotowan fii bunu, söseei a bi ta da sëmbë kötöhati, möönmöön dee sëmbë dee suwaki, ku dee sëmbë dee bi ta fii booko saka. (Lesi Mateosi 11:28-30.) Jesosi bi ta booko hën hedi ku di fasi fa wotowan bi ta fii (Maikusi 6:30-32). Leti kumafa Jesosi paamusi dee apösutu fëën dee bi ta waka ku ën taa a o heepi de, sö nöö a o heepi u a di ten aki tu. Wa a’ fu waka makandi ku Jesosi kuma dee apösutu fëën, ufö a o sa heepi u. Jesosi da di Könu fuu di dë a liba ala, nöö a lobi u jeti. Fëën mbei te i ta booko i hedi, i sa dë seiki taa a o heepi i a di möön bunu ten. Jesosi ta mbei u dë seiki taa a o heepi u, nöö a ta da u degihati tu. Di soni aki ta heepi u ku dee bookohedi di u abi.​—Hebelejën 2:17, 18; 4:16.

DEE FASI DI DI JEJE U GADU TA MBEI SËMBË KO ABI

7. Unfa di santa jeje u Gadu ta heepi u?

⁷ Jesosi bi paamusi u taa di Tata fuu o da u di santa jeje fëën te u hakisi ën (Lukasi 11:10-13). Unfa di u dii fasi aki sa heepi u fu wa ta booko u hedi sö möön? Di santa jeje u Gadu, nasö di kaakiti fëën, sa heepi u fuu ko abi dee fasi u di Gadu fuu di abi hii makiti (Kolosën 3:10). Di Bëibel ta taki taa wan sëmbë ta ko abi dee fasi aki te di „jeje ta tii” ën. (Lesi Galasia 5:22, 23, NW.) Te u ko abi dee fasi aki, nöö u ku wotowan o ta libi fiifii, nöö woo koti pasi da dee soni di sa mbei u ta booko u hedi. Boo luku unfa dee fasi di di jeje u Gadu ta mbei u ko abi sa heepi u te u musu du so soni a u libi.

8-12. Unfa dee fasi di di santa jeje u Gadu ta mbei sëmbë ko abi sa heepi i?

⁸ „Lobi, piizii, kötöhati.” Te i ta libi ku wotowan a wan lesipeki fasi, nöö joo ko si taa ja o ta abi sö hia bookohedi möön. Unfa sö? Wë te i ta lei taa i lobi dee baaa ku dee sisa fii, te i ta libi suti ku de, ku te i ta lesipeki de, nöö joo sa koti pasi da dee soni dee o sa mbei hati fii boonu hesihesi, söseei da dee soni dee o sa da i bookohedi. Di soni aki o mbei an o taanga da i fii ta libi fiifii ku wotowan.​—Loomë 12:10.

⁹ „Pasensi, sutifasi, bunuhati.” Di Bëibel taki taa: „Un musu ta fii ku di otowan fii ta tjali ku ën. Un musu ta dëën paadon” (Efeise 4:32). Ee u tei dee lai aki, woo ta libi fiifii ku wotowan, nöö wa o du soni di o sa mbei u ko abi bookohedi. Söseei an o taanga da u fuu sabi andi u musu du ee dee zöndu fii fuu mbei wan toobi ko pasa.

¹⁰ „Biibi.” A di ten aki u ta booko u hedi ku möni soni nasö gudu (Nöngö 18:11). Unfa u sa kule da dee bookohedi aki? U musu du di soni di apösutu Paulosu bi taki, di a bi taki taa u musu ’ta tifeedi ku dee soni u abi kaa’. Te u abi wan taanga biibi a Jehovah, nöö woo abi di futoou taa a o da u dee soni u abi fanöudu. A bi paamusi u taa: „Ma o disa i seepi, kwetikweti. Na wan juu mi o disa i wanwan möönsö.” Fëën mbei u sa taki kuma Paulosu taa: „Masa hën da mi Heepima. Ma o fëëë. Andi seei wan sösö libisëmbë sa du ku mi?”​—Hebelejën 13:5, 6.

¹¹ „Sakafasi, duwengi iseei.” Pakisei un wini i sa feni te i ta lei taa i abi sakafasi, söseei te i ta duwengi iseei. Dee fasi aki sa heepi i sö taa ja du soni nasö taki soni di bi o sa mbei i ko abi bookohedi bakaten, söseei joo feni wini te i ta mbei möiti u na „hoi sëmbë a bëë, hatiboonu, buja ku sëmbë, feti, kosi sëmbë”.​—Efeise 4:31.

¹² I musu abi sakafasi fii sa abi futoou a di „kaakiti maun” u Gadu, söseei fii sa „tuwë hii dee fuka fii tuu da Gadu” (1 Petuisi 5:6, 7). Ee i abi sakafasi, nöö Jehovah o heepi i. Te i fusutan taa soni dë di i sa du ku soni dë di ja sa du, nöö ja o buta futoou a iseei. Ja o ta abi bookohedi sö möön, u di joo ta buta futoou a Gadu.​—Mika 6:8.

’JA MUSU BOOKO I HEDI’

13. Andi Jesosi bi kë taki, di a bi taki taa: ’Ja musu booko i hedi’?

¹³ Jesosi bi da u wan köni lai di u ta feni a Mateosi 6:34 (lesi ën). U ta lesi naandë taa: ’Ja musu booko i hedi.’ Wë kandë a sa djei kuma wa o sa du di soni aki. Ma andi Jesosi bi kë taki? U bi lei taa Dafiti ku Paulosu seei bi ta booko de hedi so juu. Jesosi an bi kë taki taa wan sëmbë di ta dini Gadu an bi o ta booko hën hedi nöiti. Ma Jesosi bi ta heepi dee bakama fëën u fusutan taa te de ta booko de hedi ku soni di an dë fanöudu, nasö te de ta booko de hedi pasa maaka, nöö di soni dë an o puu di bookohedi u de. Hiniwan daka soni o ta dë di ta da u bookohedi. Fëën mbei Keesitu sëmbë an musu suku soni u mbei de ko abi möön bookohedi, u di de ta pakisei dee fuka di bi miti de a di ten di pasa, nasö u fuka di sa miti de a di ten di ta ko. Unfa di lai u Jesosi sa heepi i fu ja ta booko i hedi pasa maaka?

14. Andi i sa du fu ja ta booko i hedi pasa maaka leti kuma Dafiti?

¹⁴ So juu sëmbë ta booko de hedi ku föutu di de bi mbei a di ten di pasa. De sa ta kuutu deseei pasa maaka u di soni di de bi du, aluwasi di soni di de bi du bi pasa sömëni jaa kaa. So juu Könu Dafiti bi ta tjali seei u dee föutu dee a bi mbei. Hënseei bi taki taa: „U di mi ta djëmë a mi hati mbei mi ta bai taanga” (Psalöm 38:3, 4, 8, 18). Ma Dafiti bi du soni a wan köni fasi. A bi abi di biibi taa Jehovah o abi tjalihati fëën, söseei taa a o dëën paadon. Nöö bakaten a bi ta wai seei u di a bi sabi taa Gadu bi dëën paadon.​—Lesi Psalöm 32:1-3, 5.

15. (a) Un woto soni u ta lei a di woto u Dafiti? (b) Andi i sa du fu ja ta booko i hedi pasa maaka? (Luku di pisi „Wantu soni di sa heepi i fu ja ta booko i hedi pasa maaka”.)

¹⁵ So juu i sa ta booko i hedi ku soni di sa pasa a di ten di ta ko. A di pisiten di Dafiti bi sikifi Psalöm 55, nöö a bi ta fëëë taa de bi o kii ën (Psalöm 55:2-5). Ma an bi mbei dee bookohedi fëën tapëën fu an ta futoou Jehovah möön. Dafiti bi begi Jehovah faa heepi ën ku dee bookohedi fëën, ma a bi sabi tu taa a bi dë fanöudu faa du wan soni (2 Samuëli 15:30-34). I sa lei wan soni a di woto u Dafiti. Ka fii dë ta booko i hedi pasa maaka, nöö a bi o möön bunu u du andi i sa du u soni waka möön bunu, söseei futoou taa Jehovah o heepi i.

16. Unfa di soni di di në u Gadu kë taki sa taanga di biibi fuu?

¹⁶ So juu wan Keesitu sëmbë sa ta booko hën hedi ku soni di sa pasa ku ën a di ten di ta ko. Ma an dë fii ta booko i hedi ku soni di an pasa jeti. Faandi mbei? Wë u di möön gaanfa, soni an ta pasa kumafa u bi ta mëni. Söseei, hoi a pakisei taa soni an dë di Gadu an sa seeka. Di në fëën seei kë taki taa: „A sa ko dë andi a kë ko dë” (Ëkisodesi 3:14). Fëën mbei wa musu ta booko u hedi ku di ten di ta ko, u di di në u Gadu seei ta lei u taa hii dee soni dee a paamusi libisëmbë o pasa tuutuu. I sa dë seiki taa Jehovah o mbei dee sëmbë dee ta buta futoou nëën feni bunu, söseei a o heepi de u de an ta booko de hedi pasa maaka ku dee soni dee bi pasa, dee soni dee ta pasa nöunöu ku dee soni dee o pasa a di ten di ta ko.

FAN KU WAN SËMBË DI I SA FUTOOU

17, 18. Unfa di fan di i ta fan ku wotowan sa heepi i te i ta booko i hedi?

¹⁷ Di u fö fasi fa i sa feni heepi te i ta booko i hedi, hën da te i go fan ku wan sëmbë di i ta futoou. Di sëmbë di i ku ën tööu, wan gaan mati fii, nasö wan u dee gaanwomi u di kemeente sa heepi i fu ja ta booko i hedi pasa maaka. Di Bëibel ta piki u taa: „Te wan sëmbë ta booko hën hedi pasa maaka, nöö a o lasi hati, ma te sëmbë ta fan a wan suti fasi ku ën, nöö a ta dë waiwai” (Nöngö 12:25). Di Bëibel ta taki tu taa: „Te sëmbë an ta konda da deseei unfa soni dë tuutuu, nöö hii soni ta buuja, ma te hia laima ko makandi, nöö soni ta waka bunu.”​—Nöngö 15:22.

¹⁸ Dee komakandi fuu seei ta heepi u fu wa ta booko u hedi pasa maaka. Hiniwan wiki i ta dë ku dee baaa ku dee sisa fii a dee komakandi. De ta booko de hedi ku i, söseei de kë da i degihati tu (Hebelejën 10:24, 25). Di miti di u ta „miti fuu da u seei taanga”, o mbei i fii bunu, söseei a ta heepi i fu ja ta booko i hedi möön.​—Loomë 1:12.

DI DË DI I KU GADU DË MATI DA DI SONI DI TA MÖÖN DA I TAANGA

19. Faandi mbei i sa dë seiki taa di dë di i ku Gadu o dë gaan mati o da i taanga?

¹⁹ Wan baaa di bi dë gaanwomi u wan kemeente a Kanada, bi ko fusutan unfa a bi dë fanöudu tjika u tuwë dee fuka fëën da Jehovah. Di lei di a ta lei miii a siköö ta dëën bookohedi seei, nöö di gösöntu fëën seei ta mbei a ta booko hën hedi. Andi bi heepi ën? A bi ta möön mbei möiti sö taa hën ku Jehovah sa ko dë gaan mati. Dee gaan mati fëën seei bi heepi ën te soni bi ta taanga dëën, nöö a bi ta konda hii soni dëën mujëë. Boiti di dë, dee woto gaanwomi, ku di keling-gaanwomi bi heepi ën faa si dee soni dee ta miti ën kumafa Jehovah ta si de. Söseei, wan data bi heepi di baaa aki faa bi ko fusutan möön bunu unfa di gösöntu fëën dë, nöö a bi sa seti soni u feni ten faa sa ta böö, söseei faa sa ta du sport. Te u kaba fëën, a bi ko sabi unfa a bi musu du soni a di libi fëën, söseei a bi ko sabi unfa a musu basi dee fii fëën. Te wan soni bi dë di an bi sa tooka, nöö a bi ta buta futoou a Jehovah faa heepi ën.

20. (a) Unfa u sa tuwë dee fuka fuu da Gadu? (b) Andi woo lei a di woto di ta ko?

²⁰ A di woto aki, u bi lei unfa a dë fanöudu tjika fuu tuwë dee fuka fuu da Jehovah, u di woo ta begi ën, söseei u di woo ta lesi di Wöutu fëën, nöö woo ta pakisei fundu u dee soni dee u ta lei. U bi lei tu unfa a dë fanöudu fuu mbei di santa jeje u Jehovah heepi u, fuu fan ku wan sëmbë di u ta futoou, söseei taa u musu nango a dee kemeente komakandi. A di woto di ta ko, woo lei unfa Jehovah ta heepi u, u di a ta mbei u ko sabi taa woo feni wan paka nëën.​—Hebelejën 11:6.