2 Samuel
9 Now David taki: „Wan famiri fu Saul de na libi ete? Na fu Yonatan+ ede, meki mi wani sori a sma dati bun-ati.”+ 2 We, na ini na oso fu Saul, wan futuboi ben de di ben nen Siba.+ Sobun, den kari en fu go na Kownu David. Ne Kownu aksi en: „Na yu na Siba?” Siba piki en: „Iya, mi na yu futuboi Siba.” 3 Dan Kownu aksi: „Yu sabi efu Saul abi wan famiri ete? Mi wani sori en bun-ati, neleki fa Gado e sori sma bun-ati?”+ Ne Siba piki Kownu: „We, wan manpikin fu Yonatan de ete. A malengri.”+ 4 Kownu aksi en: „Pe a de?” Siba piki Kownu: „A de na Lodebar,+ na a oso fu Makir,+ a manpikin fu Amiyel.”
5 Wantewante Kownu David seni teki a manpikin fu Yonatan na Lodebar, na a oso fu Makir, a manpikin fu Amiyel. 6 Ne a man disi, di ben de a manpikin fu Yonatan èn a granpikin fu Saul, kon na David. A ben nen Mefiboset. Wantewante a boigi nanga en fesi go na gron.+ Dan David taki: „Mefiboset!” Mefiboset piki: „Iya, yu futuboi e arki.” 7 David taki moro fara: „No frede, bika mi wani sori yu bun-ati,+ fu di mi ben pramisi yu papa+ Yonatan fu du bun gi den bakapikin fu en. Mi o gi yu a heri gron+ fu yu granpapa Saul èn yusrefi o nyan nanga mi na wán tafra doronomo.”+
8 Dan Mefiboset boigi nanga en fesi go na gron èn a taki: „Mi de leki wan dede dagu.+ Suma na mi, taki yu poti prakseri na mi?” 9 Ne Kownu kari Saul en futuboi Siba èn a taigi en: „Ala sani di ben de fu Saul èn fu en heri famiri, mi e gi+ a granpikin fu yu masra. 10 Yu, den manpikin fu yu, nanga den futuboi fu yu musu prani a gron gi Mefiboset èn un musu piki a nyanyan na den gron te a kon lepi. A nyanyan dati, yu musu prati gi den sma fu a granpikin fu yu masra. Dati o de a nyanyan fu den. Ma Mefiboset, a granpikin fu yu masra, o nyan nanga mi na wán tafra doronomo.”+
Siba ben abi tinafeifi manpikin nanga tutenti futuboi.+ 11 Ne Siba taigi Kownu: „Mi lespeki Kownu, mi o du ala san yu taki. Ma Mefiboset+ e nyan na mi tafra leki wan manpikin fu Kownu.” 12 Na a ten dati Mefiboset ben abi wan pikin boi di ben nen Mika.+ Ala den sma di ben e libi na ini na oso fu Siba ben de futuboi fu Mefiboset. 13 Mefiboset srefi ben e tan na Yerusalem, fu di a ben e nyan nanga Kownu na wán tafra doronomo.+ Ala en tu futu ben lan.+