1 Kownu

10 Baka dati na umakownu fu Skeiba+ kon yere fa Salomo ben kisi biginen èn fa disi ben e gi Yehovah glori.+ Sobun, a teki waka go na Salomo, fu di a ben wani aksi en wan lo sani di ensrefi no ben man frustan.+ 2 Te fu kaba a doro na Yerusalem nanga wan bun bigi grupu sma,+ sosrefi nanga kameili+ di ben e tyari balsem-oli,+ bun furu gowtu, nanga diriston. Di a doro na Salomo, a bigin aksi en ala sortu sani di a ben wani sabi.+ 3 Dan Salomo fruklari ala den sani dati gi en.+ Nowan enkri sani ben de di Kownu no ben fruklari.+

4 Ne na umakownu fu Skeiba si taki Salomo koni pasa marki.+ A si na oso di Kownu bow.+ 5 A si a nyanyan sosrefi di ben de na tapu a tafra+ fu Kownu, a fasi fa den heihei man ben e sidon nyan nanga Kownu, den sma di ben e tyari nyanyan kon na a tafra èn den krosi di den sma dati ben e weri. A si den sani tu di den ben e dringi,+ nanga den sani di Kownu ben gwenti tyari leki bron-ofrandi na ini na oso fu Yehovah. Di na umakownu si ala den sani disi, a tanapu luku nanga opo mofo.+ 6 Dati meki a taigi Kownu: „Di mi ben de na mi kondre, mi yere sma e taki fu den sani di yu du èn mi yere fa yu koni. Now mi sabi taki ala den sani disi tru.+ 7 Mi no ben wani bribi den sani di sma ben e taki, teleki mi kon fu si nanga mi eigi ai efu den sani disi tru. Ma soleki fa mi si, sma no ben fruteri mi afu srefi!+ Yu koni èn yu gudu moro leki san sma ben taigi mi.+ 8 Koloku fu den sma fu yu.+ Koloku+ fu den futuboi disi di e tanapu na yu fesi ala ten, e arki den koni sani di yu e taki!+ 9 Blesi fu Yehovah yu Gado.+ A ben prisiri+ nanga yu èn fu dati ede a meki yu tiri Israel.+ Fu di Yehovah lobi Israel fu ala ten,+ meki a poti yu leki kownu+ fu koti krutu+ gi den èn fu tiri na wan reti fasi.”+

10 Dan a gi+ Kownu fo dusun wán hondro nanga fo kilo gowtu,+ bun furu balsem-oli,+ nanga diriston. Noiti moro wan sma gi Kownu Salomo so furu balsem-oli leki san na umakownu fu Skeiba gi en.

11 Den srefi sipi fu Hiram+ di ben e tyari gowtu komoto fu Ofir,+ ben e tyari bun furu algumim-udu+ nanga diriston+ kon tu. 12 Nanga na algumim-udu, Kownu meki pilari gi na oso fu Yehovah+ èn gi na oso fu Kownu. Gi den singiman a meki harpu+ nanga tra pokusani di gersi harpu.+ Noiti moro sma tyari so furu algumim-udu kon leki na a ten dati.

13 Fu di Kownu Salomo ben lobi fu gi sma sani,+ meki a gi na umakownu fu Skeiba wan lo kado. Boiti dati, Salomo gi na umakownu ala tra sani tu di a ben aksi en. Dan na umakownu drai go baka na en eigi kondre, makandra nanga den futuboi fu en.+

14 Ibri yari Salomo ben e kisi tutenti na tu dusun seibi hondro seibitenti na seibi kilo nanga tu hondro gran gowtu.+ 15 Boiti dati, den man di ben e waka e seri sani, ben e tyari gudu kon gi en. Te den man disi ben e meki moni, dan den ben e gi Salomo gudu tu. Den kownu+ fu Arabia+ nanga den granman fu a kondre ben e tyari sani kon gi Salomo sosrefi.

16 Dan Kownu Salomo meki tu hondro bigi skelt fu wan spesrutu sortu gowtu.+ (A gebroiki siksi kilo nanga aiti hondro fotenti gran gowtu fu tapu ibriwan fu den bigi skelt disi.)+ 17 Baka dati a meki dri hondro pikin skelt fu wan spesrutu sortu gowtu. (A gebroiki wán kilo nanga seibi hondro nanga tin gran gowtu fu tapu ibriwan fu den pikin skelt disi.)+ Ne Kownu poti den skelt disi na ini na oso di nen Libanon-busi.+

18 Baka dati Kownu meki wan bigi kownusturu fu ivoor,+ dan a tapu a heri sturu+ nanga soifri gowtu.+ 19 Fu kan go na a sturu yu ben musu kren wan stupu di ben abi siksi trei. Na loktusei fu a sturu yu ben abi wan sani leki wan pikin lontu daki. A sturu ben abi tu anu, wán na a reti-anusei èn wán na a kruktu-anusei. Tu lew+ ben e tanapu na sei den anu+ fu a sturu. 20 Na tapu den siksi trei fu a stupu yu ben abi twarfu lew, siksi na a wán sei èn siksi na a tra sei. Nowan kownukondre ben abi wan kownusturu leki a di fu Kownu Salomo.+

21 Ala den kan di Kownu Salomo ben e dringi na ini ben meki fu gowtu. Den kan fu na oso di nen Libanon-busi+ ben meki fu soifri gowtu.+ Nowan sani ben meki fu solfru, bika na ini a ten fu Salomo sma ben si solfru leki wan soso sani. 22 Boiti den sipi fu Hiram, Kownu ben abi wan lo tra sipi na se. Den ben e tyari sani komoto fu Tarsis.+ Ibri dri yari den sipi fu Tarsis ben e tyari gowtu+ nanga solfru kon, sosrefi ivoor,+ yapiyapi, nanga prodokaka-fowru.

23 Na so Kownu Salomo ben kon gudu.+ A ben koni+ moro ala den tra kownu fu grontapu. 24 Ala sma fu grontapu ben e kon na en fu yere den koni sani di Gado ben poti na ini Salomo ati.+ 25 Ibri yari+ te sma ben e go na Salomo, den ben e tyari kado+ kon gi en. Den ben tyari sani fu solfru+ èn sani fu gowtu, sosrefi krosi, fetisani,+ balsem-oli, asi, nanga buriki.*+

26 Ibri tron baka Salomo ben e tyari moro asiwagi nanga moro asi kon na wán. Te fu kaba a ben kon abi wán dusun fo hondro asiwagi nanga twarfu dusun asi.+ A poti den asiwagi nanga den asi disi na spesrutu foto, krosibei fu Yerusalem+ pe a ben e tan.

27 Kownu tyari so furu solfru kon na wán, taki solfru ben kon lai na Yerusalem, neleki fa ston+ ben lai. A tyari so furu sedre-udu kon na wán, taki udu ben kon lai, neleki fa figabon ben lai na Syefela.+

28 Salomo ben e kisi asi komoto fu Egepte. Te den sma di ben e bai sani gi Kownu, ben e go bai asi gi en, dan den ben abi a gwenti fu pai wán moni+ gi wan heri ipi asi. 29 Gi ibriwan fu den asiwagi di den ben e go bai na Egepte, den ben e pai siksi hondro pisi solfru èn gi ibri asi den ben e pai wán hondro nanga feifitenti pisi solfru. Na so sani ben e go tu te den kownu fu den Hètsma+ èn den kownu fu den Siriasma ben e bai asi nanga asiwagi. Na den man fu Salomo ben e bai den sani disi gi den.