1 Kownu

6 Na ini a di fu fo hondro aititenti yari, baka di den Israelsma komoto na ini a kondre Egepte,+ Salomo bigin bow wan oso gi Yehovah.+ Dati ben de na ini a di fu fo yari,+ baka di a tron kownu fu Israel. A bigin bow na ini a mun Sif.+ Dati na a di fu tu mun+ fu a yari. 2 Na oso di Kownu Salomo bow+ gi Yehovah, ben langa tutenti na siksi meter nanga seibitenti centimeter.+ A ben bradi aiti meter nanga neigitenti centimeter èn a ben hei tinadri meter nanga dritenti na feifi centimeter.+ 3 Wan gadri+ ben de na fesisei fu na oso fu Gado. A gadri ben langa aiti meter nanga neigitenti centimeter èn a ben bradi fo meter nanga fotenti na feifi centimeter. A langa sei fu a gadri ben langa a srefi leki a bradi sei fu na oso.

4 Baka dati Salomo meki fensre na ini a skotu fu na oso. Na inisei fu a skotu den fensre ben bradi èn na dorosei den ben smara.+ 5 Lontu a skotu fu na oso a bow wan lo pikin kamra na seisei èn na bakasei+ fu a Santa Presi nanga a Moro Santa Presi.+ 6 Den pikin kamra na gron, ben bradi tu meter nanga tutenti na dri centimeter. Boiti dati, yu ben abi tu sodro. Den kamra na a fosi sodro ben bradi tu meter nanga siksitenti na seibi centimeter èn den wan na a di fu tu sodro ben bradi dri meter nanga twarfu centimeter. Den kepi a skotu na so wan fasi, taki yu ben abi wan lanki+ di ben bradi nofo fu hori wan postu. Na so fasi sma no ben abi fu fasi den postu na ini a skotu.+

7 Na oso bow nanga ston di sma koti puru+ na ini bergi. Den marki den ston soifri, so taki den ben o fiti na den presi. Na so fasi a babari fu amra, aksi, noso iniwan isri wrokosani no ben de fu yere na a presi pe na oso+ ben e bow, fu di den no ben abi fu koti den ston drape. 8 Na dorosei fu na oso, na a reti-anusei pe den pikin kamra ben de, yu ben abi wan doro+ fu kan go na ini den kamra di ben de na gron. Te sma ben wani go na den kamra fu a fosi sodro, dan den ben musu kren wan trapu. A srefi trapu dati ben e go na den kamra fu a di fu tu sodro. 9 Sobun, Salomo bow go doro, teleki a klari na oso.+ A daki fu na oso a meki nanga postu èn planga fu sedre-udu+ di a poti sei na sei. 10 Boiti dati, a meki kamra na sei a skotu.+ Den kamra ben hei tu meter nanga tutenti na dri centimeter. A ben fasi den na a skotu+ nanga sedrepostu.

11 Disiten Yehovah taigi Salomo:+ 12 „Efu yu gi yesi na den komando+ nanga den wèt fu mi+ èn yu du ala san mi taigi yu fu du,+ dan mi o meki a pramisi di abi fu du nanga yu èn nanga na oso di yu e bow, kon tru soleki fa mi pramisi yu papa David.+ 13 Mi o tan nanga den Israelsma+ èn mi no o gowe libi mi pipel Israel.”+

14 Sobun, Salomo bow go doro, teleki a klari na oso.+ 15 A tapu na inisei fu den skotu fu na oso nanga sedreplanga, fu a gron te go miti den postu fu a plafon. Baka dati a tapu a heri gron fu na oso nanga yaneiferplanga.+ 16 Fu a gron te go miti den postu fu a plafon, a meki wan skotu fu sedreplanga. Na so a meki wan kamra te na bakasei na ini na oso.+ A kamra disi ben langa aiti meter nanga neigitenti centimeter. Dati ben de a Moro Santa Presi.+ 17 Na fesi a Moro Santa Presi+ yu ben abi a moro bigi kamra fu na oso.+ A ben langa tinaseibi meter nanga aititenti centimeter. 18 A heri skotu na inisei fu na oso ben tapu nanga sedre-udu. Nowan ston ben de fu si. Na ini a sedre-udu Salomo koti prenki fu bromki+ di fasi na makandra leki wan keti. A koti prenki fu moimoi sani tu di ben gersi lontu krabasi.+

19 Ne Salomo bigin sreka a Moro Santa Presi+ fu na oso fu kan poti a santa kisi+ fu a frubontu+ fu Yehovah drape. 20 A Moro Santa Presi ben langa, bradi+ èn hei aiti meter nanga neigitenti centimeter. A tapu a heri skotu fu a kamra disi nanga soifri gowtu.+ Boiti dati, a tapu na altari+ nanga sedre-udu. 21 Baka dati Salomo tapu+ den skotu, a gron, nanga a plafon na ini na oso nanga soifri gowtu.+ Na so a tapu a heri inisei fu a Moro Santa Presi nanga gowtu. Na fesi a Moro Santa Presi+ a anga gowtu keti+ fu a wan sei skotu te go miti a trawan. 22 Na so Salomo teki gowtu, dan a tapu ala den skotu, a gron, nanga a plafon na inisei fu na oso, teleki a heri inisei fu na oso ben tapu nanga gowtu.+ Boiti dati, Salomo tapu a heri altari+ di ben de na fesi a Moro Santa Presi nanga gowtu.+

23 Dan a meki tu kerub-engel+ èn a poti den na ini a Moro Santa Presi. A ben meki den fu oli-udu. Ibriwan fu den ben hei fo meter nanga fotenti na feifi centimeter.+ 24 A wan kerub-engel ben abi tu frei. A wan frei ben langa pikinmoro tu meter nanga tutenti na dri centimeter. A tra frei ben langa a srefi. Te yu ben o marki den tu frei makandra, dan den ben langa fo meter nanga fotenti na feifi centimeter.+ 25 A tra kerub-engel ben hei fo meter nanga fotenti na feifi centimeter. Ala tu kerub-engel ben bigi a srefi èn den ben meki na a srefi fasi. 26 A wan kerub-engel ben hei fo meter nanga fotenti na feifi centimeter. A tra kerub-engel ben hei a srefi. 27 Salomo meki den kerub-engel, dan a poti den sei na sei na ini a Moro Santa Presi. Den frei fu den ben bradi opo.+ Wan frei fu ibriwan fu den kerub-engel ben doro te na a skotu fu a kamra. Den tu tra frei fu den ben e miti makandra+ na mindrisei fu a Moro Santa Presi. 28 Boiti dati, Salomo tapu a heri skin fu den kerub-engel nanga gowtu.+

29 Na ini na udu fu ala den skotu fu a Santa Presi èn fu a Moro Santa Presi, a koti prenki fu kerub-engel,+ palmbon,+ nanga bromki.+ 30 Boiti dati, a tapu a heri gron+ fu a Santa Presi èn fu a Moro Santa Presi nanga gowtu. 31 Dan a meki den doro+ fu a Moro Santa Presi, den pilari na sei den doro, den doropostu èn wan di fu feifi pisi fu a skotu.* Ala den sani disi ben meki fu oli-udu.+ 32 Ne a koti prenki fu kerub-engel, palmbon, nanga bromki na ini na udu fu den tu doro di ben meki fu oli-udu. Dan a tapu den nanga gowtu. Nanga amra, a naki a gowtu kon plata na tapu den prenki fu den kerub-engel nanga den palmbon. 33 Na a srefi fasi a meki den doro fu a tempel. Den doro disi ben abi fokanti doropostu di ben meki fu oli-udu. 34 Den tu doro ben meki fu yaneifer-udu.+ Den tu pisi fu den doro ben prati na tu pisi sosrefi di ben kan fow opo èn fow tapu. Ala den tu sei ben e drai tapu doropen.+ 35 Baka dati a koti prenki fu kerub-engel, palmbon, nanga bromki na ini na udu fu den doro. Dan a tapu den prenki+ disi nanga gowtu.

36 Ne a meki wan pikin dyari+ lontu na oso. Lontu a dyari a meki wan skotu fu ston di sma koti puru na ini bergi. Fu meki a skotu, a hari dri rèi+ ston èn a poti wan rèi postu fu sedre-udu na a skotu.

37 Den bigin seti a fondamenti+ fu na oso fu Yehovah na ini a mun Sif+ fu a di fu fo yari di Salomo ben e tiri leki kownu. 38 Na ini a di fu erfu yari di Salomo ben e tiri leki kownu, na ini a di fu aiti mun, dati na a mun Bul, den klari+ ala den finifini wroko nanga ala sani di den ben abi na prakseri fu du na a oso.+ Ala nanga ala a teki seibi yari fu bow na oso.