2 Kownu

15 Na ini a di fu tutenti na seibi yari di Yerobeyam ben de kownu fu Israel, Asaria,+ a manpikin fu Kownu Amasia+ fu Yuda tron kownu. 2 Asaria bigin tiri di a ben abi tinasiksi yari. Feifitenti na tu yari langa a tiri na Yerusalem.+ En mama ben de Yekolia, wan uma fu Yerusalem. 3 Asaria tan du san Yehovah feni bun. Ala sani di en papa Amasia ben du, na dati a du tu.+ 4 Ma a no broko den hei presi puru pe sma ben e anbegi falsi gado.+ A pipel ben e tan go na den hei presi dati fu tyari srakti-ofrandi nanga smoko-ofrandi.+ 5 Te fu kaba Yehovah meki Kownu kisi wan takru siki.+ Na so a libi leki wan gwasiman+ teleki a dede. A tan libi na ini en oso, ma a no ben abi fu du en wroko leki kownu moro.+ Disiten en manpikin Yotam+ ben abi a frantwortu fu na oso fu Kownu èn na en ben e koti krutu+ gi a pipel fu a kondre. 6 Ala tra sani di abi fu du nanga Asaria èn ala sani di a du, skrifi na ini a buku+ di e taki fu den tori fu den kownu fu Yuda. 7 Te fu kaba Asaria go rostu neleki den afo fu en+ èn den beri en na a beripe fu den afo fu en na ini a Foto fu David. Dan en manpikin Yotam bigin tiri leki kownu.+

8 Na ini a di fu dritenti na aiti yari di Asaria+ ben e tiri leki kownu fu Yuda, Sakaria,+ a manpikin fu Yerobeyam, tron kownu fu Israel. Siksi mun langa a tiri leki kownu na Samaria. 9 A tan du sani di Yehovah no feni bun, neleki fa den afo fu en ben du.+ Den srefi sondu di Yerobeyam,+ a manpikin fu Nebat, ben du, na dati Sakaria du tu. Den sondu fu en, meki taki Israel go du sondu tu.+ 10 Ne Salum, a manpikin fu Yabes, span anu makandra+ nanga trawan fu kiri Sakaria. Na so a kiri+ Sakaria na Yibleyam,+ dan a bigin tiri leki kownu. 11 Ala tra sani di abi fu du nanga Sakaria, skrifi na ini a buku+ di e taki fu den tori fu den kownu fu Israel. 12 Na so Yehovah du san a ben taigi Yehu.+ A ben taki:+ „Den pikin+ fu yu granpikin o tiri leki kownu fu Israel.” Na dati pasa tu.+

13 Now Salum, a manpikin fu Yabes, tron kownu na ini a di fu dritenti na neigi yari di Usia+ ben de kownu fu Yuda. Wán mun langa Salum tiri na Samaria.+ 14 Baka dati Menahem,+ a manpikin fu Gadi, komoto na Tirsa,+ dan a go na Samaria. Drape a kiri Salum,+ a manpikin fu Yabes. Baka Salum, Menahem bigin tiri leki kownu. 15 Ala tra sani di abi fu du nanga Salum èn a fasi fa a span anu makandra+ nanga trawan fu kiri Kownu Sakaria, skrifi na ini a buku di e taki fu den tori fu den kownu fu Israel. 16 Na a ten dati Menahem komoto na Tirsa, dan a hari go na a foto Tifsa. A kiri ala den sma di ben e libi na ini a foto nanga den wan di ben e libi na ini a kontren lontu a foto. A kiri den, fu di den no ben wani opo den portu gi en. A priti a bere opo fu ala den uma di ben de nanga bere.+

17 Na ini a di fu dritenti na neigi+ yari di Asaria ben de kownu fu Yuda, Menahem, a manpikin fu Gadi, tron kownu fu Israel. Tin yari langa a tiri leki kownu na Samaria. 18 A tan du sani di Yehovah no feni bun.+ Den srefi sondu di Yerobeyam,+ a manpikin fu Nebat, ben du, na dati Menahem du tu en heri libi langa. Den sondu fu Yerobeyam, meki taki Israel go du sondu tu.+ 19 Now Kownu Pul+ fu Asiria+ kon na ini a kondre. Dati meki Menahem gi+ Pul dritenti na fo dusun tu hondro kilo solfru,+ so taki Pul ben kan yepi en.+ Pul ben o horibaka gi Menahem fu tiri a kownukondre fu en. 20 Sobun, Menahem meki den Israelsma tyari a solfru kon gi en, so taki a ben kan pai+ a kownu fu Asiria. Fu ibri guduman, Menahem aksi feifitenti pisi solfru. Ne a kownu fu Asiria drai go baka na en kondre. A no tan na ini Israel. 21 Ala tra sani di abi fu du nanga Menahem+ èn ala sani di a du, skrifi na ini a buku+ di e taki fu den tori fu den kownu fu Israel. 22 Te fu kaba Menahem dede. Dan en manpikin Pekahia+ bigin tiri leki kownu.

23 Na ini a di fu feifitenti yari di Asaria ben de kownu fu Yuda, Pekahia, a manpikin fu Menahem, tron kownu fu Israel. Tu yari+ langa a tiri leki kownu na Samaria. 24 Pekahia tan du sani di Yehovah no feni bun.+ A du soleki fa Yerobeyam,+ a manpikin fu Nebat, ben du. Den sondu fu Yerobeyam, meki taki Israel go du sondu tu.+ 25 Kownu Pekahia ben abi wan yepiman+ di ben nen Peka.+ A man disi ben de a manpikin fu Remalia. Ne Peka span anu makandra+ nanga tra sma fu opo ensrefi teige Kownu Pekahia. A ben seti sani fu kiri Pekahia, Argob, nanga Ariye na Samaria na ini a toren fu na oso fu Kownu.+ Feifitenti sma fu Gilead ben e horibaka gi Peka. Na so a kiri Pekahia èn a bigin tiri leki kownu. 26 Ala tra sani di abi fu du nanga Pekahia èn ala sani di a du, skrifi na ini a buku+ di e taki fu den tori fu den kownu fu Israel.

27 Na ini a di fu feifitenti na tu yari di Asaria ben de kownu fu Yuda, Peka,+ a manpikin fu Remalia,+ tron kownu fu Israel. Tutenti yari langa a tiri leki kownu na Samaria. 28 Peka tan du sani di Yehovah no feni bun.+ A du soleki fa Yerobeyam,+ a manpikin fu Nebat, ben du. Den sondu fu Yerobeyam, meki taki Israel go du sondu tu.+ 29 Na a ten di Peka ben de kownu fu Israel, Kownu Tiklat-Pileiser+ fu Asiria+ teki a presi Iyon+ abra. A teki Abel-Bet-Maka+ abra tu, sosrefi Yanowa, Keides,+ Hasor,+ Gilead,+ Galilea,+ nanga a heri kontren fu Naftali.+ Ne a tyari ala den sma fu den foto disi go na Asiria leki katiboman.+ 30 Te fu kaba Hosea,+ a manpikin fu Ela, span anu makandra+ nanga tra sma fu opo ensrefi teige Peka, a manpikin fu Remalia èn a kiri en.+ Dan Hosea tron kownu na presi fu Peka na ini a di fu tutenti yari di Yotam,+ a manpikin fu Usia, ben e tiri leki kownu. 31 Ala tra sani di abi fu du nanga Peka èn ala sani di a du, skrifi na ini a buku+ di e taki fu den tori fu den kownu fu Israel.

32 Na ini a di fu tu yari di Peka, a manpikin fu Remalia, ben de kownu fu Israel, Yotam,+ a manpikin fu Kownu Usia+ fu Yuda tron kownu. 33 Yotam ben abi tutenti na feifi yari di a bigin tiri leki kownu. Tinasiksi yari langa a tiri na Yerusalem. En mama ben de Yerusa, na umapikin fu Sadok.+ 34 Yotam tan du ala sani di Yehovah feni bun.+ Den srefi sani di en papa Usia du, na dati a du tu.+ 35 Ma a no broko den hei presi puru. A pipel ben e tan go na den hei presi+ dati fu tyari srakti-ofrandi nanga smoko-ofrandi. Na Yotam ben meki a tapusei-portu fu na oso fu Yehovah.+ 36 Ala tra sani di abi fu du nanga Yotam èn den sani di a du, skrifi na ini a buku di e taki fu den tori fu den kownu fu Yuda.+ 37 Na a ten dati Yehovah seni+ Kownu Resin+ fu Siria, nanga Peka,+ a manpikin fu Remalia, fu hari go feti nanga den sma fu Yuda. 38 Te fu kaba Yotam go rostu neleki den afo fu en èn den beri en na a beripe fu den afo fu en na ini a Foto fu David, en afo.+ Dan en manpikin Akas+ bigin tiri leki kownu.