2 Kownu

24 Na a ten di Yoyakim ben e tiri leki kownu, Kownu Nebukadnesar+ fu Babilon teki Yuda abra. Na so Yoyakim tron wan futuboi+ fu Nebukadnesar dri yari langa. Ma bakaten Yoyakim opo ensrefi teige Nebukadnesar. 2 Ne Yehovah seni grupu ogri-ati fufuruman kon na Yoyakim tapu. Den fufuruman disi ben de Kaldeyasma,+ Siriasma, Moabsma,+ nanga Amonsma. Gado tan seni den go na den sma fu Yuda fu pori a kontren fu den. Disi pasa soleki fa Yehovah ben taigi den profeiti fu en.+ 3 Na Yehovah ben taki dati na so sani ben musu waka nanga Yuda. A ben puru den na en fesi,+ fu di Manase+ ben sondu èn fu di a ben du bun furu ogri. 4 Boiti dati, Manase kiri bun furu sma di no du noti.+ A kiri so furu sma, taki a brudu fu den ben kan furu heri Yerusalem. Yehovah no ben wani gi Manase pardon fu den sani di a du.+

5 Ala tra sani di abi fu du nanga Yoyakim+ èn den sani di a du, skrifi na ini a buku+ di e taki fu den tori fu den kownu fu Yuda. 6 Te fu kaba Yoyakim dede.+ Dan en manpikin Yoyakin bigin tiri leki kownu.

7 A kownu fu Babilon ben teki a kontren abra di ben de fu a kownu fu Egepte.+ A teki a heri kontren na mindri a lagipresi pe Egepte-liba+ e lon te na Eufraat-liba.+ Sensi a ten dati a kownu fu Egepte no hari komoto+ na ini a kondre fu en moro.+

8 Yoyakin+ ben abi tina-aiti yari di a bigin tiri leki kownu. Dri mun langa a tiri na Yerusalem.+ En mama ben de Nehusta, na umapikin fu Elnatan, wan man fu Yerusalem. 9 Yoyakin tan du sani di Yehovah no feni bun. Den srefi sani di en papa du, na dati a du tu.+ 10 Na a ten dati den futuboi fu Kownu Nebukadnesar fu Babilon hari go na Yerusalem èn den lontu a foto.+ 11 Ne Kownu Nebukadnesar fu Babilon go feti nanga den sma fu a foto. Disiten den futuboi fu en ben lontu a foto kaba.+

12 Te fu kaba Kownu Yoyakin fu Yuda, komoto na ini a foto fu go miti a kownu fu Babilon.+ A go nanga en mama,+ den futuboi fu en, den granman fu en, nanga den heihei man fu en. Ne a kownu fu Babilon tyari Yoyakin gowe leki katiboman. Disi pasa na ini a di fu aiti yari+ di Nebukadnesar ben e tiri. 13 Boiti dati, Nebukadnesar teki den gudu na ini na oso fu Yehovah èn den gudu na ini na oso fu Kownu,+ dan a tyari den go na dorosei. Baka dati a teki ala den gowtu wrokosani+ fu a tempel fu Yehovah, dan a koti den pisipisi. Na Kownu Salomo fu Israel ben meki den sani disi, soleki fa Yehovah ben taki. 14 Na so Nebukadnesar teki sowan tin dusun sma tyari gowe leki katiboman.+ Ala den sma fu Yerusalem a tyari gowe, sosrefi den granman,+ den tranga, deki-ati man,+ den sma di ben abi a koni fu meki moimoi sani+ èn sma di ben sabi meki bigi skotu. A no libi nowan fu den na baka, boiti den mofina sma fu a kondre.+ 15 Na so Nebukadnesar tyari Yoyakin+ go na Babilon+ leki katiboman. Nebukadnesar teki a mama fu a kownu tu,+ den uma fu en, den heihei man+ fu Yoyakin, nanga den prenspari man fu a kondre. Dan a tyari den gowe leki katiboman komoto fu Yerusalem go na Babilon. 16 A kownu fu Babilon teki ala den seibi dusun deki-ati man, nanga wán dusun man di ben sabi meki moimoi sani èn man di ben sabi bow bigi skotu, iya, a teki ala den tranga man di ben man feti. Dan a tyari den go na Babilon leki katiboman.+ 17 Baka dati a kownu fu Babilon+ poti Matanya, na omu fu Yoyakin,+ fu tiri leki kownu na presi fu Yoyakin. Boiti dati, a kownu fu Babilon kenki a nen fu Matanya kon tron Sedekia.+

18 Sedekia ben abi tutenti na wán yari+ di a tron kownu. Erfu yari langa a tiri na Yerusalem. En mama ben de Hamutal,+ na umapikin fu Yeremia, wan man fu a foto Libna. 19 Neleki fa Yoyakim ben du, na so Sedekia du tu. A du sani di Yehovah no feni bun.+ 20 Fu di Yehovah ati kon bron+ nanga den sma fu Yerusalem nanga Yuda, meki a tan gi pasi taki den sani disi pasa nanga den, teleki a ben puru den na en fesi krinkrin.+ Baka dati Sedekia opo ensrefi teige a kownu fu Babilon.+