Esra

4 Di den feanti+ fu den sma fu Yuda nanga Benyamin yere taki den sma di ben komoto na ini katibo,+ e bow wan tempel gi Yehovah, a Gado fu Israel, 2 dan wantewante den go na Serubabel+ nanga den famiri-edeman+ di ben de drape. Den taki: „Meki wi yepi unu nanga a bow-wroko,+ bika na a Gado di unu e anbegi, wi e anbegi tu.+ Wi e tyari ofrandi gi en sensi a ten fu Kownu Esar-Hadon+ fu Asiria, di tyari wi kon dya.”+ 3 Ma Serubabel, Yesuwa,+ nanga den tra famiri-edeman+ fu Israel taigi den: „Unu no abi fu yepi wi fu bow wan oso gi wi Gado.+ Wisrefi o bow wan oso gi Yehovah, a Gado fu Israel, soleki fa Kownu Sirus+ fu Persia ben taigi wi.”

4 Fu dati ede den sma fu den kondre lontu Yuda, tan du sani fu meki den sma fu Yuda lasi-ati+ èn den meki taki den sma fu Yuda no ben firi fu bow go doro.+ 5 Boiti dati, den yuru+ raiman fu gi den sma fu Yuda rai di no bun. A heri pisi ten di Sirus ben de kownu fu Persia, den sma lontu Yuda tan du den sani disi, te na a ten di Darius+ ben e tiri leki kownu fu Persia. 6 Na a ten di Ahasferos bigin tiri leki kownu, den sma fu a kondre skrifi wan brifi fu gi den sma fu Yuda nanga Yerusalem porinen.+ 7 Di Artakserkses ben e tiri leki kownu fu Persia, dan Bislam, Mitredat, Tabeyel, nanga tra heihei man di ben e wroko makandra nanga Artakserkses, seni a srefi brifi disi tu gi en, ma den skrifi en nanga Arameisi skrifimarki èn den poti en abra na ini Arameisitongo.+

8 Na Rehum di de edeman fu den lantiman, nanga en sekretarsi Simsai, ben skrifi a brifi disi fu gi den sma fu Yerusalem porinen, dan den seni en gi Kownu Artakserkses. 9 Den sma di seni a brifi disi na: Rehum+ di de edeman fu den lantiman, en sekretarsi Simsai, nanga tra heihei man, den krutuman, den ondro-granman di e tiri den kontren na abrasei fu a Gran Liba,+ den sekretarsi,+ den sma fu Erek,+ den Babilonsma,+ den sma fu Susa,+ sobun den Elamsma,+ 10 den trakondre sma+ di a bigi èn lespeki Kownu Asenapar+ ben tyari go na ini katibo èn di a ben meki go libi na den foto fu Samaria,+ nanga ala den tra sma na abrasei fu a Gran Liba. 11 Disi na san skrifi na ini a brifi:

„Gi Kownu Artakserkses.+ Disi na wan brifi fu den futuboi fu yu di e tan na abrasei fu a Gran Liba: 12 Kownu, wi wani taigi yu taki den Dyu di komoto na a kontren fu yu, kon na wi dyaso èn den de na Yerusalem. Den e bow wan foto pe soso ogri sma e libi di gwenti fu opo densrefi teige tiriman. Den e bow den skotu+ fu a foto èn den e seti den fondamenti baka. 13 Wi wani yu fu sabi taki, efu a foto disi bow baka èn efu den klari den skotu, dan den sma fu a foto no o pai nowan edemoni+ èn den no o pai belasting-moni gi sani di den bai+ noso te den o waka na son pasi. Disi o meki taki den kownu o lasi moni.+ 14 We, Kownu, fu di a pai fu wi e komoto na kownu-oso* èn fu di wi no wani taki yu lasi ala san yu abi, meki wi seni a brifi disi fu fruteri yu san e pasa. 15 Dan sma kan ondrosuku a tori disi na ini den historiabuku+ di e taki fu den afo fu yu. Na ini den buku yu o si taki den sma fu a foto dati abi a gwenti fu opo densrefi teige tiriman. A sani disi tyari problema kon gi furu kownu èn gi den sma na ini den kontren di den kownu e tiri. Sensi owruten yu abi sma na ini a foto disi di e tyari dyugudyugu kon. Dati meki a foto disi kisi pori.+ 16 Wi wani yu fu sabi taki, efu a foto disi bow baka èn efu den skotu kaba, dan yu o lasi a kontren na abrasei fu a Gran Liba.”+

17 Ne Kownu seni boskopu gi Rehum+ di de edeman fu den lantiman, gi en sekretarsi Simsai, gi den tra heihei man+ di ben e tan na Samaria èn gi den tra sma di ben e libi na abrasei fu a Gran Liba. Kownu ben skrifi:

„Mi e seni taki unu odi.+ Luku, 18 mi kisi a brifi di unu seni gi mi. Sma leisi en gi mi èn mi frustan en. 19 Sobun, mi taigi sma fu ondrosuku a tori.+ Ne den kon si taki sensi owruten den sma na ini a foto abi a gwenti fu opo densrefi teige difrenti kownu èn fu tyari bruya nanga dyugudyugu kon.+ 20 Mi kon frustan taki tranga kownu+ ben e tiri Yerusalem nanga a heri kontren na abrasei fu a Gran Liba.+ Sma ben e pai edemoni èn den ben pai belasting-moni gi sani di den bai noso te den ben e waka na son pasi.+ 21 Now un musu gi den man disi a komando fu tapu nanga a wroko fu den, so taki a foto dati no bow baka, solanga mi no gi a komando fu du dati. 22 Sobun, sorgu taki unu du ala sani di mi taigi unu fu du, so taki Kownu no lasi moro moni.”+

23 Baka di sma leisi a brifi fu Kownu Artakserkses gi Rehum,+ en sekretarsi Simsai,+ nanga den tra heihei man,+ dan den man disi go esi-esi na den Dyu na Yerusalem èn nanga tranga den meki den Dyu tapu nanga a wroko.+ 24 Na a ten dati sma tapu fu bow na oso fu Gado na Yerusalem. Ala sani tan leti so, teleki a di fu tu yari di Darius+ ben e tiri leki kownu fu Persia.