Yob

 2 „Mi winsi taki sani ben de baka leki fositen

Di Gado ben e luku mi,+

 3 Di a ben e meki en lampu skèin na tapu mi ede,

Èn di a ben e meki en leti skèin gi mi te mi ben e waka na ini dungru.+

 4 Mi winsi taki sani ben de baka leki di mi ben yongu,+

Di Gado ben de wan bun mati fu mi, èn di a ben de na ini mi tenti.+

 5 Na a ten dati na Almaktiwan ben de nanga mi ete

Èn den futuboi fu mi ben de ala sei na mi lontu!

 6 Mi ben e waka na ini botro

Èn liba fu oli ben e komoto na ini bigi ston gi mi.+

 7 Mi ben gwenti fu go na a portu fu a foto,+

Na a pren pe mi ben abi mi sidonpresi!+

 8 Te den boi ben e si mi den ben e go kibri

Èn srefi den owru sma ben e opo tanapu gi mi.+

 9 Granman srefi ben e tan pî.

Den ben e poti den anu na tapu den mofo.+

10 A sten fu fesiman no ben de fu yere

Èn den tongo fu den ben fasi na tapusei fu den inimofo.+

11 Den sma di ben e arki mi, ben e blesi mi,

Èn den sma di ben e si mi, ben e taki soso bun fu mi.

12 Bika mi ben gwenti fu frulusu den mofinawan di ben e bari suku yepi,+

Nanga den pikin di no abi papa, èn iniwan tra sma di no abi wan sma fu yepi den.+

13 Den wan di ben de fu dede ben e blesi+ mi,

Èn mi ben e prisiri na ati fu den uma di den masra dede kaba.+

14 Mi ben weri retidu leki wan krosi, iya, a ben de leki wan krosi na mi skin.+

Retidu ben de leki wan dyakti sondro mow nanga wan tai-ede gi mi.

15 Mi ben de den ai fu den breniwan,+

Èn den futu fu den lanwan.

16 Gi den pôtiwan mi ben de wan trutru papa.+

Awinsi mi no ben sabi wan sma di ben tyari wan tori na fesi krutu, toku mi ben ondrosuku a tori fu en finifini.+

17 Mi ben e broko den kakumbe fu ogriman,+

Fu frulusu den wan di ben de na mindri den tifi fu den.

18 Mi ben lobi fu taki: ’Na ini mi oso mi o dede,+

Èn den dei fu mi o furu leki aisanti.+

19 Mi rutu e dringi furu watra,+

Èn na neti dow o fadon na tapu mi taki.

20 Ibri tron baka mi e kisi furu grani.

Doronomo mi e sutu a bo di de na ini mi anu.’

21 Sma ben e arki mi èn den ben e wakti mi.

Den ben e tan pî fu arki den rai fu mi.+

22 Baka te mi ben taki, den no ben e taki moro.

Den wortu fu mi ben e dropu safrisafri na den tapu.

23 Den ben e wakti mi neleki fa gronman e wakti na alen+ fu kon,

Èn den opo den mofo bradi fu dringi den wortu fu mi leki alen di e fadon na bakayari.+

24 Te mi ben e lafu nanga den, den ben e fruwondru.

Mi fesi ben e brenki fu prisiri,+ èn nowan sma ben man kenki dati.

25 Na mi ben e sori den a pasi di den musu waka, èn mi ben de leki wan edeman gi den.

Mi ben e libi leki wan kownu na mindri den legre fu en,+

Èn leki wan sma di ben e trowstu den wan di e sari.+