Yob

3 Bakaten Yob bigin taki. A ben e fluku a dei di a gebore.+ 2 Yob taki:

 3 „Mi winsi taki a dei di mi gebore no ben de.+

Iya, a neti di wan sma taki: ’Wan manpikin gebore!’, no ben musu de.

 4 A dei dati ben musu dungru.

Gado na hemel no ben musu si a dei dati.

Nowan leti ben musu skèin na a dei dati.

 5 Bigi dungru ben musu teki a dei dati abra, iya, a ben musu dungru pikapika.

Dungru wolku ben musu tapu a heri dei dati.

Den sani di e meki deiten kon dungru, ben musu rigeri na a dei dati.+

 6 Bigi dungru ben musu teki a neti dati.+

A dei dati no ben musu prisiri leki den tra dei fu a yari.

Sma no ben musu teri a dei dati leki wan dei fu wan fu den mun na ini a yari.

 7 Nowan libi ben musu kon de na a neti dati.

Nowan sma ben musu bari fu prisiri.+

 8 Den wan di e fluku trawan

Èn di sabi fa fu wiki a bigi kaiman,*+ musu fluku a dei dati.

 9 Den stari fu a mofoneti dati ben musu kon dungru.

A dei dati ben wakti fu leti kon, ma leti no ben musu kon.

A no ben musu si a leti fu musudei.

10 A no ben musu meki mi komoto na ini mi mama bere,+

Dan mi no ben o gebore fu si ala den problema disi.

11 Fu san ede mi no dede na ini mi mama bere?+

Fu san ede mi no dede di mi komoto na ini mi mama bere?

12 Fu san ede mi mama ben musu hori mi na tapu en bowtu?

Fu san ede a gi mi bobi?+

13 Efu disi no ben pasa, dan mi ben o didon sondro broko-ede now.+

Mi ben o sribi. Mi ben o rostu,+

14 Makandra nanga den kownu èn nanga den raiman fu grontapu,+

Makandra nanga den wan di bow presi pe nowan sma e tan now,+

15 Makandra nanga den granman di abi gowtu,

Noso den wan di furu den oso nanga solfru.

16 Mi no ben musu de, neleki wan pikin di dede fosi a gebore,+

Neleki wan pikin di no si a leti fu dei.+

17 Na ini grebi den ogri sma no man tyari dyugudyugu kon moro.+

Drape den wan di no abi krakti moro, e rostu.+

18 Drape ala strafuman e rostu.

Den no e yere nowan sten fu wan sma di e dwengi den fu go wroko.+

19 Drape prenspari sma nanga sma di no prenspari de a srefi,+

Èn den srafu e kon fri fu den masra.

20 Fu san ede Gado e meki den wan di e pina, tan na libi?

Fu san ede a e gi libi na den wan di de nanga bigi sari?+

21 Fu san ede den wan di e winsi fu dede, no e dede?+

Den e suku dede moro leki gudu di kibri.

22 Den e prisiri srefisrefi

Èn den e bari fu prisiri te den feni wan grebi.

23 Fu san ede Gado e gi libi na den sma di lasi pasi?+

Fu san ede a e gi libi na sma, aladi a e tapu pasi gi den?+

24 Mi e geme te mi e nyan.+

Mi e bari tranga doronomo, neleki a watra fu wan sula.+

25 A sani di mi ben frede trutru, na dati pasa nanga mi.

A sani di ben meki mi frede, na dati miti mi.+

26 Mi no ben de sondro broko-ede èn mi no ben de sondro bruya.

Mi no ben de korostu, ma toku den problema fu mi no e kaba.”