Psalm

107 Un pipel, un taki Yehovah tangi bika a bun.+

En bun-ati de fu têgo.+

 2 Dati na san den sma di Yehovah frulusu musu taki,+

Iya, den wan di a frulusu puru na a anu fu a feanti+

 3 Èn di a puru na ini tra kondre fu tyari den kon na wán,+

Iya, ala den kondre di de na a sei pe son e opo te go miti den kondre di de na a sei pe son e dongo,+

Fu noordsei te go miti zuidsei.+

 4 Den waka lontu na ini a sabana,+ a presi pe nowan sma e tan.+

Den no ben man feni nowan pasi di ben kan tyari den go na wan foto pe den ben kan go libi.+

 5 Angri ben e kiri den èn den ben e dreiwatra.+

Den ben kon swaki te fu dede.+

 6 Di den ben de na nowtu, den ben e bari kari Yehovah.+

Te sani ben e moro den, dan a ben e yepi den.+

 7 A ben e meki den waka a reti pasi,+

So taki den ben kan feni wan foto pe den ben kan go libi.+

 8 Meki den pipel taki Yehovah tangi fu a bun-ati di a sori den+

Èn fu den bigi sani di a du gi libisma,+

 9 Bika a meki den sma di ben e dreiwatra, kisi watra fu dringi.+

Den wan di ben de nanga angri a gi bun sani fu den kan nyan den bere furu.+

10 Sma ben de di ben e libi na ini dungru, iya, na ini bigi dungru.+

Den na strafuman di e pina èn di tai nanga isri keti,+

11 Bika den no gi yesi+ na den sani di Gado taigi den.+

Den no sori lespeki gi den rai fu a Moro Heiwan.+

12 Nanga tranga a leri den fu saka densrefi.+

Den fadon, ma nowan sma ben de fu yepi den.+

13 Di den ben de na nowtu, den bari kari Yehovah fu a yepi den.+

Te sani ben e moro den, dan a ben e yepi den, soleki fa a ben gwenti du.+

14 A puru den na ini dungru, iya, na ini bigi dungru.+

A hari den keti fu den koti.+

15 Meki sma taki Yehovah tangi fu a bun-ati di a sori den+

Èn fu den bigi sani di a du gi libisma,+

16 Bika a broko den kopro doro+

Èn a koti den isri stanga trowe.+

17 Den sma di du dondon sani, fu di den ben trangayesi+

Èn fu di den ben du san fowtu, pina densrefi te fu kaba.+

18 Den ben e fisti fu ala nyanyan+

Èn den ben doro srefi te na dede mofodoro.+

19 Ne den bari kari Yehovah fu a yepi den, fu di den ben de na nowtu.+

Te sani ben e moro den, dan a ben e yepi den, soleki fa a ben gwenti du.+

20 Na gi a gi a komando nomo, dan den kon betre+

Èn a meki taki den ben man komoto na ini a grebi-olo fu den.+

21 Meki den pipel taki Yehovah tangi fu a bun-ati di a sori den+

Èn fu den bigi sani di a du gi libisma.+

22 Meki den tyari ofrandi fu taki Gado tangi+

Èn meki den bari fu prisiri te den e taki fu den sani di a du.+

23 Den wan di e teki boto fu waka na se+

Èn di e du bisnis na den bigi watra,+

24 Na den na den sma di si san Yehovah du.+

Den si den bigi sani di a du na den dipi presi.+

25 Na opo a e opo en mofo nomo, dan wan bigi winti e bigin wai+

Di e meki bigi skwala na se.+

26 Den botoman na ini den sipi e opo go na loktu

Èn den e saka go na ondro baka.

Fu di den sabi taki ogri kan miti den, meki a deki-ati fu den e smèlter gowe.+

27 Den botoman e slenger go-kon èn den e degedege neleki drunguman.+

Ala a koni fu den botoman na fu soso.+

28 Te sani e moro den, den e bari kari Yehovah.+

Dan a e puru den na nowtu.+

29 A e meki a bigi winti saka,+

So taki den skwala fu se no rigeri moro.+

30 Den breiti, fu di den skwala saka.

Baka dati a e tyari den go na iniwan lanpe di den ben e suku fu doro.+

31 Meki den pipel taki Yehovah tangi fu a bun-ati di a sori den+

Èn fu den bigi sani di a du gi libisma.+

32 Meki ala sma di kon makandra, prèise en.+

Meki den man di kon grani kaba èn di kon makandra, prèise en tu.+

33 A e meki liba tron sabana.+

A e kenki kontren pe watra e lon, kon tron drei gron.+

34 A e kenki fatu gron kon tron sowtu gron,+

Fu di den sma di e libi drape e du soso ogri.

35 A e kenki sabana kon tron watra-olo pe warimbo e gro+

Èn a e kenki kontren pe watra no de, kon tron presi pe furu watra e lon.+

36 Na drape a e meki den wan di abi angri go tan,+

So taki den kan bow wan foto fu go libi na ini.+

37 Den e sai siri na tapu den gron fu den èn den e prani droifibon,+

So taki den kan gi furu nyanyan.+

38 A e blesi den, so taki den kon furu.+

A no e meki den lasi nowan meti fu den.+

39 Agen a kon de so, taki a pipel no de nanga furu èn taki den e kisi syen,+

Fu di sma e kwinsi den, fu di ogri e miti den èn fu di den e sari.+

40 A e wisiwasi den heihei man,+

So taki den e wakawaka lontu na wan presi pe noti e gro èn pe pasi no de fu komoto.+

41 Ma a e kibri den pôtiwan, so taki den no pina.+

A e meki den famiri fu den kon bigi leki ipi-ipi meti.+

42 Den reti-ati sma o si disi èn den o prisiri.+

Ma a o tapu a mofo fu ala den sma di no e du san reti.+

43 Suma koni trutru? We, na a sma dati o si den sani disi+

Èn a o poti prakseri na a fasi fa Yehovah e sori sma bun-ati.+