Wan psalm. Wan singi fu den bakapikin fu Korak.+
48 Yehovah bigi èn a musu kisi furu grani+
Na ini a foto fu wi Gado,+ na tapu en santa bergi.+
2 Sion-bergi, di de te na noordsei,+
Moi èn a hei. Ala sma na grontapu e prisiri nanga a bergi disi,+
Iya, nanga a foto fu a Gran Kownu.+
3 Na ini den toren fu a foto disi, sma kon sabi Gado leki wan hei bergi pe den kan lon go kibri.+
4 Luku, den kownu kon na wán, soleki fa den ben meki mofo.+
Den kon, ma den alamala waka pasa.+
5 Den si a foto èn den kon frede.
Den skreki so te, taki den lon gowe bruyabruya.+
6 Leti drape den bigin beifi,+
Neleki a hebi pen di wan uma e kisi te a de fu meki wan pikin.+
7 Yu meki wan tranga winti wai kon fu owstusei fu broko den sipi fu Tarsis.+
8 Wi ben yere san Gado ben du èn now wisrefi si+
San pasa na ini a foto fu Yehovah di e tiri den legre, iya, a foto fu wi Gado.+
Noiti Gado o meki a foto disi degedege.+ Sela.
9 Mi Gado, di wi ben de na ini yu tempel,+
Wi prakseri dipi fu a bun-ati fu yu.+
10 Mi Gado, sma sabi yu nen+ èn den e prèise yu
Te na den farawe presi fu grontapu.
Yu lobi fu du san reti.+
11 Meki Sion-bergi+ prisiri.
Meki den pikin foto na ini Yuda breiti,+ fu di yu krutu sani na wan reti fasi.+
12 Un pipel, un waka lontu Sion.+
Teri omeni toren a abi.+
13 Poti prakseri na a tranga skotu fu a foto disi.
Ondrosuku den fortresi fu en,+
So taki unu kan fruteri den bakapikin fu unu san unu si,+
14 Fu di a Gado disi na wi Gado fu ala ten, iya, fu têgo.+
Na en o tiri wi teleki wi dede.+