Odo
11 Wan wegi di no soifri na wan tegu sani gi Yehovah,+ ma wan bun wegiston e gi en prisiri.
2 Efu heimemre kon, dan syen o kon tu,+ ma koni de nanga den sma di abi sakafasi.+
3 A reti fasi fa den krin-ati sma e tyari densrefi o meki taki sani waka bun gi den,+ ma a kruktudu fu den sma di e bedrigi trawan o meki taki den kisi pori.+
4 Gudu no o tyari wini kon na a dei fu bigi atibron,+ ma retidu o kibri sma, so taki den no dede.+
5 Den reti sani di wan bun sma e du o meki a pasi fu en kon reti,+ ma na a ogri di wan ogri sma e du, o meki a fadon.+ 6 Den reti sani di den krin-ati sma e du o frulusu den,+ ma den srefi sani di den bedrigiman wani du nanga trawan, na dati o pasa nanga den.+
7 Te wan ogri sma dede, dan a no abi howpu moro.+ Srefi den sani di a ben prakseri taki a o man du nanga en eigi krakti a no o man du moro.+
8 A reti-ati sma o kisi frulusu te a de na ini banawtu,+ ma den ogri sma o kon de na ini a srefi banawtu dati.+
9 Nanga en mofo, wan sma di fadon komoto na bribi e pori tra sma libi,+ ma sabi na san e frulusu den reti-ati sma.+
10 A bun di reti-ati sma e du, e meki wan heri foto prisiri,+ ma te den ogri sma kisi pori, dan sma e bari fu prisiri.+
11 A blesi di krin-ati sma e kisi, e meki sani waka bun nanga wan foto,+ ma na a mofo fu den ogri sma e meki taki a foto e broko te na gron.+
12 A sma di no abi frustan* e wisiwasi trawan,+ ma wan man di abi a koni fu man si sani krin, e tan pî.+
13 A sma di abi a gwenti fu waka e fruteri ogri-ati lei fu trawan,+ e puru sma bere kon na doro,+ ma a sma di abi a gwenti fu du san reti no e panya den tori fu trawan.+
14 Pe sma no e gi koni rai, a pipel e pina,+ ma frulusu de pe furu raiman de.+
15 Sani no o waka bun nanga wan sma di ben tan borgu gi wan trawan di a no sabi.+ Ma a sma di no lobi seki anu fu meki kruderi, no abi broko-ede.
16 Wan uma di abi bun maniri o kisi biginen,+ ma den sma di e pina trawan, na gudu wawan den o kisi.
17 Wan man di e sori trawan bun-ati e tyari wini gi ensrefi,+ ma wan ogri-ati sma o meki taki ogri miti en.+
18 Wan ogri sma e bedrigi trawan fu kan meki moni,+ ma a reti-ati sma di e wroko tranga e meki en moni na wan reti fasi.+
19 A sma di e du san reti ala ten baka o kisi libi,+ ma a sma di wani du ogri nomonomo e suku en eigi dede.+
20 Yehovah e tegu gi takru-ati sma,+ ma a e prisiri nanga den wan di e du bun.+
21 Awinsi takru-ati sma e pramisi fu horibaka gi makandra, toku den no o tan sondro fu kisi strafu,+ ma den bakapikin fu den reti-ati sma o kisi frulusu.+
22 Leki wan gowtu nosolinga na a noso fu wan agu, na so wan uma de di moi, ma di no e gebroiki en frustan.+
23 Den sani di den reti-ati sma wani du, bun trutru,+ ma den sani di den ogri sma wani du o meki Gado ati bron nanga den.+
24 Sma de di lobi fu prati sani èn toku den e kisi moro.+ Yu abi sma tu di gridi fu gi trawan sani, ma na soso pina den o pina.+
25 Sani o waka bun gi wan sma di lobi fu gi trawan sani+ èn a sma di e gi trawan watra bogobogo, o kisi watra bogobogo tu.+
26 Sma o fluku a wan di no wani seri aleisi gi den, ma den o blesi a wan di wani seri aleisi gi den.+
27 A sma di e suku fu du bun o tan du sani fu meki trawan feni en bun,+ ma ogri o miti a sma di e suku fu du ogri nomonomo.+
28 A sma di e frutrow na tapu den gudu fu en o fadon,+ ma neleki fa den wiwiri fu wan bon e gro moi, na so sani o go bun nanga den reti-ati sma.+
29 Iniwan sma di e meki taki ogri miti en osofamiri,+ o grabu winti.+ Wan sma di e du dondon sani, o de a futuboi fu a koniwan.
30 Den sani di wan reti-ati sma e taki èn e du, de leki wan bon di e gi libi.+ A sma di e yepi trawan fu du bun, na wan koni sma.+
31 Hori na prakseri: wan reti-ati sma o kisi en pai na grontapu.+ We, dan a no de fu taki dati a pai fu wan ogri sma nanga wan sondari, o de moro hebi srefi.+