Singi fu Salomo

7 „Yu na wan uma di de klariklari+ fu yepi trawan. Te yu e waka, dan yu futu moi srefisrefi na ini den susu+ fu yu! Den moi bowtu fu yu gersi moi gowtu sani+ di sma e weri na den skin èn di koni gowtusmeti meki. 2 Yu kumba de leki wan lontu komki. Meki win+ de drape ala ten. Yu bere de leki wan ipi aleisi na mindri leilibromki.+ 3 Yu tu bobi de leki tu pikin dia, iya, leki twelengi fu wan umadia.+ 4 Yu neki+ de leki wan toren di meki fu ivoor. Yu ai+ de leki den watra-olo fu Hesbon+ na a portu fu Bat-Rabim. Yu noso de leki a toren fu Libanon di de abrasei fu Damaskus. 5 Yu ede de leki Karmel-bergi.+ Yu wiwiri+ di e anga lusulusu na yu ede, de leki skapu-wiwiri di ferfi kon redi.+ Kownu lobi a fasi fa yu wiwiri de.+ 6 Mi lobiwan, yu moi moro iniwan tra sani èn yu e gi mi prisiri trutru, moro leki iniwan tra sani!+ 7 Yu skin gersi wan palmbon+ èn den bobi+ fu yu gersi bosu dadel-froktu. 8 Mi taki: ’Mi o kren go na ini a palmbon, so taki mi kan fasi den taki nanga den dadel-froktu.’+ Meki den bobi fu yu tron leki bosu droifi èn meki a bro fu yu smeri leki apra. 9 Meki a tapusei fu yu inimofo de leki a moro bun win+ di e grati+ go na ini a gorogoro fu mi lobiwan. Safrisafri a e grati pasa a mofobuba fu den wan di e sribi.”

10 „Mi na fu mi lobiwan+ èn na mi a e angri fu si.+ 11 Mi lobiwan, mi e begi yu, kon meki wi go na dorosei.+ Meki wi tan na mindri den henna-wiwiri+ heri neti. 12 Tangitangi, meki wi opo frukufruku mamanten fu go luku den droifidyari, so taki wi kan si efu den droifibon kisi yongu wiwiri kaba,+ efu den bromki opo kaba,+ noso efu bromki de na den granaki-aprabon+ kaba. Drape mi o sori taki mi lobi yu.+ 13 Den lobi-apra+ e smeri switi èn ala sortu fu den moro switi froktu+ de na den doro fu na oso fu wi. Iya, mi lobiwan, mi poti froktu na wan sei gi yu, froktu di mi broko didyonsro nanga froktu di mi ben abi kaba.