Yesaya

10 Helu fu den sma di e meki ala sortu ogri wèt,+ nanga den wan di e skrifi sani di e meki trawan pina! 2 Helu fu den sma di e du den sani disi! Den no wani taki den mofinawan kisi leti na ini krutu-afersi èn den wani puru a reti fu den pinaman na mindri mi pipel.+ Na so den e teki den gudu fu den uma di den masra dede. Den e teki srefi den sani fu den pikin di no abi papa!+ 3 Ma san unu o du na a ten te unu musu gi frantwortu+ fu den sani di unu du? San unu o du te rampu kon miti unu fu farawe?+ Na suma unu o lon go suku yepi?+ Pe a glori fu unu o de dan?+ 4 Na mindri den strafuman unu o abi fu kroipi. A wan sma baka a trawan o fadon na mindri den wan di den kiri kaba.+ Na fu di unu e tan du ogri, meki Gado en ati e bron nanga unu ete èn a e naki unu ete.+

5 „Luku bun! Mi o gebroiki Asiria+ leki fonfon-tiki, fu di unu meki mi ati bron.+ A tiki de na ini en anu fu strafu unu soleki fa mi wani! 6 Mi o seni en fu strafu a pipel di drai baka gi mi.+ Mi o taigi en+ fu go na a pipel di meki mi ati bron èn fu teki ala den gudu fu den. A musu trapu den leki tokotoko na strati.+ 7 Kande Asiria no de so, ma toku a o du san mi taki. Kande en ati no takru, ma toku a o prakseri fu du ogri. Bika na ini en ati+ a de wan kiriman èn a no pikinso pipel a o figi puru.+ 8 A o taki: ’Den granman fu mi na kownu+ tu, a no so? 9 Kalno+ de leki Karkemis,+ èn Hamat+ de leki Arpad,+ a no so? Samaria+ de leki Damaskus,+ a no so? 10 Luku san mi du nanga den kownukondre pe sma e anbegi gado di no warti noti, èn pe den e anbegi moro popki leki den sma na Yerusalem nanga Samaria.+ 11 We, a srefi sani di mi du nanga Samaria èn nanga den gado fu en di no warti noti,+ mi o du nanga Yerusalem èn nanga den popki+ di a e anbegi.’

12 Te mi, Yehovah, kaba du ala mi wroko na Sion-bergi èn na Yerusalem, dan mi o strafu a kownu fu Asiria, fu di a abi drei-ai èn fu di a abi bigifasi.+ 13 Bika a ben taki: ’Mi o du sani nanga mi krakti+ èn na wan koni fasi, bika mi koni trutru. Mi o puru den marki di den pipel poti fu sori o bigi a kondre fu den de+ èn mi o teki den sani di den kibri.+ Leki wan tranga man mi o trowe den sma drape na gron.+ 14 Den kondre de leki fowrunesi. Mi o langa mi anu+ grabu ala den gudu+ fu den pipel, iya, neleki eksi di libi na ini wan fowrunesi mi o teki srefi a gron fu den. Nowan fowru o naki naki en frei èn den no o opo den mofo fu bari.’”

15 Wan aksi sa hei ensrefi moro a sma di e kapu sani nanga en? Wan sa kan firi ensrefi moro kefalek leki a sma di e sa nanga en? Efu wan sma opo wan tiki hei noso a e buweigi en go-kon, a tiki man taki dati na en meki a sma du dati?+ 16 Fu dati ede a tru Masra Yehovah di e tiri den legre, o meki den steifisteifi man fu Asiria kisi wan takru siki di o meki den kon mangri.+ Asiria no abi nowan glori moro. A o de leki wan faya bron en krinkrin.+ 17 A Leti fu Israel+ musu tron wan faya.+ Iya, a Santawan fu en na wan faya.+ Dan a o bron den takru wiwiri nanga den makabusi+ fu Asiria krinkrin na ini wán dei. 18 A o puru a glori fu a busi nanga a froktudyari fu Asiria.+ Iya, a o pori den krinkrin neleki te a skin fu wan siki sma e pori gowe.+ 19 Wan tu bon nomo o tan abra na ini en busi. Iya, wan pikin boi srefi o man skrifi omeni tan abra.+

20 Na a ten dati den sma di tan abra fu Israel+ nanga den sma fu Yakob di ben man lowe gowe, noiti no o frutrow moro na tapu den wan di e naki den.+ Na presi fu dati den o frutrow nanga den heri ati+ na tapu Yehovah, a Santawan fu Israel.+ 21 Iya, wan tu sma nomo di tan abra fu den sma fu Yakob, o drai go baka na a Tranga Gado.+ 22 Ai Israel, unu ben furu leki den aisanti na ini se,+ ma na soso wan tu sma nomo o tan abra fu drai go baka.+ Nanga reti+ Gado bosroiti fu tyari wan pori+ kon na un tapu, èn leki wan frudu a pori o kon na ini a heri kondre. 23 A Moro Hei Masra Yehovah di e tiri den legre, o pori+ a heri kondre trutru,+ soleki fa a ben bosroiti dati kaba.

24 Fu dati ede a Moro Hei+ Masra Yehovah di e tiri den legre taki: „Mi pipel di e tan na Sion,+ grantangi, no frede Asiria di ben naki unu+ nanga tiki èn di ben opo en tiki fu naki unu neleki fa Egepte ben e du dati.+ 25 Ete wan syatu pisi ten nomo, dan mi ati o kon kowru.+ Mi ati no o bron moro te a e dede gowe.+ 26 Yehovah di e tiri den legre o naki en nanga wipi+ èn a o wini en neleki di a wini den feanti na Oreb-ston+ na ini Midian. A o langa en tiki na tapu a se+ èn a o opo en neleki fa a ben du nanga Egepte.+

27 Na a ten dati a hebi lai di Asiria ben poti na yu skowru+ o komoto, a tyatyari fu en o komoto na yu neki,+ èn a tyatyari fu en o broko+ fu na oli ede.”

28 A go feti nanga Ayat+ èn a pasa na ini Migron. Na Mikmas+ a e poti den bagasi fu en. 29 A abra a liba na a presi pe a watra no dipi. Geiba+ na a presi pe a e sribi na neti. Rama+ e beifi gi en èn den sma fu Gibeya,+ a foto pe Saul ben e libi, lowe gi en. 30 Ai umapikin fu Galim,+ bari bun tranga! Luku bun, Laisya! Ke pôti, Anatot!+ 31 Madmena lon gowe gi en. Den sma fu Geibim go kibri gi en. 32 A o kon na Nob+ te a de deiten ete. A tai en kofu fu di a wani feti nanga den sma na a bergi fu na umapikin fu Sion, sobun, a bergi pe Yerusalem+ de.

33 Luku! A tru Masra Yehovah di e tiri den legre, e kapu bigi taki puru èn den e fadon+ na doti bun tranga èn nanga bigi babari. A e koti den wan di gro hei. Den heiwan kon lagi.+ 34 Nanga wan isri wrokosani a naki den grangran na ini a busi broko, èn wan tranga sma o meki den bon fu Libanon fadon.+