Yesaya

15 Disi na wan krutuboskopu gi Moab:+ Na neti sma pori Ar+ na ini Moab. Dati meki ala sani de pî. Na neti sma pori Kir+ na ini Moab. Dati meki ala sani de pî. 2 A go krei na a tempel, na Dibon+ èn na den hei presi pe a e anbegi den gado fu en. Moab e bari krei, fu di Neibo+ nanga Medeba+ kisi pori. Ala sma drape krebi den ede+ èn den alamala koti den barba. 3 Na strati den e waka nanga rowkrosi.+ Ala sma e bari krei na tapu den daki+ èn na den pren. Den e saka na gron èn den e krei.+ 4 Hesbon nanga Elale+ e bari. Te na Yahas+ sma yere den sten. Dati meki den fetiman fu Moab srefi e bari. Den ati e beifi.

5 Mi ati e krei fu Moab ede.+ Den loweman fu Moab doro te na Sowar+ nanga Eklat-Selisia.+ Nanga watra-ai ibriwan fu den e kren go na Luhit.+ Na a pasi fu Horonayim+ den e bari krei fu a rampu ede. 6 Srefi Nimrim-liba+ kon drei leki wan sabana. A grun grasi kon drei, iya, ala grasi dede. Nowan grun wiwiri de moro.+ 7 Dati meki den sma teki ala den sani di tan abra èn di den ben kibri, dan den tyari den te na abrasei fu a liba pe den populier-bon de. 8 Na ini a heri kontren fu Moab+ sma e bari. Te na Eklayim sma e yere a babari fu den. Te na Beyer-Elim sma e yere a babari fu den. 9 Bika Dimon-liba furu nanga brudu. Ma mi o meki moro ogri sani pasa na Dimon. Lew o nyan den loweman fu Moab nanga den sma di tan abra na ini Moab.+