Yesaya
29 „Helu fu Ariyel,+ a foto pe David ben seti kampu!+ Un pipel, go doro fu hori den fesa fu unu ibri yari.+ 2 Mi o sorgu taki Ariyel kon na ini banawtu.+ Sma o row, den o bari krei+ èn a foto o kon de leki mindrisei fu na altari fu Gado pe faya de.+ 3 Mi o seti kampu ala sei na un lontu èn mi o feti nanga unu. Mi o seti wan skotu fu srapu postu èn wan bigi dan na un lontu.+ 4 Unu o kon lagi te na gron èn na drape unu o taki. Nanga wan dipi sten unu o taki na gron. A o gersi leki a sten fu unu e komoto na ini a gron,+ neleki te bonuman e taki nanga wan sten di gersi a babari fu pikin fowru.+ 5 Den trakondre sma o tron leki finifini puiri+ èn den ogri-ati sma+ o wai gowe leki aleisibuba.+ Wantronso èn wantewante a sani disi o pasa.+ 6 Yehovah di e tiri den legre o yepi unu. Te a o du disi dondru o bari, a gron o seki èn wan bigi babari o de fu yere. Wan bigi winti, wan bigi sibibusi èn wan bigi faya di e pori ala sani o de tu.”+
7 A o de leki wan dren èn leki wan fisyun na neti te den pipel kon feti nanga Ariyel.+ Iya, ala den sma di kon feti nanga en na neti, ala den sma di abi spesrutu fetiwagi fu feti nanga en èn ala den sma di e kwinsi en+ o de leki wan dren èn leki wan fisyun. 8 Iya, a o de neleki te wan sma di abi angri e dren taki a e nyan, ma te a wiki a de nanga angribere+ ete. A o de neleki te watra e kiri wan sma èn a e dren taki a e dringi, ma te a wiki a weri èn watra e kiri en ete. Na so sani o de gi ala den pipel di e feti nanga den sma na Sion-bergi.+
9 Un tan luku nanga opo mofo.+ Un tapu un ai èn un du leki unu no man si.+ Den kon drungu,+ ma a no win drungu den. Den e seiriseiri te den e waka, ma a no sopi meki den e waka so.+
10 Yehovah meki unu sribi dipi.+ A tapu un ai, dati na den profeiti.+ A tapu un ede srefi,+ dati na den sma di e kisi fisyun.+ 11 Unu no o man frustan nowan fisyun. A o de neleki te sma skrifi wan buku, dan den tapu en nanga wan stampu+ èn den gi dati na wan sma di sabi leisi en. Te sma taigi en: „Grantangi, leisi na ini meki wi yere”, dan a sma o taki: „Mi no man, bika a tapu nanga wan stampu.”+ 12 Dan den o gi a buku na wan sma di no sabi leisi èn den o taigi en: „Grantangi, leisi na ini meki wi yere.” A sma o taki: „Mi no sabi leisi srefisrefi.”
13 Yehovah taki: „Nanga den mofo nomo a pipel disi e taki dati den de krosibei fu mi. Den e gi mi glori nanga den mofo nomo,+ ma den ati de farawe fu mi.+ Den feni taki den e frede mi, ma den e gi yesi soso na den komando di libisma e leri den.+ 14 Fu dati ede, mi de dya, a sma di o du ete wan kefalek sani nanga a pipel disi.+ A o de wan wondru èn wan sani di sma no si noiti ete. A koni fu den koniman fu den o lasi gowe èn a sabi fu den sabiman fu den no o de moro.”+
15 Helu fu den sma di e du ala muiti fu kibri gi Yehovah san den wani du!+ Den e du den sani fu den na ini dungru+ èn den e taki: „Suma e si wi? Suma sabi san wi e du?”+ 16 San meki a denki fu unu fromu so! Wan patu-bakriman de a srefi leki a klèidoti+ di a e gebroiki? Efu wan sma meki wan sani, a sani man taki: „A no meki mi”?+ A sani di wan sma meki man taki fu en mekiman: „A no abi frustan”?+
17 A no o teki langa fosi Libanon tron wan froktudyari èn a froktudyari+ srefi o kon bigi leki wan busi,+ a no so? 18 Na a ten dati den dofuwan o yere san skrifi na ini a buku.+ Den breniwan o si awinsi den de na ini dungru noso awinsi a dungru pikapika.+ 19 Den mofinawan+ o prisiri moro nanga moro fu Yehovah ede. Srefi den pôti sma o prisiri fu a Santawan fu Israel ede.+ 20 Bika den ogri-ati sma, den sma di e dyaf èn ala den sma di de klariklari fu du ogri,+ o dede.+ 21 Son sma e drai den wortu fu trawan, so taki den kan taki dati a trawan sondu.+ Trawan e kori den krutuman di de na den portu fu a foto+ nanga den sani di den e taki. Den e lei, so taki den reti-ati sma no e kisi san den abi reti na tapu.+
22 Fu dati ede Yehovah, a sma di frulusu Abraham,+ taigi den sma fu Yakob: „Yakob no o firi syen moro. Syen no o meki en fesi kenki kloru moro.+ 23 Bika te a luku den pikin di mi gi en,+ dan a o si taki den e si mi nen leki wan santa sani.+ Den o si a Santawan fu Yakob+ leki wan santa sma èn den o abi bigi lespeki gi a Gado fu Israel.+ 24 Den sma di no e denki na wan yoisti fasi o kisi frustan èn den wan di e krutukrutu o kisi leri.”+