Yesaya

35 A sabana nanga den presi sondro watra o bari fu prisiri.+ Iya, a drei sabana o breiti srefisrefi èn a o lai bromki.+ 2 Fu tru, a o gi furu bromki.+ A o breiti srefisrefi èn a o bari fu prisiri.+ A o kisi a glori fu Libanon+ èn a o moi leki Karmel+ nanga Saron.+ Den o si a glori fu Yehovah,+ iya, den o si a moi fu wi Gado.+

3 Un pipel, meki den swaki anu kon tranga èn meki den kindi di e beifi kon steifi.+ 4 Taigi den wan di e bruya:+ „Abi deki-ati.+ No frede.+ Luku, un eigi Gado o kon fu puru atibron tapu den feanti.+ Iya, Gado o kon fu pai den fu den ogri di den du.+ Ensrefi o kon fu frulusu unu.”+

5 Na a ten dati den ai fu den breniwan o si+ èn den yesi fu den dofuwan o yere.+ 6 Na a ten dati lan sma o kren leki dia+ na tapu den bergi. A tongo fu den babaw-wan o bari fu prisiri.+ Bika na ini den sabana watra o kuku kon na tapu èn liba o lon na den drei sabana. 7 A drei gron o tron leki wan swampu èn a gron di no abi watra o tron leki wan watra-olo.+ Na a presi pe den sabanadagu e tan,+ grun grasi, warimbo, nanga papirus-grasi o gro.+

8 Wan bigi pasi o de drape+ di den o kari a Pasi fu Santafasi.+ Den sma di no krin no o waka na tapu a pasi dati.+ A o de soso gi den sma di abi a reti fu waka na tapu. Nowan donman o wakawaka na tapu. 9 Nowan lew o de drape èn nowan ogri busimeti o kon na tapu a pasi.+ Iya, nowan fu den o de drape.+ Na soso den wan di bai kon fri o waka drape.+ 10 Den wan di Yehovah bai kon fri o drai kon baka+ na Sion. Den o bari fu prisiri+ èn den o breiti fu ala ten.+ Na soso prisiri den o prisiri èn den no o sabi moro san na geme nanga sari.+