Yesaya
47 Saka go sidon na ini a doti,+ umapikin fu Babilon di de wan nyunwenke ete.+ Sidon na tapu a gron pe nowan kownusturu no de,+ umapikin fu den Kaldeyasma.+ Noiti moro yu o yere sma e kari yu wan moi yongu uma di abi wan switi libi.+ 2 Teki wan anumiri,+ dan yu go meki blon. Puru a moi duku na yu fesi.+ Puru a moi langa koto fu yu+ meki sma si yu bowtu,+ dan yu abra den liba. 3 Sma o si yu sososkin.+ Den o si taki yu kisi syen.+ Mi o puru atibron na yu tapu,+ èn nowan sma o man tapu mi.
4 „Wan sma de di bai wi.+ Yehovah di e tiri den legre na en nen.+ En na a Santawan fu Israel.”+
5 Sidon pî.+ Kon na ini a dungru,+ umapikin fu den Kaldeyasma.+ Noiti moro sma o kari yu Bigi Misi+ fu den Kownukondre.+ 6 Mi ati ben bron nanga mi pipel.+ Dati meki mi pori a santa gudu fu mi+ èn mi meki yu wini den.+ Yu no ben sari den.+ Yu ben poti wan hebi tyatyari na tapu a skowru fu den owru man.+ 7 Ala yuru yu ben taki: „Mi o tan Bigi Misi+ fu ala ten.” Yu no ben poti prakseri na den sani di yu ben du. Yu no ben denki san ben o pasa nanga yu te fu kaba.+
8 Ma arki now, yu uma di lobi meki prisiri èn di abi wan bun libi.+ Yu e prakseri: „Mi na a wan. Nowan trawan no de.+ Mi no o tron wan uma di en masra dede kaba èn nowan pikin fu mi o dede.”+ 9 Ma na den tu sani disi o pasa nanga yu wantronso. Na ini wán dei+ den pikin fu yu nanga yu masra o dede. Yu libi o pori dorodoro,+ bika yu lobi bonu èn na soso wisi yu e wisi sma. Iya, yu e du den sani disi pasa marki.+ 10 Yu denki taki den ogri di yu e du, o kibri yu.+ Yu taki: „Nowan sma e si mi.”+ A koni nanga a sabi fu yu+ na den sani di meki yu lasi pasi. Yu e prakseri: „Mi na a wan. Nowan trawan no de.” 11 Rampu o kon na yu tapu èn nowan bonu o man yepi yu. Ogri o miti yu+ èn yu no o man wai pasi gi en. Wantronso+ wan rampu di yu no fruwakti, o miti yu.
12 Go doro nanga a wisi di yu e wisi sma èn nanga a bonu di yu e bonu.+ Sensi di yu yongu yu e bonu furu. Kande yu o feni wini èn kande sma o frede yu now. 13 Yu kon weri fu ala den raiman fu yu. Meki den sma di e anbegi den sani na hemel, nanga den lukuman di e luku den stari+ nanga den nyun mun fu sabi san o pasa nanga yu, opo tanapu now fu kon frulusu yu. 14 Luku! Den kon tron leki drei wiwiri.+ Wan faya o bron den.+ Den no o man puru densrefi+ fu a faya.+ Nowan faya krofaya o de gi sma fu waran densrefi. Nowan faya o de pe sma kan sidon fu waran den skin. 15 Na dati o pasa nanga den lukuman fu yu di ben koti luku gi yu+ sensi di yu yongu. Ibriwan fu den o wakawaka lontu na ini den eigi kontren sondro fu sabi pe den musu go. Nowan sma o de fu frulusu yu.+