Yeremia

1 Disi na den wortu fu Yeremia,+ a manpikin fu Helkia di ben de wan fu den priester na Anatot+ na ini a kontren fu Benyamin:+ 2 Yehovah bigin gi mi boskopu na ini a di fu tinadri yari di Kownu Yosia,+ a manpikin fu Amon,+ ben e tiri Yuda.+ 3 A gi mi boskopu tu a heri pisi ten di Kownu Yoyakim,+ a manpikin fu Yosia, ben e tiri Yuda, teleki a lasti yari di Kownu Sedekia, a manpikin fu Yosia, ben e tiri Yuda. Sedekia ben e tiri erfu yari+ èn na ini a di fu feifi mun+ fu a di fu erfu yari den sma fu Yerusalem go na ini katibo.

4 Ne Yehovah taigi mi: 5 „Mi ben sabi yu kaba+ fosi mi ben meki yu na ini yu mama bere.+ Fosi yu mama meki yu, mi ben bosroiti kaba taki yu o du wan santa wroko.+ Mi o meki yu tron wan profeiti gi den pipel.”

6 Ma mi taki: „Ke mi Moro Hei Masra Yehovah! Luku, mi no sabi srefisrefi fa fu taki.+ Mi na wan boi ete.”+

7 Dan Yehovah taigi mi: „Yu no musu taki: ’Mi na wan boi ete.’ Yu musu go na ala den sma pe mi o seni yu go èn ala san mi taigi yu, yu musu taki.+ 8 No frede te yu e si den fesi,+ bika mi, Yehovah, taki: ’Mi de nanga yu èn mi o frulusu yu.’”+

9 Ne Yehovah langa en anu èn a fasi mi mofo.+ Dan Yehovah taigi mi: „Luku, mi poti mi wortu na ini yu mofo.+ 10 Tide mi gi yu a wroko fu rutu den pipel nanga den kownukondre+ puru. Yu musu naki den na gron, yu musu pori den èn yu musu trowe den na gron.+ Boiti dati, yu musu bow èn prani tu.”+

11 Dan Yehovah aksi mi: „San yu e si, Yeremia?”

Mi piki: „Mi e si wan pransun fu wan amandrabon.”

12 Yehovah taigi mi: „Yu si bun. Mi o tan na ai, bika mi o du nomonomo san mi taki.”+

13 Dan Yehovah aksi mi ete wan leisi: „San yu e si?”

Ne mi piki: „Mi e si wan bradimofo patu di e kuku na tapu wan faya. A mofo fu en kanti gowe fu a noordsei.”

14 Dan Yehovah taigi mi: „Fu noordsei wan rampu o kon na tapu ala den sma di e tan na ini a kondre.+ 15 Bika mi, Yehovah, taki: ’Mi e kari ala den lo fu den kownukondre fu noordsei kon.+ Den o kon poti den kownusturu na den portu fu Yerusalem.+ Den o kon fu broko ala den skotu di de lontu Yerusalem èn den o feti nanga ala den foto fu Yuda.+ 16 Mi o krutu den fu di den du furu ogri.+ Bika den gowe libi mi,+ den e tyari smoko-ofrandi gi tra gado,+ èn den e boigi gi sani di den srefi meki.’+

17 Ma yu musu tai yu mindri+ èn yu musu opo go taigi den ala san mi taigi yu fu taki. No frede den,+ noso mi o meki yu frede srefisrefi te yu de na den fesi. 18 Luku, tide mi o meki yu tron leki wan tranga foto, wan isri postu, nanga wan kopro skotu,+ so taki yu man tanapu kánkan na ini a kondre+ te den kownu fu Yuda, den granman, den priester, nanga a pipel fu a kondre kon na yu tapu.+ 19 Yu kan de seiker taki den o kon feti nanga yu, ma den no o wini yu,+ bika mi, Yehovah, taki: ’Mi de nanga yu+ èn mi o frulusu yu.’”+