Yeremia

28 A ben de a di fu feifi mun fu a di fu fo yari di Sedekia+ ben e tiri leki kownu fu Yuda. Na ini a yari dati a profeiti Hananya+ di ben de fu Gibeon+ èn di ben de a manpikin fu Asur, taigi mi na ini na oso fu Yehovah na fesi den priester nanga ala sma di ben de drape: 2 „Yehovah di e tiri den legre, a Gado fu Israel, taki: ’Mi o broko a tyatyari fu a kownu fu Babilon.+ 3 A no o doro tu heri yari fosi mi teki ala den wrokosani fu na oso fu Yehovah di Kownu Nebukadnesar ben tyari go na Babilon.+ Dan mi o tyari den kon na a presi disi baka.’” 4 „Yehovah taki: ’Mi o puru Kownu Yekonya,+ a manpikin fu Yoyakim+ di e tiri Yuda, na Babilon, makandra nanga ala den tra katiboman fu Yuda.+ Mi o tyari den kon na a presi disi baka. Mi o broko a tyatyari+ fu a kownu fu Babilon.’”

5 Ne a profeiti Yeremia taki nanga a profeiti Hananya na fesi den priester nanga ala sma di ben tanapu drape na ini na oso fu Yehovah.+ 6 A profeiti Yeremia taki: „Amen!+ Meki Yehovah du so! Meki Yehovah du ala san yu taki. Meki a puru den wrokosani fu na oso fu Yehovah nanga ala den katiboman na Babilon, èn meki a tyari den kon baka na a presi disi!+ 7 Ma grantangi, arki san mi o taigi yu nanga ala den sma dyaso.+ 8 Fosi mi èn fosi yu, profeiti ben de na ini owruten+ di ben e taki profeititori di ben abi fu du nanga furu kondre èn nanga bigi kownukondre. Den ben taki fu feti, rampu, nanga takru siki.+ 9 Fu dati ede, te wan profeiti e taki dati bun ten o kon,+ dan a musu sori taki a abi leti. Wi o sabi taki na Yehovah seni en, soso te den sani di a taki pasa trutru.”+

10 Ne a profeiti Hananya puru a tyatyari na a skowru fu a profeiti Yeremia, dan a broko en.+ 11 Dan Hananya+ taki na fesi ala sma: „Yehovah taki:+ ’Na a srefi sani mi o du nanga a tyatyari fu Kownu Nebukadnesar fu Babilon. A no o doro tu heri yari fosi mi broko a tyatyari fu en puru na a skowru fu ala den pipel.’”+ Ne Yeremia gowe.+

12 Baka di a profeiti Hananya broko a tyatyari di ben de na a skowru fu a profeiti Yeremia, Yehovah taigi Yeremia:+ 13 „Go taigi Hananya: ’Yehovah taki: „Yu broko tyatyari+ fu udu, ma now yu o abi fu meki tyatyari fu isri.”+ 14 Yehovah di e tiri den legre, a Gado fu Israel, taki: „Mi o poti wan isri tyatyari na a skowru fu ala den pipel disi, so taki den o dini Kownu Nebukadnesar fu Babilon.+ Iya, den o abi fu dini en.+ Mi o meki a tiri den ogri busimeti srefi.”’”+

15 Dan a profeiti Yeremia taigi a profeiti Hananya:+ „Grantangi Hananya, arki! A no Yehovah seni yu, ma na yu meki a pipel bribi a lei disi.+ 16 Fu dati ede Yehovah taki: ’Mi o figi yu puru na grontapu. A yari disi ete yu o dede,+ bika yu prefuru fu gi sma deki-ati fu opo densrefi teige Yehovah.’”+

17 Dati meki a profeiti Hananya dede na ini a di fu seibi mun fu a yari dati.+