Esekièl
19 „Ma yu musu singi wan sari singi+ di abi fu du nanga den edeman fu Israel.+ 2 Taigi den: ’San un mama ben de? A ben de wan umalew na mindri den tra lew.+ A ben e didon na mindri yongu lew. Drape a ben e kweki den pikin lew fu en.
3 Na so a kweki wan fu den pikin fu en.+ A pikin tron wan yongu lew di leri fa fu kiri tra meti.+ A ben e nyan libisma srefi. 4 Den tra kondre ben e yere san a ben e du. Dati meki den fanga en na ini wan peti èn nanga aka den tyari en go na Egepte.+
5 Di na umalew si taki na fu soso a e wakti èn taki a no ben o si a pikin fu en moro, dan a teki wan tra pikin fu en.+ A kweki en kon tron wan tranga yongu lew. 6 Ne a yongu lew bigin waka nanga den tra lew. A tron wan tranga lew. Safrisafri a leri fa fu kiri tra meti.+ A ben e nyan libisma srefi.+ 7 A ben sabi den toren pe sma ben e tan. Srefi den foto fu den a broko.+ Na so a kondre fu den tron wan brokopresi èn a babari fu a lew ben de fu yere na ala sei.+ 8 Ma den tra pipel na ini a heri kontren na en lontu bigin feti nanga en.+ Den fringi wan nèt na en tapu.+ Den fanga en na ini a peti fu den.+ 9 Nanga aka den tyari en go poti na ini wan koi. Dan den tyari en go na a kownu fu Babilon.+ Nanga nèt den tyari en gowe, so taki sma no ben o yere a babari fu en moro na den bergi fu Israel.+
10 Yu mama+ ben de leki wan droifibon na ini yu brudu.+ A ben prani na wan presi pe furu watra de. A ben gi froktu èn a ben lai taki, fu di a ben kisi furu watra.+ 11 Den taki fu en tron tiki di tranga nofo fu tron kownutiki.+ Safrisafri a bon kon hei moro den tra bon. Fu di a ben hei èn fu di a ben lai furu wiwiri, meki ala sma ben man si en.+ 12 Ma fu di Gado ati bron, a hari en puru.+ A trowe en na gron, dan wan faya winti fu owstusei drei den froktu fu en.+ A hari a tranga tiki fu en puru èn a kon drei.+ Dan faya bron a tiki.+ 13 Now a droifibon prani na ini wan sabana,+ na ini wan presi pe watra no de.+ 14 Faya komoto na a tiki fu en.+ A faya bron den pransun èn srefi den froktu fu en. A no ben abi nowan tranga tiki moro. Nowan kownutiki no ben de moro.+
Disi na wan sari singi èn a o tan wan sari singi.’”+