Mika
2 „Helu fu den wan di e prakseri soso ogri èn den wan di e didon na tapu den bedi e prakseri sortu ogri den o du!+ Te mamanten doro, dan den e go du ogri,+ fu di den abi a makti fu du san den wani.+ 2 Te den wani wan gron, den e teki en+ èn te den wani wan oso, den e teki en tu. Den e bedrigi wan man nanga en osofamiri,+ fu teki a gron fu en.+
3 Fu dati ede Yehovah taki: ’Mi o tyari wan rampu+ kon na tapu a pipel disi+ èn nowan fu unu o man wai pasi gi dati.+ Unu no o abi bigifasi moro,+ fu di a o de wan ten fu rampu.+ 4 Na a ten dati sma o meki odo+ nanga sari singi+ di abi fu du nanga un pipel. Den o taki: „Nanga tranga, sma fufuru ala sani fu wi!+ Luku fa sma e teki den gron fu wi!+ Den e gi den gron fu wi pipel na tra sma. Den e prati den gron fu wi gi sma di no e dini Gado.” 5 Fu dati ede, nowan sma fu Yehovah en pipel o gebroiki wan titei fu marki gron, baka te den iti lòt+ fu prati den gron. 6 Un no musu taki nowan profeititori.+ Den e taki profeititori, ma den no o taki noti fu den sani disi di o pasa. Den musu fu kisi syen.+
7 „A de so taki a yeye fu Yehovah no abi pasensi moro? Na en e du den sani disi?”+ Un sma fu Yakob,+ a no dati sma e taki? Den sani di mi e taki e tyari wini kon gi den wan di e waka na wan reti fasi,+ a no so?+
8 Esde mi eigi pipel tron wan trutru feanti.+ Te sma e waka pasa sondro fu frede, neleki srudati di drai kon baka fu wan feti, dan unu e hari a moi sani puru na fesisei fu a krosi fu den. 9 Unu e yagi den uma fu mi pipel puru na ini den oso fu den pe den abi wan bun libi. Un teki den bun sani di mi gi den pikin fu den+ èn no gi den noiti moro.+ 10 Un opo dan unu gowe,+ bika dyaso a no wan presi fu rostu.+ Fu di a kondre no krin,+ meki a e kisi pori. A de wan hati sani fu si fa a kondre e kisi pori.+ 11 Efu wan wisiwasi man e bedrigi sma èn a e taki a lei disi:+ „Mi o taigi unu profeititori di abi fu du nanga win èn nanga tranga sopi”, dan wantewante a pipel disi o teki en leki profeiti.+
12 Mi o tyari un alamala, iya, ala sma fu Yakob, kon makandra.+ Mi o tyari den Israelsma di tan abra, kon makandra.+ Mi o meki den de wán leki wan ipi skapu na ini wan pen èn leki wan ipi skapu na den weigron.+ Furu babari o de fu yere drape.’+
13 A sma di e broko pasa a skotu, o tyari den pasa a skotu.+ Iya, den o pasa a skotu trutru. Den o pasa wan portu go na dorosei.+ A kownu o tyari den pasa a portu èn Yehovah o de na den fesi.”+