Numeri

17 Baka dati Yehovah taigi Moses: 2 „Taki nanga den Israelsma èn teki den tiki+ fu den edeman fu ibri lo, sobun twarfu tiki yu musu teki. Yu musu skrifi a nen fu ibri edeman+ na tapu a tiki fu en. 3 Skrifi a nen fu Aron na tapu a tiki fu a lo fu Leifi, bika wán tiki musu de gi na edeman fu ibri lo. 4 Dan yu musu poti den na ini a konmakandra-tenti na fesi a santa kisi fu a frubontu,+ pe mi gwenti kon na unu.+ 5 Yu o si taki a tiki fu a man di mi teki,+ o gi bromki. Na so mi o meki den Israelsma tapu nanga a krutu di den e krutu nanga mi.+ Dan den no o krutu nanga unu moro.”+

6 Sobun, Moses taki nanga den Israelsma, èn ala den edeman fu den lo gi en wan tiki. Ibri edeman gi en wán tiki, sobun twarfu tiki+ ben de. Aron ben gi a tiki+ fu en tu. 7 Dan Moses poti den tiki na fesi Yehovah na ini a tenti pe a santa kisi fu a frubontu de.+

8 A tra dei di Moses go na ini a tenti pe a santa kisi fu a frubontu de, dan a si taki a tiki fu Aron di ben de fu a lo fu Leifi, ben gi bromki. A ben gi bromki di opo èn bromki di no opo ete, nanga lepi amandra. 9 Moses teki ala den tiki di ben de na fesi Yehovah, dan a tyari den gi den Israelsma fu den si. Ne ibri edeman teki en eigi tiki.

10 Baka dati Yehovah taigi Moses: „Poti a tiki fu Aron+ na fesi a santa kisi fu a frubontu baka, èn meki a tan drape leki wan warskow+ gi den wan di opo densrefi+ teige mi. Dan den o tapu nanga a krutu di den e krutu nanga mi, èn den no o dede.” 11 Wantewante Moses du san Yehovah taigi en. A du leti so.

12 Ne den Israelsma taigi Moses: „Now wi o lasi wi libi trutru, wi o dede seiker. Iya, wi alamala o dede gowe.+ 13 Iniwan sma di kon krosibei+ fu a tabernakel fu Yehovah o dede!+ Na wi alamala musu dede?”+