Deuteronomium

1 Bakaten Moses taki nanga a heri pipel Israel di den ben de na ini a sabana, na ini a birti fu Yordan-liba.+ Den ben de na ini a sabana na fesi Suf, na mindri Paran,+ Tofel, Laban, Haserot,+ nanga Di-Sahab. 2 A e teki erfu dei fu waka fu Horeb go na Kades-Barneya+ te yu e teki a pasi fu Seyir-bergi. 3 Na a fosi dei fu a di fu erfu mun, na ini a di fu fotenti+ yari, Moses fruteri den Israelsma ala san Yehovah seni en fu taigi den. 4 Dati ben de baka di a wini Kownu Sihon+ fu den Amorietsma di ben e tan na Hesbon èn Kownu Ok+ fu Basan di ben e tan na a foto Astarot+ na ini Edrei.+ 5 Na ini a birti fu Yordan-liba, na ini a kondre Moab, Moses tyari den wèt+ kon na krin gi a pipel. A taki:

6 „Yehovah wi Gado, ben taigi wi na Horeb:+ ’Unu tan langa nofo na a bergikontren disi.+ 7 Un drai go na a bergikontren fu den Amorietsma+ èn na ala den kontren na ini a birti fu Araba-lagipresi,+ a bergikontren,+ Syefela, Negeb-sabana,+ a sesyoro,+ a kondre fu den Kanansma,+ nanga Libanon.+ Un musu go te na a bigi Eufraat-liba.+ 8 Luku, mi o gi unu a kondre disi. Un musu go teki a kondre abra di Yehovah sweri fu gi un afo Abraham, Isak,+ Yakob,+ nanga den bakapikin fu den.’+

9 Na a ten dati, mi taigi unu: ’Mi wawan no man tyari unu.+ 10 Yehovah un Gado meki unu kon furu, èn now unu de so furu leki den stari na hemel.+ 11 Meki a de so, taki Yehovah, a Gado fu den afo fu unu, meki unu kon de dusun tron moro furu+ èn meki a blesi+ unu leki fa a pramisi unu.+ 12 Fa mi wawan o man tyari unu èn fa mi o du nanga a krutu di unu e krutu? Unu de leki wan hebi gi mi.+ 13 Suku wan tu man di koni+ èn di abi ondrofeni+ na ini den lo fu unu, dan mi kan poti den leki edeman fu unu.’+ 14 Ne unu piki mi: ’A bun, wi o du san yu taigi wi fu du.’ 15 Sobun, mi teki den edeman fu den lo fu unu, den wan di koni èn di abi ondrofeni, dan mi poti sonwan fu den fu tiri dusun sma, sonwan fu tiri hondro sma, sonwan fu tiri feifitenti sma, èn sonwan fu tiri tin sma. Den trawan mi poti leki fesiman na ini den lo fu unu.+

16 Na a ten dati, mi taigi den krutuman fu unu: ’Te unu musu krutu wan afersi fu den brada fu unu, dan un musu krutu na wan reti fasi,+ awinsi a de wan krutu-afersi fu wan Israelsma nanga wan Israelsma, noso wan krutu-afersi fu wan Israelsma nanga wan trakondre sma di e tan na un mindri.+ 17 Un no musu teki sei na ini wan krutu-afersi.+ Un musu arki a heiheiwan, ma un musu arki a mofinawan tu.+ Un no musu frede libisma,+ bika na gi Gado unu e koti krutu.+ Den afersi di muilek tumusi gi unu, un musu tyari gi mi, so taki mi kan krutu den.’+ 18 Na a ten dati, mi taigi unu ala san un musu du.

19 Baka dati, wi hari gowe fu Horeb èn wi waka a heri sabana+ di bigi srefisrefi èn di e meki sma frede, soleki fa unu sabi. Wi waka a pasi di e go na a bergikontren fu den Amorietsma+ soleki fa Yehovah wi Gado taigi wi. Te fu kaba wi doro na Kades-Barneya.+ 20 Ne mi taigi unu: ’Unu kon na a bergikontren fu den Amorietsma di Yehovah un Gado o gi wi.+ 21 Yehovah un Gado libi a kondre gi unu.+ Go teki en abra, bika na dati Yehovah a Gado fu den afo fu unu, taigi unu.+ No beifi èn no frede.’+

22 Ma un alamala kon taigi mi: ’Meki wi seni wan tu man go fu luku a kondre, so taki den kan taigi wi sortu pasi wi musu waka èn sortu foto wi o miti na pasi.’+ 23 Mi ben feni a sani disi bun. Dati meki mi teki twarfu man na un mindri, wán man fu ibri lo.+ 24 Dan den man dati drai go na a bergikontren+ èn den waka go te na Eskol-lagipresi+ fu luku fa a kondre tan. 25 Den tyari wan tu froktu fu a kondre+ kon gi wi èn den fruteri wi: ’A kondre di Yehovah wi Gado o gi wi, na wan bun kondre.’+ 26 Ma unu no ben wani go na ini a kondre+ èn unu no gi yesi na a komando fu Yehovah un Gado.+ 27 Unu tan krutukrutu na ini un tenti. Unu ben e taki: ’Na fu di Yehovah no man si wi na ai,+ meki a tyari wi komoto na a kondre Egepte+ fu meki den Amorietsma kiri wi.+ 28 Fa wi o man go na ini a kondre? Den brada fu wi meki wi kon frede+ srefisrefi di den taki: „A pipel tranga moro wi èn den sma bigi moro wi.+ Den foto fu den bigi èn den skotu fu den hei te na hemel.+ Drape wi si den Enaksma+ tu.”’

29 Dati meki mi ben taigi unu: ’Un no musu beifi èn un no musu frede den.+ 30 Yehovah un Gado e waka na un fesi. Na en o feti gi unu.+ Unu si nanga un eigi ai san a ben du gi unu na ini Egepte+ 31 èn na ini a sabana.+ Neleki fa wan man e tyari en manpikin, na so Yehovah un Gado tyari unu+ a heri pasi teleki unu doro na a presi disi.+ Unu srefi si dati.’ 32 Ma aladi mi taigi unu a sani disi, toku unu no ben wani bribi Yehovah un Gado+ 33 di ben e waka na un fesi fu luku pe unu ben kan seti kampu.+ Nanga wan faya a sori unu pe un musu waka na neti, èn na deiten a sori unu a pasi nanga wan wolku.+

34 A heri pisi ten dati, Yehovah yere san unu ben e taki. Dati meki en ati bron èn a sweri:+ 35 ’Nowan fu den ogriman disi o go na ini a moi kondre di mi sweri fu gi den afo fu den.+ 36 Soso Kaleb, a manpikin fu Yefune,+ o go na ini a kondre pe a ben go kaba. Mi o gi en nanga den bakapikin fu en a kondre dati, fu di a du ala san Yehovah taki.+ 37 (Na fu unu ede, Yehovah ati bron nanga mi tu, èn a taigi mi: ’Yu tu no o go na ini a kondre.+ 38 Na yu futuboi Yosua, a manpikin fu Nun, o go na ini a kondre.’+ Gado gi en krakti,+ fu di na en o meki Israel kisi a kondre.) 39 Unu ben taki fu den pikin fu unu: „Sma o tyari den gowe!”+ Ma na den pikin dati èn den manpikin fu unu di no sabi san na bun èn san na ogri, o go na ini a kondre. Mi o gi den a kondre èn den o tan drape. 40 Ma un musu drai go baka na ini a sabana èn un musu teki a pasi di e go na a Redi Se.’+

41 Dan unu piki mi: ’Wi sondu teige Yehovah.+ Kon meki wi go feti soleki fa Yehovah wi Gado taigi wi!’ Ne ibriwan fu unu teki en fetisani. Unu ben denki taki a ben o makriki fu kren a bergi.+ 42 Ma Yehovah taigi mi: ’Taigi den: „Un no musu go feti, bika mi no de nanga unu.+ Efu unu du dati, den feanti o wini unu.”’+ 43 Dati meki mi taki nanga unu, ma unu no arki mi èn unu trangayesi a komando fu Yehovah.+ Toku unu prefuru fu kren a bergi.+ 44 Ne den Amorietsma di ben e tan na tapu a bergi, kon feti nanga unu èn den kon na un baka+ leki wasiwasi. Den yagi unu go na Seyir èn te na Horma srefi.+ 45 Baka dati, unu drai kon baka èn unu bigin krei gi Yehovah, ma Yehovah no arki unu èn a no poti prakseri na unu.+ 46 Na so unu tan bun langa na Kades.+