Nehemia
2 A ben de a mun Nisan+ fu a di fu tutenti+ yari di Artakserkses+ ben e tiri leki kownu. Soleki fa mi ben gwenti, mi teki a win di ben de na en fesi, dan mi kanti dati gi en fu a dringi.+ Ma noiti ete Kownu ben si mi nanga wan sari fesi.+ 2 Sobun, a aksi mi: „A no siki yu e siki. Dan fu san ede yu de nanga wan sari fesi?+ A musu de taki wan sani e trobi yu.”+ Ne mi kon frede srefisrefi.
3 Dan mi piki Kownu: „Meki Kownu libi fu têgo!+ Fa mi no musu sari dan? A foto+ pe den afo fu mi beri,+ de wan brokopresi èn sma bron den portu fu a foto.”+ 4 Dati meki Kownu aksi mi: „San yu wani mi du gi yu?”+ Wantewante mi begi+ a Gado fu hemel.+ 5 Dan mi piki Kownu: „Efu Kownu feni en bun+ èn efu Kownu lobi mi,+ dan seni mi go na Yuda, na a foto pe den afo fu mi beri. Meki mi go bow en baka.”+ 6 A moro prenspari uma fu Kownu ben e sidon na en sei, di Kownu aksi mi: „O langa yu o tan èn o ten yu o drai kon baka?” Di mi taigi Kownu o langa mi ben o tan,+ dan a ben feni en bun+ fu seni mi go.
7 Boiti dati, mi taigi Kownu: „Efu Kownu feni en bun, dan gi mi wan tu brifi+ gi den granman+ fu den kontren na abrasei fu a Gran Liba,+ so taki den kan gi mi primisi fu pasa na ini a kontren fu den, teleki mi doro Yuda. 8 Gi mi wan brifi gi Asaf tu, a man di e luku a bigi dyari fu Kownu. Dan a kan gi mi primisi fu go koti udu drape fu meki portu gi a Fortresi+ fu a tempel+ èn fu meki a skotu+ fu a foto nanga na oso pe mi o tan.” Sobun, Kownu gi mi den brifi, fu di mi Gado ben de nanga mi.+
9 Te fu kaba, mi doro na den granman+ na abrasei fu Gran Liba, dan mi langa den brifi fu Kownu gi den. Boiti dati, Kownu seni legre-edeman nanga srudati di e rèi asi, fu kon nanga mi. 10 Di Sanbalat+ fu Bet-Horon,+ nanga Tobia,+ wan Amonsma+ di ben de wan futuboi fu Kownu, yere a sani disi, den no ben lobi a tori kwetikweti,+ fu di den no ben feni en bun taki wan sma ben kon fu yepi den Israelsma.
11 Baka wan pisi ten mi doro na Yerusalem. Mi tan drape dri dei. 12 Dan mi nanga wan tu man opo na neti. Mi no taigi nowan sma+ san mi Gado ben wani taki mi musu du gi Yerusalem.+ A wan-enkri osometi di mi ben tyari kon nanga mi, na a wan di mi ben e rèi na tapu. 13 A neti dati mi pasa na Lagipresi-portu+ go na dorosei. Mi pasa na fesi a Peti fu a Bigi Sneki, dan mi go na Asisi-portu.+ Disiten mi ben e ondrosuku pe den skotu+ fu Yerusalem ben broko èn mi luku den portu+ di ben bron. 14 Baka dati mi pasa go na Peti-portu+ èn na Kownu-peti. Di mi doro drape, a meti di mi ben e rèi, no ben man pasa go moro fara. 15 A neti dati, di mi ben de na ini a lagipresi,+ mi tan kren go moro fara, fu di mi ben wani ondrosuku a skotu. Baka dati mi drai kon baka èn mi waka na Lagipresi-portu+ fu go na ini a foto.
16 Ma den ondro-granman+ no ben sabi pe mi ben go èn san mi ben e du. Mi no ben taigi den Dyu, den priester, den edeman, den ondro-granman, nanga den tra wrokoman, noti ete. 17 Te fu kaba mi taigi den: „Unu e si taki sani no e waka bun gi wi. Yerusalem de wan brokopresi èn sma bron den portu fu a foto. Kon meki wi bow a skotu fu Yerusalem baka, so taki sma no teki wi leki spotupopki moro.”+ 18 Dan mi fruteri den taki mi Gado ben de nanga mi+ èn taki a ben yepi mi.+ Mi taigi den san Kownu ben taigi mi.+ Ne den man taki: „Meki wi opo go bow a skotu wantewante.” Sobun, den gi makandra deki-ati èn den sreka densrefi fu du a wroko.+
19 Di Sanbalat+ fu Bet-Horon, nanga Tobia,+ na Amon man di ben de wan futuboi+ fu Kownu èn na Arabiri+ Geisem+ yere disi, dan den bigin spotu wi+ èn den ben e wisiwasi wi. Ne den aksi wi: „San unu e du? Na opo unu e opo unsrefi teige Kownu?”+ 20 Ma mi piki den: „A Gado fu hemel+ na a sma di o meki sani waka bun gi wi.+ Wi leki futuboi fu en musu opo go bow a skotu disi. Ma unu no abi noti e suku dya+ èn unu no abi nowan reti dyaso tu. Unu no ben du nowan sani fu sma na Yerusalem memre+ unu.”