Yob

 2 „Te now ete mi e krutukrutu, fu di mi lai broko-ede.+

A geme di mi e geme meki mi kon swaki so te, taki mi no man opo mi anu srefi.

 3 Mi winsi taki mi ben sabi pe Gado de!+

Dan mi ben o go te na a presi pe a de.+

 4 Na fesi krutu mi ben o taki nanga en.

Mi ben o taki-go-taki-kon nanga en so furu leki mi man.

 5 Mi ben o prakseri fu den sani di a ben o taigi mi,+

Èn mi ben o frustan den.

 6 A ben o kon nanga ala en krakti fu haritaki nanga mi?

Kwetikweti! A ben o arki mi trutru.+

 7 Dan wan reti-ati sma o seti a krutu-afersi di a abi nanga en.

Mi krutuman ben o taki dati mi no musu kisi strafu noiti.

 8 Mi go suku en na owstusei, ma a no ben de drape.

Dan mi drai go baka, ma mi no ben man feni en drape tu.+

 9 Mi go suku en na mi kruktu-anusei pe a e wroko, ma mi no ben man si en drape.

A drai go na reti-anusei, ma toku mi no e si en.

10 A sabi mi libi heri bun.+

Baka te a tesi mi, mi o tron leki soifri gowtu.+

11 Mi waka na ini den futumarki fu en.

Mi no e komoto na en pasi, ma mi e tan na en tapu.+

12 Mi e tan hori den komando fu en.+

Mi du moro leki san a aksi fu mi.+

13 Wán sani nomo de na en ede, èn nowan sma kan tapu en fu du san a wani.+

Efu a wani du wan sani, dan a e du en tu.+

14 A o du ala sani di a bosroiti fu du nanga mi.+

A e du den sani dati furu tron.

15 Fu dati ede mi e bruya.

Mi e poti prakseri na en èn mi e frede en.+

16 Iya, Gado meki mi lasi-ati.+

Na Almaktiwan bruya mi.+

17 Bigi dungru tapu mi fesi.

Ma toku mi no o tan pî.