Yesaya
32 Luku, wan kownu+ di o tyari retidu+ kon o tiri, èn den granman+ o tiri na wan reti fasi. 2 Ibriwan fu den o de leki wan kibripresi gi tranga winti èn gi sibibusi.+ Den o de leki wan liba di e lon na wan kontren sondro watra+ èn leki a kowrupe fu wan bigi ston na ini wan kontren di drei.+
3 Den ai fu den wan di e si no o tapu, èn den yesi fu den wan di e yere o arki.+ 4 Na ati fu den wan di e du sani sondro fu denki fosi, o suku fu kisi moro koni.+ Srefi a mofo fu den wan di e gagu o taki sani esi-esi èn krin.+ 5 Sma no o taki moro dati den wan di no abi frustan lobi fu gi sani. Sma no o taki moro dati den wan di no abi maniri na bun sma.+ 6 A sma di no abi frustan o taki soso dondon sani.+ A o prakseri soso ogri,+ fu di a wani drai baka gi Gado+ èn a wani taki lei fu Yehovah. Te sma de nanga angri, a no e gi den nyanyan.+ Te watra e kiri sma, a no e gi den nowan sani fu dringi. 7 Den wrokosani fu a sma di no abi maniri no bun kwetikweti.+ Soso yayolibi de na en prakseri.+ Den lei fu en e pori a libi fu den mofinawan.+ A e lei gi den pôtiwan awinsi den abi leti.
8 Ma a sma di lobi fu gi sani e gi sma rai taki den musu lobi fu gi sani tu. Ala ten a de klariklari fu gi sma sani.+
9 „Ai un uma di abi wan bun libi, un opo arki mi sten!+ Ai un umapikin di no abi nowan broko-ede, un yere san mi e taki! 10 Ete wan yari nanga wan tu dei nomo, dan unu o bruya,+ bika unu no o abi nowan droifi èn a ten fu piki droifi pasa kaba.+ 11 Un beifi, un uma di abi wan bun libi! Un sma di no abi broko-ede, unu o kon bruya! Un puru un krosi na un skin, dan unu weri krosi di e sori taki unu e sari.+ 12 Naki unsrefi na tapu un borsu èn bari krei+ fu den sani di pasa nanga den bun gron+ èn nanga den moi droifibon fu unu. 13 Na den gron fu mi pipel soso makabon nanga makabusi o gro.+ Den o gro na tapu ala den oso pe sma ben e meki prisiri, iya, na ini a heri foto pe bigi prisiri ben de.+ 14 Sma no e tan moro na ini a toren.+ Nowan babari no de moro na ini a foto. Ofel+ nanga den waktiman-toren fu en kon tron wan opo presi. Fu ala ten den sabanaburiki o meki prisiri drape, èn drape bigi grupu meti o nyan grasi. 15 Na so ala sani o tan teleki Gado poti en yeye na wi tapu.+ Dan a sabana o tron wan froktudyari èn a froktudyari o kon bigi leki wan busi.+
16 Retidu o tan na ini a sabana èn na ini a froktudyari.+ 17 Te trutru retidu o du en wroko, dan ala sani o waka bun.+ Iya, te trutru retidu de, ala sma o de korostu ala ten èn den no o abi broko-ede.+ 18 Mi pipel o tan na ini oso pe den e firi bun. Den no o bruya, èn nowan sma o kon muilek den na a presi pe den e tan.+ 19 Te pisipisi ijs fadon komoto na hemel a busi o pori+ èn a foto o broko te na gron.+
20 Koloku fu un sma di e sai siri na ala presi pe watra de+ èn di e lusu den mankaw nanga den buriki na ini a wei.”+