Yesaya
24 Luku! Yehovah o meki a kondre kon leigi. A o meki a tron wan brokopresi+ èn a o drai en tapu.+ A o yagi den sma di e libi drape go na ala sei.+ 2 Sani o de a srefi gi a pipel nanga a priester, gi a futuboi nanga en masra, gi na umasrafu nanga en misi, gi a sma di e bai sani nanga a sma di e seri sani, gi a sma di e leni trawan sani nanga a sma di go leni sani na trawan, gi a sma di e teki rente nanga a sma di e pai rente.+ 3 Fu tru, a kondre o kon leigi èn sma o teki ala sani fu a kondre tyari gowe,+ bika na Yehovah srefi taki dati.+ 4 A kondre e sari,+ a pori gowe. A gron kon drei, a pori gowe. Den heihei man fu a kondre e pina.+ 5 Den sma di e libi drape pori a kondre,+ fu di den no gi yesi na den wèt.+ Den kenki den wèt+ èn den no gi yesi na a frubontu di ben musu tan fu ala ten.+ 6 Dati meki a fluku kon tapu a kondre+ èn a pori en krinkrin. Na den sma di e libi drape meki taki disi pasa. Fu dati ede furu fu den sma disi no de moro. Wan tu fu den nomo tan abra.+
7 A nyun win e sari èn a droifibon kon drei.+ Ala den sma di ben e meki prisiri e geme now.+ 8 Nowan prisiri poku de fu yere moro. Iya, nowan tyengretyengre, nowan sten fu sma di e meki prisiri èn nowan harpu de fu yere moro.+ 9 Den no e singi moro te den e dringi win. Sopi kon de wan bita sani gi den wan di e dringi en. 10 Sma gowe libi a foto èn a tron wan brokopresi.+ Den tapu ala oso èn nowan sma kan go na ini. 11 Na strati sma e bari, fu di den wani win. Nowan sma e prisiri moro. Nowan prisiri de na ini a kondre moro.+ 12 Sma gowe libi a foto di pori krinkrin. Den naki a portu broko èn a tron wan ipi broko ston.+
13 Na disi o pasa nanga a pipel. Na mindri den tra pipel den o de leki den olèif di tan abra baka te sma seki olèif puru na den bon.+ Den o de leki den droifi di tan abra baka te sma piki droifi na den bon.+ 14 Den o opo den sten èn bari fu prisiri. Komoto fu a se den o bari fu prisiri,+ fu di Yehovah bigi. 15 Den o prèise Yehovah+ na ini a kontren pe son e opo.+ Den o prèise Yehovah, a Gado fu Israel, na den tabiki na ini a se.+ 16 Te na den moro farawe presi fu a kondre wi yere poku e prei.+ Sma e singi: „Meki a Reti-ati Gado kisi glori!”+
Ma mi e taki: „Mi e mangri gowe,+ mi e mangri gowe! Helu fu mi! Den bedrigiman e bedrigi sma.+ Iya, den bedrigiman e bedrigi sma moro nanga moro.”+
17 Un sma di e libi na ini a kondre, soso frede, olo, nanga trapu e wakti unu.+ 18 Iniwan sma di e lon gi a babari fu a sani di e meki en frede, o fadon na ini na olo. Iniwan sma di komoto na ini na olo, o fadon na ini a trapu.+ Den sroisi fu hemel o opo+ èn a gron o seki.+ 19 A gron o priti opo, a o seki èn a o beifi.+ 20 A kondre o degedege leki wan drunguman èn a o seki go-kon leki wan pikin kampu+ na ini wan gron. Den sondu fu en de leki wan hebi lai na en tapu.+ Dati meki a o fadon èn a no o opo moro.+
21 Na a ten dati Yehovah o poti prakseri na a legre na hemel nanga den kownu na grontapu.+ 22 A o tyari den kon makandra neleki fa sma e tyari strafuman kon makandra na ini wan peti+ èn a o sroto den na ini strafu-oso.+ Baka furu dei a o poti prakseri na den.+ 23 A furu mun nanga a brenki son e syen,+ bika Yehovah di e tiri den legre tron kownu+ na tapu Sion-bergi+ na Yerusalem, èn den owru man si a glori fu en.+