Numeri

32 Baka wan pisi ten, den bakapikin fu Ruben+ nanga den bakapikin fu Gad+ ben kon abi bun furu meti. Ne den kon si taki den presi Yaeser+ nanga Gilead bun fu kweki meti. 2 Dati meki den bakapikin fu Gad nanga den bakapikin fu Ruben kon taigi Moses, Priester Eleasar, nanga den edeman fu a pipel: 3 „Den presi Atarot,+ Dibon,+ Yaeser, Nimra,+ Hesbon,+ Elale,+ Sebam, Neibo,+ nanga Beon,+ 4 di Yehovah gi+ den Israelsma, na presi di bun fu kweki meti, èn wi leki futuboi fu yu abi furu meti.”+ 5 Den taki tu: „Efu yu feni en bun, dan grantangi, gi wi den presi disi. No meki wi abra Yordan-liba.”+

6 Moses taigi den bakapikin fu Gad nanga den di fu Ruben: „Den brada fu unu musu go feti, dan unu e tan dyaso?+ 7 Unu wani den Israelsma lasi-ati? Unu wani taki den no abra go na ini a kondre di Yehovah o gi den? 8 Dati na san den tata fu unu ben du+ di mi seni den komoto na Kades-Barneya+ fu go luku a kondre. 9 Ne den doro na Eskol-lagipresi+ èn den si a kondre. Dan den meki den Israelsma lasi-ati èn den no ben wani go na ini a kondre di Yehovah pramisi den.+ 10 Fu dati ede Yehovah ati bron a dei dati èn a sweri+ taki 11 den sma di komoto na Egepte èn di ben abi tutenti yari noso moro leki dati,+ no ben o go na ini a kondre di a sweri fu gi Abraham, Isak, nanga Yakob,+ bika den no du ala san a taigi den. 12 Soso Kaleb,+ a manpikin fu a Keinas man Yefune, èn Yosua,+ a manpikin fu Nun, ben o go na ini a kondre, bika den du ala san Yehovah taigi den. 13 Sobun, Yehovah ati bron nanga Israel èn a meki den waka lontu na ini a sabana fotenti yari langa+ teleki ala den sma di ben sondu teige Yehovah dede gowe.+ 14 Now unu e du leki den papa fu unu di ben sondu èn unu wani meki Yehovah ati bron+ moro nanga Israel. 15 Efu unu no wani gi yesi na en,+ dan a o meki a pipel waka moro langa na ini a sabana+ èn unu o meki moro ogri miti a pipel disi.”+

16 Bakaten den kon baka na Moses èn den taki: „Meki wi bow skapupen fu ston èn foto gi den pikin fu wi. 17 Dan wi o hari go leki wan legre+ makandra nanga den tra Israelsma teleki den doro na a presi pe den musu go. Ma den pikin fu wi o tan na ini den foto di abi skotu, dan den sma fu a kondre no o man du den noti. 18 Wi no o drai go baka na oso, teleki ibri Israelsma kisi wan presi gi ensrefi.+ 19 Wi no wani wan pisi kontren na abrasei fu Yordan-liba neleki den tra Israelsma, bika wi wani a kontren di e bigin na disi sei fu Yordan-liba go na a sei pe son e opo.”+

20 Dan Moses taigi den: „Un taki dati unu o sreka unsrefi fu feti gi Yehovah.+ We, efu unu du dati trutru 21 èn Yehovah si taki ibri fetiman fu unu abra Yordan-liba fu go feti teleki a yagi den feanti fu en,+ 22 èn efu unu no drai baka+ solanga Yehovah no si taki a kondre teki abra,+ dan unu no sondu teige Yehovah nanga Israel. Dan Yehovah o feni en bun fu gi unu a kontren disi.+ 23 Ma efu unu no du soleki fa unu taki, dan unu sondu teige Yehovah.+ Un musu sabi taki unu o pai gi a sondu fu unu.+ 24 Bow foto gi den pikin fu unu èn skapupen fu ston. Unu kan du soleki fa unu taki.”+

25 Dan den bakapikin fu Gad èn den di fu Ruben taigi Moses: „Masra, wi o du san yu taki.+ 26 Den pikin nanga den wefi fu wi èn den osometi nanga den tra meti fu wi o tan na ini den foto na Gilead.+ 27 Ma wi leki futuboi fu yu, iya, ibriwan fu wi di man feti na ini a legre,+ o abra Yordan-liba fu go feti gi Yehovah, soleki fa yu taki.”

28 Dan Moses gi wan komando di abi fu du nanga den tu lo dati. A taigi Priester Eleasar, nanga Yosua, a manpikin fu Nun, èn den edeman fu den lo fu Israel: 29 „Efu ibri fetiman fu Gad èn fu Ruben abra Yordan-liba fu go feti+ gi Yehovah, èn unu teki a kondre abra kaba, dan un musu gi den a presi Gilead.+ 30 Ma efu den no abra fu go feti makandra nanga unu, dan den musu kon tan nanga unu na ini a kondre Kanan.”+

31 Dan den bakapikin fu Gad èn den di fu Ruben taki: „Wi sa du san Yehovah taigi wi fu du.+ 32 Wi sa abra go feti gi Yehovah na ini a kondre Kanan,+ dan a kontren na disi sei fu Yordan-liba sa de fu wi.”+ 33 Baka dati Moses gi a kontren na den bakapikin fu Gad,+ den bakapikin fu Ruben,+ èn den sma fu na afu lo fu Manase,+ a manpikin fu Yosef. A gi den a kondre fu Kownu Sihon+ fu den Amorietsma, èn a gi den a kondre fu Kownu Ok+ fu Basan. A gi den a heri kontren nanga ala den foto fu den kownu disi.

34 Baka dati den bakapikin fu Gad bow den foto Dibon,+ Atarot,+ Arower,+ 35 Atrot-Sofan, Yaeser,+ Yokbeya,+ 36 Bet-Nimra+ nanga Bet-Haran.+ Ala den foto disi ben lontu nanga skotu+ èn den ben abi skapupen fu ston.+ 37 Den bakapikin fu Ruben ben bow den foto Hesbon,+ Elale,+ Kiriatayim,+ 38 Neibo,+ Bâal-Meon,+ nanga Sibma baka. Baka dati den gi den foto tra nen.

39 Ne den bakapikin fu Makir,+ a manpikin fu Manase, hari go na Gilead. Den yagi den Amorietsma di ben e tan drape, dan den teki a foto abra. 40 Dan Moses gi Gilead na den bakapikin fu Makir, a manpikin fu Manase. Ne den go tan drape.+ 41 Yahir, wan bakapikin fu Manase ben teki den pikin foto na ini Gilead abra, dan a kari den Hafot-Yahir.+ 42 Noba ben teki a foto Keinat+ èn den tra foto na ini a birti abra, dan a gi a kontren en eigi nen Noba.