Wan psalm fu David. A skrifi en na a ten di a ben e du leki wan lawman+ na fesi Abimeilek. Na fu a sani dati Abimeilek yagi David komoto na en tapu, so taki a gowe.
א [Alef]
34 Mi o prèise Yehovah ala ten.+
Doronomo mi o opo mi mofo fu gi en grani.+
ב [Bet]
2 Mi o prèise Yehovah gi den sani di a du.+
Den safri-ati sma o yere èn den o prisiri.+
ג [Gimel]
3 Un pipel, un gi Yehovah glori makandra nanga mi.+
Kon meki wi alamala prèise en nen.+
ד [Dalet]
4 Di mi begi Yehovah fu a yepi mi, a piki mi.+
Ne a meki taki mi no ben frede moro.+
ה [He]
5 Koloku fu den wan di e frutrow na en tapu,+
Bika noiti den o kisi syen.+
ז [Sayin]
6 A mofinawan disi bari kari Gado èn Yehovah srefi arki en.+
Gado puru en na ala den nowtu fu en.+
ח [Ket]
7 Na engel fu Yehovah de lontu ala den sma di e lespeki Gado+
Èn a e frulusu den.+
ט [Tet]
8 Un pipel, tesi èn si taki Yehovah bun.+
Koloku fu a man di e go suku kibri na en.+
י [Yod]
9 Lespeki Yehovah, un alamala di de santawan fu en,+
Bika den wan di e lespeki en, no e mankeri noti.+
כ [Kaf]
10 Angri ben e kiri den yongu lew, fu di den no ben abi noti fu nyan,+
Ma den sma di e suku yepi na Yehovah, no o mankeri noti.+
ל [Lamed]
11 Un kon, mi manpikin. Mi e begi unu, arki mi.+
Mi o leri unu fa fu abi lespeki gi Yehovah.+
מ [Mem]
12 Suma na a sma di lobi a libi+
Èn di e angri fu libi langa fu si soso bun?+
נ [Nun]
13 Kibri yu tongo fu no taki ogri,+
Èn yu mofobuba fu no taki bedrigi sani.+
ס [Samek]
14 No du ogri moro, ma du san bun.+
Suku freide èn du muiti fu feni en.+
ע [Ayin]
15 Den ai fu Yehovah e si den reti-ati sma,+
Èn den yesi fu en e yere te den e bari suku yepi na en.+
פ [Pe]
16 Yehovah e drai baka gi den wan di e du ogri.+
A o wai den puru na grontapu, so taki nowan sma no memre den moro.+
צ [Tsade]
17 Den reti-ati sma bari kari Gado èn Yehovah srefi yere den.+
Ne a puru den na nowtu.+
ק [Kof]
18 Yehovah de krosibei fu den sma di lasi-ati.+
A e frulusu den wan di brokosaka.+
ר [Resj]
19 A reti-ati sma abi furu problema,+
Ma Yehovah e lusu den alamala gi en.+
ש [Syin]
20 A e kibri ala den bonyo fu a sma disi,
So taki nowan fu den broko.+
ת [Taw]
21 Ogri o miti den ogri sma èn te fu kaba den o dede.+
Den wan di no lobi den reti-ati sma, o kisi krutu.+
22 Ma Yehovah e kibri a libi fu den futuboi fu en.+
Nowan fu den sma di e lon go kibri na en, o kisi krutu.+