Sakaria
7 Na ini a di fu fo yari di Kownu Darius+ ben e tiri, Yehovah taki nanga Sakaria na a di fu fo dei fu a di fu neigi mun Kislef.+ 2 Ne den sma fu Betel seni Sareiser, Reigem-Meilek, nanga den man fu en fu go begi Yehovah meki en ati no bron moro+ nanga den. 3 Di den go na den priester+ di ben de na a tempel fu Yehovah di e tiri den legre èn na den profeiti, den aksi: „San wi musu du? Wi musu krei èn faste* na ini a di fu feifi+ mun, soleki fa wi gwenti du someni yari kaba?”+
4 Ne Yehovah di e tiri den legre taigi mi: 5 „Disi na san yu musu taigi ala den sma na ini a kondre nanga den priester: ’Seibitenti yari+ unu abi a gwenti kaba fu faste+ èn fu krei na ini a di fu feifi mun èn na ini a di fu seibi+ mun. Ma na gi mi unu ben e du dati? Unu ben du dati gi mi trutru?+ 6 Di unu ben e nyan èn di unu ben e dringi, na unu wawan ben e nyan èn na unu wawan ben e dringi, a no so? 7 Di sma ben e tan ete na Yerusalem sondro broko-ede èn di sma ben e tan ete na den foto lontu Yerusalem, na Negeb-sabana,+ èn na Syefela,+ unu no ben wani arki+ di den fositen profeiti+ ben kon taigi unu san Yehovah taki, a no so?’”
8 Yehovah taigi Sakaria: 9 „Yehovah di e tiri den legre ben taki: ’Un musu koti krutu na wan reti fasi+ èn un musu sori bun-ati+ nanga sari-ati+ gi trawan. 10 No bedrigi nowan uma di en masra dede kaba,+ nowan pikin di no abi papa,+ nowan trakondre sma di e tan na un mindri,+ èn nowan mofina sma.+ No prakseri srefi fu du ogri nanga wan trawan.’+ 11 Toku a pipel no ben wani arki mi,+ den tan kakafutu gi mi,+ èn den trangayesi mi.+ 12 Te mi ben meki mi yeye+ kon na tapu den fositen profeiti+ èn den ben e taigi a pipel san Yehovah di e tiri den legre taki, dan den no ben wani arki èn den no ben wani gi yesi na den wèt.+ Den ben meki den ati+ kon tranga leki ston. Dati meki Yehovah di e tiri den legre kisi bigi atibron.”+
13 „’Di mi ben e kari den, den no ben wani arki.+ Dati meki mi no ben e arki tu te den ben e kari mi’,+ na so Yehovah di e tiri den legre taki. 14 ’Leki wan bigi winti mi ben wai den go na ala sortu pipel+ di den no ben sabi,+ èn nowan sma ben e tan moro na ini a kondre fu den. Nowan sma ben e waka pasa na ini a kondre èn nowan sma ben drai kon baka.+ Den ben meki a moi kondre+ di ala sma ben wani, kon tron wan kondre di nowan sma wani kwetikweti.’”